YEREMIA 8:12 - Alkitab Singog In Mongondow Masa In Tanaa

¹² Ei umat-Ku, sabanarnea in mustibí in moiko mooyá sin nogaidon kon bayongan inta mokooyá tua! Táe moiko in mobunod in pogot bo diá kooyá. Tuamai in moḷabúbí in moiko ná intau ibanea inta ain noḷabú; mopopatdon in ouman kinobiaganmu aka hukumon-Kudon in moiko.

YEREMIA 8:12 Referans Kwoze

YEREMIA 3:3

Tuamai in tubig nongkon ḷangit diá moḷabú, bo uyan kon sempo in pononubú diá doman moiango-angoi. Iko in naonda bo bobay sundaḷ, bo diá kotoguoyá.

YEREMIA 6:15

Mustibí in mosia tua mooyá sin nogaidon kon bayongan inta mokooyá tua. Táe mosia tua in nobunodon in pogot bo diá kooyá. Tuamai in moḷabúbí in mosia ná intau ibanea; modaitdon in ouman monia aka Akuoi mohukum kon i monia. Akuoi, ki Tuhan, ain nosingog.”

YESAYA 3:9

Dodia monia inta moḷoḷatú moponiata kon aid monia inta moraat. Koonto-ontong mako mosia in mogaid kon dosa naonda bo intau in Sodom dungkuḷmai. Mobodito in mosia! Mosia in mopoangoi in bodito kon i monia tontaní.

MAZMUR 52:7

Táe iko in yompatonbí i Allah modapot in mononoi; iko in dinomok bo pogarab nongkon baḷoimu, bo inggamáandon nongkon dunia in intau nobiag.

ZEPANYA 3:5

Táe ki Tuhan in oyúonpabí in kon kotá tatua; Sia in umuranbí mopobayá in onu inta mobanar bo diábí kon dodai in onda in inta moitaḷá. Pomuḷoi in doḷo-doḷom notantúbí kon Sia in mobogoi in inta moadil kon umat-Nea. Táe, intau inta diá nonotaau in inta moadil kon kotá tatua in umuranbí mogaid kon inta moraat bo diábí in oya-oyá mako.

MAZMUR 52:1

Kon i itoi in mododondong. