YESAYA 59:21 - Alkitab Singog In Mongondow Masa In Tanaa

²¹ Akuoi in momia kon dodandian takin i monimu: Moiko in ogoian-Ku in kawasa-Ku bo totundú-Ku modapot in mononoi. Tundúdon kon i adímu mita sinbá mosia in motaau doman motundú kon tua kon adí bo ompu tanaa mako modapot in mononoi.”

YESAYA 59:21 Referans Kwoze

IBRANI 10:16

“ ‘Naadon in dodandian inta inaidan-Ku takin i monia kon singgai mita moiduduimai,’ ki Tuhan in noguman doman nanaa, ‘Hukum-Ku mita in potonop-Kudon kon bonu in gina monia, bo popopais-Kudon kon bonu in raian monia.’ ”

YESAYA 51:16

Akuoibí inta nosongká kon ḷangit bo nopoukat in dodoyonan mita in butá. Akuoi in moguman kon Sion: Ikobí nion in umat-Ku; Akuoi in mobogoi in totundú-Ku kon inimu bo mogoḻiung kon inimu pongin kawasa-Ku.”

YESAYA 44:3

Sin Akuoi in mopobutakbí in tubig kon butá inta noingkag, bo mopoiḻig in ongkag mita kon butá inta nongoguang. Akuoi in mobogoibí in kawasa-Ku kon buímu, bo momarakat kon adí bo ompumu.

YOHANES 4:14

táe intau inta monginum kon tubig ogoi-Ku in diá bidon moyoga-yogang, sin tubig inta ogoi-Ku kon inia in mobaḻí bidon bokaká kon bonu in awaknea, bo umuran ḷumuai bo mobogoi in kobiagan mononoi.”

YESAYA 55:3

Indongogaidon, ei bangusa-Ku, angoidon kon i-Nakó, moiko in ogoian-Ku in kobiagan inta mononoi. Pinodoyon kon tabi bo kososatia inta pinodandi-Ku kon i Daud, Akuoi in notogot kon dandi mononoi takin i monimu.

SURAT I PAULUS KON JAMAAT RUM 8:9

Táe moiko in diábí nobiag podudui in ibog in awak naa, moiko in nobiagbí podudui in ibog in Roho i Allah, aka totuu Rohodon i Allah in nongawasa kon i monimu. Táe aka kon intau tatua bo diá in Roho i Kristus, yo sia tua in deemanbí kapunyaan i Kristus.

YOHANES 3:34

Sin ki ine in pinotabá i Allah, dá siabí tua in mopoyaput in pirman i Allah, sin sia in kinawasa bidon in Roho i Allah.

YOHANES 7:39

Ki Yesus in nongonguman kon soaḷ Roho i Allah, inta bain tarimaan in intau mita inta mopirisaya kon i-Nia. Sin wakutu intua Roho i Allah in diápa inogoi; sin ki Yesus in diápa pinomulia.)

YESAYA 49:8

Ki Tuhan in noguman kon umat-Nea, “Kon tungkuḷ in Akuoi in moibog, Akuoi in motubagbí; kon singgai Akuoi moposaḷamat, Akuoi motuḷung kon i monimu. Moiko in oḻiungan-Ku bo ḷukadan-Ku, bo baḻíon-Ku dodandian kon bangusa mita. Tompiaan-Ku bui in butá inta noingongowdon mobaḻí butá tonsilai inta pogutunan.

KORINTUS 2 3:8

yo tantú moiḻiubí kon tua in bayag kon wakutu in pinogaidan kon dodandian inta inogoi in Roho i Allah.

YOHANES 1:33

Tungkuḷ intua diápabí kinotaauanku mongo ki ine in Sia. Táe ki Allah inta nopotabá kon inakó mopobaptis in tubig nogumandon kon inakó nanaa, ‘Aka mokoontong in iko kon Roho i Allah moponag bo mogutun kon intau tobatú, yo intaubí tatuata inta mopobaptis in Roho i Allah.’

YOHANES 17:8

Pinotaau-Kudon kon i monia in singog inta inogoi i Amá kon i-Nakó; bo sinarimadon monia. Kinotaauan monia kon Akuoi in totu-totuubí namangoi nongkon i Amá bo mosia in mopirisayabí kon ki Amábí in nopotabá kon i-Nakó.

YOHANES 8:38

Onu in inontong-Ku kon i Amá-Ku tua in poguman-Ku. Ná doman moiko mogaid kon onu inta pinoguman i amá monimu.”

SURAT I PAULUS KON JAMAAT RUM 11:27

Akuoi in nogaid kon dodandian takin i monia kon wakutu in Akuoi nongampung kon dosa mita monia.”

IḶUAIAN 4:15

Pongongumandon takinnea bo potaaudon kon inia onu inta musti singogonnea. Akuoi in motuḷungbí kon i namunda bo motundú kon onu in musti singogon bo aidan.

YESAYA 32:15

Táe komintanpa doman ki Allah in mamangoibí takin kawasa-Nea. Dá padang gurun in mobaḻídon gobá mita inta moḷumbá, bo gobá mita in mobaḻídon naonda bo kayuon.

YESAYA 40:8

Bonok in moingkag bo bungang in moḷaḷow, táe tosingogon i Allah naton in mononoibí.”

YESAYA 42:1

Guman i Tuhan, “Naa in mogogundoi-Ku inta binaba-Ku, intau inta piniḻí-Ku inta mokosanang kon gina-Ku. Akuoi ain nobogoi in kawasa-Ku kon inia, sin modia kon koadilan kon batúan in bangusa.

YESAYA 54:10

Umpaka buḷud mita bo tombuḷud mita modandú, Akuoi in diábí mogogai in monotabi kon inimu. Dodandian dodamean-Ku in umuran-Kubí kadaian,” Guman i Tuhan inta notabi kon inimu.

YESAYA 55:11

natua doman in tosingogon inta siningog-Ku diábí mobui kon i-Nakó takin diá in mangaḻenea, táe mokoaid kon onu inta kinoibog-Ku, bo mokodapot kon bayongan inta imakusud-Ku.

YESAYA 57:19

Akuoi in mobogoibí in kobiagan moaman kon bayongan in intau, pinomayá inta nodiug andeka inta noyayú. Akuoi in monompiabí kon umat-Ku.

MAZMUR 119:43

Tuḷungaipa kaasí in akuoi sinbá umuran mosingog kon onu in totuu, sin akuoi in mogoḷat mako kon onu in tantúon-Mu.

AMSAL 7:3

Umurandon torop in totundúku mita tatua, bo tagúdon kon bonu in ginamu.

YESAYA 66:22

Ná ḷangit mobagu bo butá mobagu in monahangbí popisí in kawasa-Ku, natua doman in buímu bo tangoimu in umuranbí oyúon.

YEREMIA 1:9

Onda intua ki Tuhan nopotuntun in ḻima-Nea, bo noḻiai kon bibigku bo noguman, “Indongogai bo potaaudon in singog mita inta potaau-Ku naa.