YESAYA 59:13 - Alkitab Singog In Mongondow Masa In Tanaa

¹³ Kami in nonguboḷdon bo nomarontak kon i Tuhan, bo doí dumudui kon i Allah nami. Kami in nondorotdon kon intau ibanea bo nobaḷui in raian; raian nami in noiḷaḻedon, bo tosingogon mita nami in uboḷ.

YESAYA 59:13 Referans Kwoze

YAKOBUS 3:6

Dilá tua in naonda bo tuḷu. Kon awak naton, sia in mobaḻí pangkoi in moraat inta mopobaya-bayá mako in moraat kon bayongan in awak naton. Takin tuḷu inta nongkon naraka, sia in momokak kon bayongan kobiagan naton.

IBRANI 3:12

Utatku mita, mokopoingat sinbá diá in tobatúmai kon sigad monimu in gina moraat bo diádon mopirisaya, sahingga in tumoḻikud bo mokopoyayúdon kon i Allah inta nobiag!

YAKOBUS 1:15

Moiduduimai kon tua, aka ibog inta moraat tatua bo duduian, dá mobaḻídon in oaid inta diá mopia; bo aka aid diá mopia tatua bo moguyangdon, dá popatoi in bungainea.

TITUS 1:16

Mosia in mongaku kon nonotaaudon kon i Allah, táe oaid monia in diábí noidudui kon inta kinoibog i Allah. Oaid monia tua mokorongó bo diá doman motoindudui; mosia tua in intaubí mita inta diádon mokomampu mogaid kon inta mopia.

MATIUS 10:33

Táe ki ine in momayow kon tayowon intau mobarong kon sia in dumodudui-Ku, yo sia in bayowan-Ku doman kon tayowon i Amá-Ku inta kon soroga.”

HOSEA 7:13

Mobodito in mosia, sin mosia in nonaḷámaidon kon i-Nakó. Mosia in morimumudbí sin nomaḷawangdon kon i-Nakó. Akuoi in moibogbí moposaḷamat kon i monia, táe ibada monia kon i-Nakó in tongábí ubo-uboḷ ibada.

HOSEA 6:7

Táe naonda bo kon Adam, moiko in nonaḷámai kon dodandianmu takin-Ku.

HOSEA 1:2

Kon dodai in ki Tuhan dungkuḷ totok nosingog kon bangusa in Israel pinongin inakó, ki Tuhan in noguman, “Hosea, tonibuḷoidon in bobay tobatú inta sundaḷ, bo ki adímu mita doman in moidayan kon inia. Umat-Ku in notongkai ná ki buḷoimu tatua; mosia in diá motoḷutui kon i-Nakó, bo nonaḷámai kon i-Nakó.”

YEHEZKIEL 18:25

Degá oyúon in moguman nanaa, ‘Noitaḷádon in aid i Tuhan.’ Indongogaidon, ei intau in Israel! Degá noitaḷá in inta inaidan-Ku? Moikobí in noitaḷá.

YEHEZKIEL 6:9

kon tua mosia in mobiag kon bonu in poḷumbúan. Bo kotoropandon monia in Akuoi bo komangaḻeandon monia kon Akuoi in mohukum bo moningkuḻe kon i monia sin gina monia in diá motoindudui kon i-Nakó. Mosia in nonaḷámaidon kon i-Nakó bo ain nomiḻí kon berhala nobaḻí toḻiu-Ku. Bo mosia in doídon kon awak monia tontaní popisí in bayongan in aid moraat bo moromú inta ain inaidan monia.

YEREMIA 42:20

kon moiko in nogaidon kon taḷá moḷoben. Moiko in nopoigum sinbá akuoi in mosambayang kon i Tuhan Allah naton sin kopontingan monimu, bo moiko in nodandi kon dumuduibí kon bayongan inta pinoguman i Tuhan.

YEREMIA 32:40

Akuoi in momiabí kon dodandian inta mononoi takin i monia. Akuoi in diábí mogogai in mogaid kon inta mopia kon i monia. Baḻíon-Kubí in mosia moondok bo mohoromat kon i-Nakó takin ḻimbatú in gina sinbá mosia diá yumayú kon i-Nakó.

YEREMIA 17:13

Tuhan, Ikobí in inandoḷan in Israel, umat-Mu; Bayongan inta nonaḷámai kon ini-Mu in mooyábí. Mosia in moinggamábí nongkon dunia naa bo mayá in dunia in intau minatoi. Sin, Iko in bokaká in tubig kobiagan in sinaḷáandon monia, o Tuhan.

YEREMIA 5:23

Táe moiko in pamandot bo moibog moḷawang, moiko in nomaḻidawandon bo nonaḷámaidon kon i-Nakó.

YEREMIA 3:20

Táe notongkai in buḷoi bobay inta diá mosatia, iko in diá doman nosatia kon i-Nakó. Akuoi, ki Tuhan, ain nosingog.”

YEREMIA 3:10

Naonda in nogaid kon tua mita, Yohuda inta diá mosatia tua nobui kon i-Nakó táe tongá ki ubo-uboḷmai, sin ginanea in diábí notuḻid. Akuoi, ki Tuhan, ain nosingog.”

YEREMIA 2:13

Umat-Ku ain nogaid kon doyowa norupa in dosa: mosia in nonoḻikud kon i-Nakó, bokaká in tubig mobogoi in kobiagan kon intau; mosia in nogaid kon tabang noḷombang inta diá mokosion kon tubignea.”

YESAYA 57:11

Ki Tuhan in noguman, “Ki ine in dewa mita tatua inta nopobaḻí kon i monimu moondok, dá moiko in monguboḷ bo diádon mokotorop kon i-Nakó? Eta degá moiko in diádon mosumba kon i-Nakó popisí in Akuoi noonggot totok in kibio-biómai?

YESAYA 48:8

Kinotaauan-Ku kon iko in diábí motaau pirisayaan, nongkon dungkuḷpabímai kinotaauandon in iko kon moraat. Tuamai in diá kinotaauan, diá tobatúmai in tosingogon in modapot kon bongoḷanmu.

YESAYA 32:6

Intau bodok mosingog kon tosingogon inta mobodok bo monomayá kon inta moraat. Onukabí in aidan andeka inta singogonnea in nobaḻí bidon singkuḻe kon i Allah. Diábí kon dodai in onda in sia mobogoi in kaanon kon intau inta gogoyon andeka oinumon kon intau inta morogang.

YESAYA 31:6

Ki Tuhan in noguman, “Bangusa in Israel, moiko ain nomaḷawang kon i-Nakó bo binaradosa kon i-Nakó. Táe tanaa, pobuidon mangoi kon i-Nakó!

YESAYA 5:7

Sin gobá in anggur i Tuhan Inta Totok in Mokawasa in umat in Israel, bo intau mita in Yohuda in pangkoi in anggur inta pinomuḷa-Nea. Kon i monia iharap-Nea mako in aid inta moadil, táe tongábí aid moraat. Kon bonu in kamang-Nea mosia in moposindogbí in inta mobanar, táe tongábí oyúon in karak moigum kon koadilan.

AMSAL 30:9

Sin, aka akuoi in mooyúon, yo dika-dika bo akuoi in moguman kon akuoi in diábí moparaḷu kon ini-Mu. Bo aka akuoi mobiag bogá, yo dika-dika bo monakow in akuoi dá mokopooyámai kon tangoi-Mu.”

MAZMUR 78:36

Táe mosia in nongakaḷ kon i-Nia, tosingogon mita monia komintan uboḷ.

MAZMUR 18:21

Ki Tuhan in notuḻí kon aidku inta noitutui; binarakatan-Nea in akuoi sin akuoi in diá kotaḷá.

YOSUA 24:27

Nopaḷut mako kon tua ki Yosua noguman kon bayongan in intau kon tua, “Batu tanaa in mobaḻí sakusi naton. Bayongan in tosingogon inta siningog i Tuhan kon inaton, aindon siningog kon tayowon in batu tanaa. Dá batudon tanaa in mobaḻí sakusi kon i monimu, sin moponorop kon i monimu sinbá diá moḷawang kon i Allahmu.”

AYUB 31:28

Dosa ná tatua in patusbí motarima kon hukuman matoi; sin ki Allah Inta Totok in mokawasa in sinaḷáandon.

YESAYA 10:1

Moboditodon in moiko inta nogaid kon hukum mita inta diá moadil sin pondorot kon bangusa-Ku.

YESAYA 30:12

Tuamai Allah mokudus in Israel moguman nanaa, “Moiko in doí motarima kon tosingogon-Ku bo mopongata in aid mondorot bo mouboḷ.

YESAYA 58:2

Mosia in mosumba kon i-Nakó pomuḷoi in singgai, bo moibog monotaau kon ibog-Ku, naonda bo moibog in mosia mogaid kon inta mopia, bo motoindudui kon hukum-Ku. Mosia in moguman kon mosanang in gina monia in mosumba kon i-Nakó bo moibog in hukum-Ku inta moadil.”

YESAYA 58:9

Aka moiko mosambayang, indongogan-Ku intua. Aka moiko mokuani kon i-Nakó, tubagan-Ku. Dikadon bui mondorot kon tumpaḷa intau, gogaiaidon in sosaturuan bo tapud.

YESAYA 58:13

Ki Tuhan in noguman, “Horomatbí in singgai in Sabat saḷaku singgai kon i Tuhan. Dika mogaid kon kopontinganmu tontaní kon singgai tatua. Ramedon in singgai tatua nobaḻí singgai mokosanang kon gina; horomatbí in singgai i Tuhan takin diá maya-mayá mako; dika doman mogaid andeka mosingog kon diá in mangaḻenea.

YEREMIA 12:8

Umat inta piniḻí-Ku noḷawang kon i-Nakó; naonda bo singa kon kayuon natuata in mosia moganggor kon i-Nakó. Tuamai in Akuoi morongó kon i monia.

AMOS 6:12

Yo degá mokoribatukpa in kabaḷo kon buḷud batu? Nokoimontandon degá in intau nopomajeko in sapi kon dagat? Táe moiko in nonuuidon kon kooadil nobaḻí rasum inta mokopatoi, bo inta moitutui mobaḻí moitaḷá.

YEREMIA 2:16

Ei Israel, buokmu in ginonsingan in intau in Mempis bo Tahpanhes.

YEREMIA 2:17

Iko tontaní in nokopopisí kon bayongan inta nobaḻí kon inimu, sin kon tungkuḷ in iko kinapit-Ku kon binayáan, iko in nonoḻikud kon i-Nakó, Ki Tuhan Allahmu.

HOSEA 7:1

Ki Tuhan in noguman, “Pomuḷoi in Akuoi moibog monompia kon umat-Ku Israel bo mopoyobui in kaadaan monia, inta ontongon-Ku in tongábí aid moraat bo dosa monia. Mosia in mosiakaḷan, tumuot in mosia kon baḷoi in intau bo monakow, bo mosia in mogagow kon daḷan mita.