YESAYA 26:10 - Alkitab Singog In Mongondow Masa In Tanaa

¹⁰ Umpaka intau moraat pinopoaidan in inta mopia, diábí doman in sia mobalajar kon onu inta mobanar. Kon negara inta oyúon in hukum sia in mopoaidbí doman kon inta motombogá, bo doíbí motarima kon kawasa i Tuhan.

YESAYA 26:10 Referans Kwoze

HOSEA 11:7

bo tumontogat kon monaḷámai kon i-Nakó. Dá mosia in kodorotanbí, táe diábí in mopoḷuat kon i monia umpakabí mosia momaḷú mokituḷung.”

WAHYU 2:21

Sia inogoian-Kudon in kasampatan mogogai in mogaid kon dosanea mita, táe doíbí in sia mogogai mogaid kon soaḷ mita inta mokotor tua.

MIKHA 2:10

Sindogdon bo bayá; kon naa in diádon moaman. Dosamu mita in nokopoangoidon kon anib inta mokokoningkim kon tudu in tampat tanaa.

YEREMIA 2:7

Mayá in butá inta mopia inatod-Ku in mosia sin mokaan kon bungai mita in pinomuḷa bo bayongan in inta mopia kon tua. Táe kon tua butá-Ku in pinonajisdon monia bo kapunyaan-Ku in binaḻí monia mokorongó.

MOHOHUTUBA 3:16

Oyúonpa doman in inontongku kon dunia naa: kon onda in musti oyúon in koadilan bo kopiaan, yo kon tua doman oyúon in aid moraat.

AMSAL 1:32

Intau inta diá kopongalaman in matoibí popisí in doí motarima kon inakó, bo intau inta bodok in morimumudbí popisí in doí mopandungmai kon inakó.

MAZMUR 106:43

Nopobui-buimaidon in ki Tuhan nopoḷuat kon i monia, táe moibo-ibogbí in mosia momarontak, dá noyopú in mosia kon bonu in dosa mita monia.

ULANGAN 32:15

Umat i Tuhan nobaḻí nobiag nooyúon, táe moibog momarontak, mosia in nongoḷongó, nobotug in kaanon. Bo mosia in nonaḷámai kon i Allah, inta nomaḻí kon i monia bo nondoí kon Mopoposaḷamatnea inta moroton.

IḶUAIAN 9:34

Táe naonda in ki datu nokoontong kon uyan eis nogogaidon takin gotup bo uyan, dá sia buidon nogaid kon dosa. Sia bo pogawainea mita umuranbí nokopotogat kon gina.

IḶUAIAN 8:15

Naonda inontongdon i datu kon tumpaḷak mita tatua minatoidon, sia nokopotontogat bui kon ginanea. Bo ná inta ain pinoguman muna i Tuhan, ki datu in doíbí mopandungmai kon tosingogon i Musa bo i Harun.

HOSEA 13:6

Táe naonda in moiko kon bonudon in butá mopia, poḷat nobotug nodapotdon in moiko noorop, nobaḻídon in moiko moḷoḷatú bo iḻiongdon monimu in Akuoi.

HOSEA 9:3

Moiko, ei bangusa in Israel, diábí umuran mogutun kon butá inta inogoi i Tuhan kon inimu. Moiko in mustibí mobui kon Mesir, bo musti mokaan kon kaanon haram kon Asyur.

YEREMIA 31:23

Ki Tuhan Inta Totok in mokawasa, Allah in Israel in noguman, “Aka umat-Ku binaḻí-Kudon ponango-nangoian ná dungkuḷmai, dá kon butá in Yohuda bo kon ḻipúnea mita yo kodongogandon bui intau in moguman, ‘Igumon mako ki Tuhan in momarakat kon tombuḷud motusi kon Yerusalem tampat pogutunan inta ain sinantú kon i-Nia.’

YESAYA 27:13

Kon dodai intua posingogonbí in torompet moḷoben sin mogoiní bui kon bayongan intau in Israel inta iḷumbú kon Asyur bo kon Mesir. Mosia in mamangoibí in Yerusalem sin mosumba kon i Tuhan kon buḷud-Nea inta motusi.

YESAYA 24:5

Butá mobaḻí mokotor popisí in intaunea iḻimimpat kon parenta mita i Allah, nomaḷui kon inta ain sinantú-Nea mita bo nonoḻikud kon dodandian inta pinomia-Nea noyotakin monia modapot in mononoi.

YESAYA 5:12

Kon bobutunganmu mita oyúon in singog in kecapi, gambus, rebana bo bansí bo monginum kon anggur. Táe diábí pinandungmai monimu onu in pinomia i Tuhan bo onu inta inaidan-Nea.

YESAYA 2:10

Mosia in tumuot kon bonu in angob mita kon buḷud mita in karang, andeka mongaḻi kon bubú kon bonu in butá sinbá moiḷagui kon torú i Tuhan bo nongkon kawasa-Nea inta moḷantud.

MAZMUR 143:10

Tundúdon in akuoi mogaid kon onu in kinoibog-Mu, sin Ikobí in ki Allahku. Iko in mopia in gina, bo modia kon inakó mayá mongindaḷan notondodai.

SAMUEL 1 15:17

Ki Samuel in noguman, “Tantú kinotaauanbí i Tuang Datu, kon umpakabí kon raianmu tontaní ki Tuang Datu naa in mointok táe binaḻí bidon itoi kon suku mita in Israel? Bo iko nion in binarakatandon i Tuhan nobaḻí datu kon Israel,

YESAYA 32:6

Intau bodok mosingog kon tosingogon inta mobodok bo monomayá kon inta moraat. Onukabí in aidan andeka inta singogonnea in nobaḻí bidon singkuḻe kon i Allah. Diábí kon dodai in onda in sia mobogoi in kaanon kon intau inta gogoyon andeka oinumon kon intau inta morogang.

MATIUS 4:5

Onda intua ki Yesus in dinia Ibilis minayá in Yerusalem inta sinangoi kotá motusi tua bo sinimindog kon binubungan Baḷoi i Tuhan,

IḶUAIAN 9:30

Táe kotaauankubí kon ki Tuangku bo pogawai mita i Tuang in diápabí doman moondok kon i Tuhan Allah.”

MAZMUR 69:27

Sin mosia in nomogutú kon intau inta ihukum-Mu, bo mongonguman magí-mako kon soaḷ intau inta iyoyiga-Mu.

YESAYA 32:7

Bo intau mouboḷ morai bo mogaid kon onu inta moraat. Sia in motayak kon daya sin mopobodito kon intau bogá pongin tosingogon mita inta uboḷ bo moḷamboi kon i monia mokouḻí kon haknea.

DATU MITA 2 13:6

Umpaka natua táe intau in Israel in diábí doman nogogai in mogaid kon dosa mita inta pinangkoi i Datu Yerobeam. Mosia in umuranbí mogaid kon dosa mita tatua, bo mopomayádon mako kon patong i Dewi Asyera umuran kon Samaria.

MOHOHUTUBA 8:11

Nongonu sin totuubí mogampang in intau momia kon inta moraat? Popisí in hukuman diá ḷagi popoḷabú.

YESAYA 1:21

Kotá inta koḻipod motoindudui, tanaa mako in nádon onda bo sundaḷ tobatú! Dungkuḷmai bayongan in intaunea in moadil bo mojujur, táe tanaa in pinogutunandon in moḷoḻimod mita.