YESAYA 49:8 - Alkitab Singog In Mongondow Masa In Tanaa

⁸ Ki Tuhan in noguman kon umat-Nea, “Kon tungkuḷ in Akuoi in moibog, Akuoi in motubagbí; kon singgai Akuoi moposaḷamat, Akuoi motuḷung kon i monimu. Moiko in oḻiungan-Ku bo ḷukadan-Ku, bo baḻíon-Ku dodandian kon bangusa mita. Tompiaan-Ku bui in butá inta noingongowdon mobaḻí butá tonsilai inta pogutunan.

YESAYA 49:8 Referans Kwoze

KORINTUS 2 6:2

Sin ki Allah ain noguman nanaa, “Kon wakutu inta kinoibog-Ku, Akuoi in nongindongogdon kon i monimu, bo kon singgai in akuoi moposaḷamat, Akuoi in motuḷung kon inimu.” Pokotorop kopia, masa in tanaa ain bidon wakutu inta kinoibog-Ku tua, bo tanaa bidon mako in singgai poposaḷamatan tatua!

YESAYA 42:6

“Akuoi, ki Tuhan, in mogoiní bo mopotabá kon inimu sin mopobayá in inta moadil iko in kapiton-Ku bo ḷukadan-Ku sin mobaḻí dodandian kon umat intau, bo sindar kon bayongan in bangusa.

MAZMUR 69:13

Akuoi in tantú oumanon magí-mako monia kon poyosipunanmai in intau, bo dondong in intau mita nongoḷoḷangu in akuoibí.

IBRANI 12:24

Moiko in namangoi sinumayow kon i Yesus, tonsigad in dodandian inta mobagu tua; moiko in sinumayow kon dugú pinomisik inta nojamin kon soaḷ mita inta mopia-pia nongkon onu inta jinamin in dugú i Habel.

YESAYA 61:4

Mosia in moposindogbí in kotá mita inta ain noonggot in norumbun bo moposindog bui in tampat mita inta ain noonggot in noingongow.

YESAYA 58:12

Kotá inta noonggotdon in nobaḻí rumbunnea in posindogonmudon bui kon tudu in orotan koyongan. Moiko in tangoiondon ‘Bangusa inta moposindogdon bui in dinding mita bo monompia kon baḷoi mita inta ain nogoguyaat.’ ”

IBRANI 5:7

Kon wakutu in ki Yesus nobiagpa kon dunia naa, Sia in nosambayang bo nopoigum takin koamu-amui bo koomba-ombaḷ kon i Allah inta mokosanggup moposaḷamat kon i-Nia nongkon roriga in popatoi. Bo lantaran Sia umuran dinumudui kon onu in kinoibog i Allah, dá inindongogan i Allah in pinoigum-Nea tua.

YESAYA 51:16

Akuoibí inta nosongká kon ḷangit bo nopoukat in dodoyonan mita in butá. Akuoi in moguman kon Sion: Ikobí nion in umat-Ku; Akuoi in mobogoi in totundú-Ku kon inimu bo mogoḻiung kon inimu pongin kawasa-Ku.”

YESAYA 44:26

Akuoibí in noginrigon kon tosingogon in mogogundoi-Ku, bo nopobayá in tomayá inta pinoniata in totabá-Ku, Akuoi in noguman kon Yerusalem in pogutunanbí bui, bo kotá mita in Yohuda in posindogon-Kubí bui; rumbunnea mita in buibí tompiaan.

EPESUS 1:6

Dinayo-dayowdon in ki Allah inta mokawasa, sin tabi-Nea inta totok in moḷoben kon i naton pinoniata-Neadon pinongin i Adí-Nea.

YESAYA 54:3

Iko in modugangbí mooḷad ná koḷanan bo koḷoigi, ḻitúanbí in intaumu mita in butá in bangusa mita bo mogutun kon kotá mita inta tanaa mako noingongow.

