YESAYA 59:15 - Alkitab Singog In Mongondow Masa In Tanaa

¹⁵ Diádon in intau inta mojujur, bo ki ine in yumayú kon inta moraat siadon tontaní in mobaḻí kuruban in aid moraat.” Ki Tuhan in nokoontongdon bo diábí nopia in gina-Nea kon diádon in koadilan.

YESAYA 59:15 Referans Kwoze

MIKHA 7:2

Intau motuḻid diádon in kon butá, intau inta motoindudui kon i Allah diádon mouḻí. Batúan in intau komintandon mogoḷat kon kasampatan moḻimod. Kon batúannea motaan kon poyogaḷap kon tumpaḷa intau.

SURAT I PAULUS KON JAMAAT RUM 8:36

Kon bonu in Buk Motusi in pinais nanaa, “Tumongo singgai in kami moyogintayow mako in popatoi popisí in Iko. Kami in pinomiadon naonda bo domba inta diaandon sin ratáan.”

OUMAN IN RASUL MITA 9:23

Naonda in tongonumaidon nosinggai in koonggotnea intau mita in Yahudi noyopakat moḻimod kon i Saulus.

OUMAN IN RASUL MITA 9:1

Wakutu intua ki Saulus umuranpabí mogogondok bo moḻimod kon bayongan intau inta ain nopirisaya kon i Tuhan Yesus. Sia in minayá kon i imang moḷoben,

KORINTUS 2 5:13

Sin aka kami bo ná diádon moratak, yo tua in lantaranbí kopontingan i Allah, táe aka kami bo moratak in koontongan, yo tua in lantaranbí moiko.

OUMAN IN RASUL MITA 26:24

Koyogotpa in ki Paulus mopoyotutui in onu inta nobaḻí kon inia, ki Pestus in nomaḷúdon kai-nia, “Diábí noratak in iko nion Paulus! Kinoḻiuandon in pandoimu dá diádon motoratakmai in raianmu!”

MARKUS 3:21

Intau mita in noguman, “Nobundaidon in Sia nion!” Bo naonda in kinodongogan in ginaḷum-Nea in singog monia tua, binayádon monia ginamá in ki Yesus.

HOSEA 9:7

Noiangoidon in wakutunea pohukuman, wakutu motarima kon tontuḻínea kon bayongan in oaid. Israel in mokonanambí kon tua! Moiko in moguman, “Nabi inta kinawasa in roho tanaa in dondunguḷ! Nobundai in sia!” Moiko in noguman natua sin moiko in doí totok kon inakó bo dosamu in totuu moḷoben.

YEREMIA 29:26

“Ki Tuhan ain noduí kon inimu nobaḻí imang nomaḷui kon i Yoyada, bo tanaa ikodon in pojabat inta moḷantu-ḷantud kon Baḷoi i Tuhan. Oaidanmu in momarenta sinbá bayongan intau nobundai inta tumangoi nabi, sinokig in rante uatoi kon sigogownea.

YEREMIA 7:28

Dá, pogumandon kon i monia kon mosia in bangusa tobatú inta doí motoindudui kon i-Nakó, Tuhan, Allah monia. Mosia in doí mobalajar nongkon hukuman inta ain kinorasaannea. Kotoindudui kon i-Nakó in noinggamádon, nodapot in diá bidon inouman bui.”

YESAYA 48:1

Indongogai, ei buí i Yakub, buí in Yohuda inta nomaké in tangoi in Israel, kainimu in inakumu in Allah in Israel, bo nongibot pinodoyon kon tangoi Tuhan. Táe tosingogonmu mita tua in diábí totuu.

MAZMUR 5:9

O Tuhan, totuubí mobayong in saturuku! Kapitdon in akuoi in mogaid kon onu in kinoibog-Mu, bo poontongdon in daḷan-Mu inta musti bayáanku.

TAWARIKH 2 21:7

táe ki Tuhan in doíbí momutú kon datu inta nongkon buí i Daud sin Sia in nodandidon kon buí i Daud in umuranbí momarenta.

