YESAYA 15:2 - Alkitab Singog In Mongondow Masa In Tanaa

² Intau inta nogutun kon Dibon motakod kon buḷud sin mongombaḷ kon tampat pososumbaan kon dewa mita. Intau in Moab takin morobonoḷ in dodob mogamui kon kotá in Nebo bo Medeba. Mosia in nongarug kon uḷu bo kumi nobaḻí tomponuot kon norobonoḷ in dodob.

YESAYA 15:2 Referans Kwoze

YEREMIA 48:1

Naa inta pinoguman i Tuhan Inta Totok in mokawasa, Allah in Israel soaḷ Moab, “Moboditodon intau in kotá in Nebo, kotánea in noumpagdon! Kiryataim inagow, bo dindingnea inta morigon in irimumud, dá intau inta nogutun kon tua nooyádon;

IMAMAT 21:5

Imang tobatú diábí motaau tongá monggonsing kon tongosilai in buoknea bo diá doman motaau monggonsing kon kuminea ande monompaḻí kon awaknea takin ḷanit sin moponiata kon sia in koyogot kinopatoian.

YEREMIA 48:18

Ei intau in Dibon, poponagdon nongkon tampatmu inta ihoromat; ḻitúdon kon butá bo kon tudu in ḷobud. Sin ki inta momoguyaat kon butámu in noiyaputdon, bo morimumud kon bayongan in dindingmu.

YESAYA 3:24

Tanaa in mosia mopomaké in mongo bo mongobondu, moiduduimai mobongkogdon in bó monia. Togot in ogotan monia inta moaḷus baḷuianbí in uwoi inta mokasar. Buok in uḷu monia inta mogaga in bangkuḷuganbí. Ḷambung monia inta mongopia toḻiuanbí in inta nongoberak. Tanaa moḷunat in mosia; kon singgai moiduduimai pogot monia in diá mopia popisí in dinaḷóan.

ULANGAN 34:1

Bo ki Musa nonaḷámai kon rata in Moab bo notakod kon Buḷud in Nebo, kon tudu totok in Pisga kon dotá in pomukaan kon Yerikho. Kon tua pinoontong i Tuhan kon inia in bayongan butá tatua, inta: Butá in Gilead nopobayá ná utuan kinoyoyayú in kotá in Dan;

PINOGIAPAN 21:30

Táe naa in noyopúdon in buí monia, kon kinoouput in daḷan nongkon Hesybon nopobayá ná Dibon, nongkon Nasyim nopobayá in Nopah kon diug in Medeba.”

YEHEZKIEL 7:18

Mosia in mopomaké in kaeng karong bo bayongan in awaknea in gumugurbí. Uḷu monia in ḷogatanbí bo mosia in pokopooyáanbímai.

YEREMIA 48:31

Tuamai Akuoi in mongombaḷ totok sin moiko komintan bo popisí in intau mita kon Kir-Heres, ki iná in kotámu.

YEREMIA 47:5

Intau in Gaza kinoantugan in robonoḷ in gina moḷoben; intau inta kon Askelon in kibio-biómaidon. Modapot in toonu intau in Pilistin inta oyúonpa umuran mononogumatoi?

YEREMIA 7:29

Ki Tuhan in noguman, “Uḻe intau in Yerusalem, pononogumatoidon! Pongkódon in buokmu bo ḷumbúdon! Podondongdon in dondong oamui kon tudu mita in buḷud, sin Akuoi, ki Tuhan, koyogot in sinumorú bo ain nondoí kon i monimu komintan.

YESAYA 22:12

Kon tungkuḷ intua ki Tuhan Inta Totok in moḷantud bo Inta Totok in mokawasa nopotabá kon i monimu nongombaḷ bo nogamui, nongarug kon buok bo nogibintoḷ.

YESAYA 16:12

Intau in Moab iyumoyiga in notakod kon buḷud pobobogoian kon kuruban kon tampat pooibadaan monia sin mosambayang, táe diá in mangaḻenea.

YESAYA 16:7

Tuamai pomayádon mako in bangusa in Moab mosiamuian. Pomayádon mako in mosia in mongombaḷ aka mokotorop kon kaanon mopia inta kaanonmai monia kon kotá in Kir-Hareset. Pomayádon mako in mosia in kobuḻian in kamang bo mogamui.

YESAYA 15:3

Intau mita kon daḷan nogibintoḷ nobaḻí tomponuot nonogumatoi; intau nogamui bo nongombaḷ kon rawang bo kon tudu in atop in baḷoi.

YESAYA 14:31

Pogamuidon bo pomaḷúdon mopoigum in totuḷung, ei kotá mita in Pilistin! Kodoḻiokdon in moiko komintan popisí in moondok! Goḷom in ḷobud mokompoḷ nongkon utuan nobaḻí tomponuot kon kinoangoian in tontara in musung; diábí in moondok in kon sigad monia.