YESAYA 49:19

Butámu inta noḷogat bo noingongow, tanaa in noiḻiudon sisí kon intau mita inta moibog mogutun kon tua. Bo intau mita inta moibog moyopú kon inimu, ain minayá iyumayú kon inimu.

YESAYA 42:1

Guman i Tuhan, “Naa in mogogundoi-Ku inta binaba-Ku, intau inta piniḻí-Ku inta mokosanang kon gina-Ku. Akuoi ain nobogoi in kawasa-Ku kon inia, sin modia kon koadilan kon batúan in bangusa.

YESAYA 26:3

Tuhan, Iko mobogoi in dodamean bo kobiagan motompia kon intau inta moroton in ginanea, sin mopirisaya in sia kon ini-Mu.

MAZMUR 75:3

Ki Allah in noguman, “Kon wakutu inta sinantú-Ku, Akuoi in mohakimbí koadilon.

MAZMUR 2:8

Igumdon, dá bayongan in bangusa ogoi-Kubí kon inimu, bo sinangkub in dunia baḻíon-Kudon kapunyaanmu.

IBRANI 8:6

Táe tanaa ki Yesus in nokouḻí kon tugas imang inta momuli-mulia nongkon inta inaidan in imang mita tatua. Sin dodandian inta pinomia-Nea kon sigad i Allah bo in intau tua in dodandianbí inta totok in mopia sin pinodoyon doman kon dandi inta totok in mopia.

MATIUS 26:28

Sin naadon in dugú-Ku, dugú dodandian, inta noibutak sin pinongampung kon taḷá in intau moantó.

YESAYA 51:3

Yerusalem, ḻipoion-Ku in iko, bo bayongan inta nogutun kon kino rumbunanmu. Rawangmu mita inta noḷogat binaḻí-Kudon taman, naonda bo Eden, taman-Ku inta noḷumbá. Kon tua intau in morogiow bo mopia in gina bo mosukur pongin dondong mita.

YESAYA 27:3

Akuoi, ki Tuhan, moḷoḷukad-Nea; pomuḷoi mako butakanku intua, singgai doḷom ḷukadanku intua, sinbá diá in monuyayow kon inia.

YESAYA 41:10

Dika moondok, sin takinan-Kubí in iko, dika moḻia-ḻiaw in gina, sin Akuoi in ki Allahmu. Iko in irigonan-Ku bo tuḷungan-Ku, Ḻima-Ku inta moroton in pokapit-Ku.

YESAYA 55:6

Pobuidon kon i Tuhan kon dodai in mokopobuipa; pokuanidon kon i-Nia kon dodai in Sia nodiugpa.

YESAYA 57:13

Aka moiko momaḷú, yo biódon mako in patong mita tatua in moposaḷamat kon i monimu! Mosia in mobuḻibí poḷayugon in tompot bo moinggamá tongá tokokiap monag! Táe intau inta moniung kon i-Nakó in mogabatbí kon butá tatua bo mosumba kon i-Nakó kon Baḷoi-Ku.”

YESAYA 58:5

Aka moiko mopuasa, moiko in moposikisa in awakmu; moiko in kumuyung naonda bo daun in bonok. Moiko in mopoompat in daing nongkon karong bo moponabud in ḷobud kon tudunea bo umuḻid. Tua degá inta sinangoian monimu mopuasa? Kainimu kamai mosanangbí in gina-Ku kon aid monimu tatua?

YESAYA 61:2

Sia in nopotabá kon inakó sin mopohabar kon naadon in wakutunea ki Tuhan moposaḷamat; sin moḻipoi kon bayongan inta kinopatoian, bo motuḻí kon musung mita monia;

YESAYA 65:9

Tongosilai in Intau in Israel nongkon suku in Yohuda in barakatan-Ku, bo buí monia in mokadai kon butá buḷud-Ku. Intau mita inta piniḻí-Ku inta mogundoi kon i-Nakó in mogutunbí kon tua.