SAMUEL 2 11:27

Onda intua naonda in nopaḷutdon in pinonogumatoian tatua, binayá pinoki gamá i Daud in bobay tatua bo dinia mangoi in komaḻig bo binaḻídon i Daud ki buḷoinea in sia. Tongonumai nobuḷan noiduduimai, nopononggadí in sia in adí ḷoḷaki tobatú. Táe kinodoíbí i Tuhan in aid i Daud tatua.

YOHANES 8:52

Dá itoi mita in Yahudi tatua in noguman bui kon i Yesus, “Tanaa in kinotaauandon totok nami kon Iko nion in totu-totuudon kinotoḷangan in dimbuḷó! Sin ki Abraham tontaní ain minatoi, ná doman tua in nabi mita. Táe Iko in moguman, ‘Intau inta dumudui kon singog-Mu, diá bidon kawasaan in popatoi.’

DATU MITA 2 9:11

Ki Yehu in buidon minayá kon yobayatnea mita, bo noḻibó in mosia, “Onu in habar? Onu in inangoi in intau nobundai tatua kon inimu?” “Uḻe, kinotaauandon monimu,” tubag i Yehu.

KINOBAḺIAN 38:10

Gogutúnea tatua nokopomuká kon torú i Tuhan, bo ki Tuhan nomatoi doman kon inia.

YOHANES 10:20

Nobayong in noguman, “Kinotoḷangan in dimbuḷó in Sia! Sia in nobundai! Nongonu sin indongoganbí monimu in Sia?”

YESAYA 1:21

Kotá inta koḻipod motoindudui, tanaa mako in nádon onda bo sundaḷ tobatú! Dungkuḷmai bayongan in intaunea in moadil bo mojujur, táe tanaa in pinogutunandon in moḷoḻimod mita.

YESAYA 5:23

Táe tongá bá mokouḻí kon doit posogó, dá moiko in mopoḷuat kon intau kotaḷá, bo moḷamboi kon intau diá kotaḷá mokouḻí kon inta moadil.

YESAYA 10:2

Pinongin aid natua moiko in moḷamboi kon intau bogá mokouḻí kon hak bo koadilan, bo mogagow kon kapunyaan in boba-bobay mita bo uno-unon.

YESAYA 29:21

intau inta moibog moponapud in uboḷ, intau inta moḷamboi kon intau moraat in hukumon, bo intau inta mongonguman magí mako kon ouman uboḷ sinbá intau motuḻid diá mokouḻí kon inta moadil.

YESAYA 32:7

Bo intau mouboḷ morai bo mogaid kon onu inta moraat. Sia in motayak kon daya sin mopobodito kon intau bogá pongin tosingogon mita inta uboḷ bo moḷamboi kon i monia mokouḻí kon haknea.

YESAYA 59:4

Moiko in nopongadu in pelekara takin diá in dodoyonan bo nohakim takin diá moadil. Moiko in nonguboḷ bo mopongata kon inta diá in mangaḻenea, moiko in momia kon tomayá sin mopobodito kon intau ibanea bo mogaid kon inta moraat.

AMOS 5:10

Moiko in doí kon intau inta monayow kon inta diá moadil bo inta mosingog kon totuu kon bonu in pongadilan.

YESAYA 46:12

Indongogaidon in Akuoi, ei intau mita moḷoḷatú, moiko inta noguman kon kauntungan in noyayúpabí.

YESAYA 65:12

Moiko komintan in matoibí mita mobaḻí kuruban in aid moraat. Sin, kon dodai in Akuoi nogoiní, moiko in doíbí sinumubag, bo kon dodai in Akuoi nosingog, moiko in doíbí nokidongog. Moiko in moibo-ibogbí moḷawang kon i-Nakó bo mogaid kon inta moraat.

YESAYA 66:4

Tuamai Akuoi doman in mogaidbí kon onu in koibog-Ku bo mopouma kon i monia in bodito mita inta koondok monia. Sin kon tungkuḷ in Akuoi nogoiní, diá in notubag; kon tungkuḷ in Akuoi nosingog, diá in nokidongog. Mosia in moibo-ibogbí moḷawang kon i-Nakó bo mogaid kon inta moraat.”

OMBAḶ 3:36

popisí in inta moadil sinuui, yo notantúbí kon ki Tuhan in nonotaaubí bo noindoi mako.