AYUB 1:20

Bo sinimindogdon in ki Ayub bo nomerak kon ḷambungnea nobaḻí tomponuot kon ponogumatoian. Nongarug in sia kon buoknea, bo sinumungkud

ULANGAN 14:1

“Moiko nion in umat i Tuhan Allahmu. Dá aka oyúon in kinopatoian, dikabí in moiko monompaḻí kon awak ande mokibangkuḷug in buok kon dotá in pogotmu ná oaid in bangusa mita ibanea.

PINOGIAPAN 32:38

Nebo, Baal Meon, bo Sebam. Kotá mita inta pinosindog bui monia tua binaḷuiandon monia in tangoinea.

PINOGIAPAN 32:3

“Butá in kotá mita in Atarot, Dibon, Yaezer, Nimra, Hesybon, Eleale, Sebam, Nebo bo Beon inta ain iḻitúan in Israel takin totuḷung i Tuhan, totuu mopia ponombobiagan. Bo popisí in bobiagon nami modamaḷ totok,

IMAMAT 13:40

Aka tobatú ḷoḷaki nobaḻídon noḷogat kon dotá in tuminea ande kon dotá in munanea, dá ḷogatnea tatua in diábí mokopopisí kon inia nonajis.

PINOGIAPAN 21:28

Nokoimontandon nobaḻí nongkon kotá tanaa tontara in Sihon nonubu naonda bo tuḷú. Inta nokorimumud kon kotá in Ar kon Moab, bo nongawasa kon buḷud mita inta kinoouput in Arnon.

SAMUEL 2 10:4

Bo ki Hanun in nodomok kon totabá mita i Daud tatua, nongarug kon kumi monia toḷosi, nomongkó kon pakeang monia nodapot in kayang, bodongka pinotabá nobui.

YEREMIA 3:21

Kon tudu in buḷud mita kinodongogan in dowawá; tua in singog in umat in Israel inta nongombaḷ bo noigum totok, popisí in mosia ain binaradosa, bo nokoḻiongdon kon i Tuhan Allah monia.

YEREMIA 47:2

Ki Tuhan in noguman, “Indoiai, tubig in moiḻig nongkon utuan bo moiḻebet naonda bo ongkag inta koyogot in modunuk nondangat kon butá bo tombonunea, kotá mita takin intau inta nogutun kon bonunea. Intau in momaḷúbí mokituḷung bo bayongan in rayat mogayow.

YEREMIA 48:35

Pogogaion-Ku intau in Moab in motubá kon kuruban kon tampat mita pososumbaan monia bo mogogai in moposumba in kuruban kon dewa mita monia. Akuoi, ki Tuhan, ain nosingog.

YEHEZKIEL 27:31

Popisí in iko dá nokibangkuḷug in mosia, nomaké in kaeng karong tomponuot in morobonoḷ in gina. Nongombaḷ totok in mosia bo nogamui kon ukurmu.

YEHEZKIEL 30:2

“Ei intau ilo-ilow, ponoḻindapdon bo potaaudon kon bangusa mita in Mesir onu inta poguman-Ku, Tuhan Inta Totok in moḷantud kon i monia. Pomaḷúdon bo pogamuidon: Adodoia! Singgai i Tuhan in nodiugdon! Ḷagidon in Sia mopobayá in oaidan-Nea. Singgai tatua in mosindip bo nonggoḷom, kon dodai in bangusa mita motarima kon hukuman.

AMOS 8:10

Porameanmu mita in baḷuian-Kubí mobaḻí kopatoian, bo dondongmu mita in mobaḻí amui. Baḻíon-Kubí in moiko mongarug kon buokmu bo mopomaké in kaeng karong saḷaku tomponuot kon morobonoḷ in gina. Moiko in mobaḻíbí naonda bo ki amá bo ki iná inta nongombaḷ kon kinopatoian i adínea inta tongá totobatú. Singgai tatua in mopaḷutbí táe totok in mokorobonoḷ kon gina.”

TAWARIKH 1 19:4

Ki Datu Hanun in nodomok kon totabá mita i Daud tatua, bo kinarugan in tampeng monia, bo nomongkó kon ḷambung monia kinodapot in kayang, bo pinotabá in mosia minayá.

YEREMIA 49:3

Ei intau in Hesybon, pongombaḷdon sin kotá in Ai in norimumudon! Ei bobay mita in kotá in Raba, pogamuidon! Pogidaingdon in daing karong tomponuot kon morobonoḷ in gina. Poribatukdon magí mako sin motoboḻingo. Milkom dewamu in akutonbí pobayá in poḷumbúan moyotakin in imang mita bo pojabat mita in pomarentanea!