YESAYA 23:17 - Alkitab Singog In Mongondow Masa In Tanaa

¹⁷ Mopaḷut mako in pitu nopuḷú notaong tatua, ki Tuhan in monoropdon bui kon Tirus bo mobogoidon kon inia mogaid kon oaidannea dungkuḷmai. Sia in modagangdon takin bayongan in dodatuan kon dunia naa.

YESAYA 23:17 Referans Kwoze

NAHUM 3:4

Niniwe sundaḷ tatua yogotdon popoḷabúan in hukuman. Koḷoḷunatnea in totok in mokoangá. Nobayong in bangusa ain sinihirnea, bo dinondouḷugan pinodoyon kon dondouḷugnea.

WAHYU 19:2

Sin pohohakim-Nea in moadil bo mobijaksana! Sia ain nopoḷabú in hukuman kon sundaḷ moḷoben, inta nomoguyaat kon dunia naa takin aidnea inta mokotor. Ki Allah ain nohukum kon sundaḷ tatua, sin sia in noḻimod kon intau mita inta nogaid kon oaidan i Allah.”

PETRUS 1 5:2

ḷukadaibí monimu kopiaraan in domba i Allah inta ain pinosarakan kon i monimu. Ḷukadai takin sanang in gina ná inta kinoibog i Allah, dikabí tongá pakisa in gina. Bo dika doman mogaid kon oaidan tatua tongá sakadar motayak kon kauntungan tontaní, táe aidaibí intua sin lantaranbí moiko totu-totuubí moibog mopobayá in oaidan i Allah.

TIMOTIUS 1 3:8

Natua doman in mobobantung mita in jamaat, mustibí in mosia intau inta mopia bo mojujur; diá dinoit bo diá umuran monginum kon inta mokoḷoḷangu.

TIMOTIUS 1 3:3

donaaibí in intau inta umuran moḷoḷangu, ande intau inta moibo-ibog moropatoi, táe intaubí inta moaḷus in dodia bo pososingognea bo inta moibog doman in dodamean, bo diá dinoit.

OUMAN IN RASUL MITA 15:14

Bagu dongka ininsilangan i Simon kon nongkon pinomangkoianpabímai ki Allah in nopoontongdon in tabi-Nea kon intau mita inta deeman Yahudi, bo nomiḻí kon umat kon sigad in intau mita inta diá mopirisaya. Tongá kinoonggotannea in umat inta piniḻí-Nea tatua in nobaḻí umat inta motoindudui kon i-Nia.

ZEPANYA 2:7

Intau in Yohuda inta mokoḷagui, in mogutunbí kon butámu tatua. Mosia in momiagbí kon bobiagon kon butá tatua, bo kon dodai in doḷom mosia in mosiugbí kon baḷoi mita in intau in Askelon. Sin ki Tuhan, Allah monia in moḷukadbí bui kon i monia bo mopobaḻí bui kon i monia motomoman.

MIKHA 3:11

Mongongawasa mita in kotá momarenta mokiigum in doit pomompon kon bibig, imang mita in motundú kon hukum i Tuhan sin motayak kon tondan pogaidan, bo nabi mita mopoigum in topotundú nongkon i Allah sinbá mokouḻí kon doit – bo kai monia kamai dá ki Allah in dinumotábí kon i monia. Mosia in moguman, “Ki Tuhan in oyúon kon yua-yuak naton; kita in diábí koantugan in anib.”

MIKHA 1:7

Patongnea mita inta mongomahaḷ in rimumudon, bo bayongan in pakakat inta ogoi kon bobay mita inta mopobayá in oaidannea kon kuil in tubáan, takin bayongan in berhalanea in yompaton. Tua mita in nouḻí monia kon pinoibadaannea kon i dewa in koḷumbaan. Tanaa bayongan intua akutondon in musungnea mita sin posumbadon mobaḻí sukur kon dewa mita monia.”

YEHEZKIEL 22:13

Táe tanaa in bongkugon-Kudon in mogogagow bo moḷoḻimodmu.

YEHEZKIEL 16:31

Kon rawang in kotá bo kon pomuḷoi in daḷan pinoposindoganmu in tampat mita pososumbaan kon berhala bo sumundaḷ. Táe iko in deemanbí ná sundaḷ biasamai inta moparaḷu kon doit.

YEHEZKIEL 16:26

Mesir, topodiugmumai inta moḷoben in ibognea tua, ain noyotakinmu nosiug. Sinumontuonbí in iko nonuaḻing sinbá tumorú in Akuoi.

YEREMIA 29:10

Ki Tuhan in noguman, ‘Aka motompodon in wakutu pitu nopuḷú notaong kon Babel, yo bui-Ku in moiko indoian, bo mogintompod kon dandi-Ku modia kon i monimu mobui kon tampat tanaa.

ULANGAN 23:18

Ná doman tua in doit inta nouḻí kon pinosundaḷan tatua in diábí motaau in diaan kon Baḷoi i Tuhan Allahmu sin poguboḻi kon dandimu, sin kinodoíbí i Tuhan Allahmu in bobay sundaḷ kon kuil mita pososumbaan bo boḻi in pinosundaḷan.

YESAYA 23:15

Moiangoibí in wakutunea Tirus in koḻiongan kon bonu in pitu nopuḷú notaong, notongkai in umur in datu tobatú. Aka moitaḻibdon in sempo tatua, Tirus in nádon onda bo bobay sundaḷ kon bonu in dondong tanaa:

YESAYA 23:16

Gamádon in kecapi, ḻibudon in kotá, ei sundaḷ ḷaḻe inta kinoḻiongan! Kutidon in kecapi, podondongpa bui, sinbá iko in kotoropandon bui.

YEHEZKIEL 16:25

Iko in nopotaḷuidon in koḷoḷunatmu. Awakmu in pinonotogmudon kon bayongan in ḷoḷaki inta moitaḻib, bo diá mogoga-gogai iko in monuaḻing.

YEREMIA 25:11

Sinangkub in butá tanaa in pomayá-Kubí mako in morimumud bo mobaḻí moingongow. Bangusa mita kon diugneamai in mobantungbí kon i datu in Babel pitu nopuḷú notaong in koonggotnea.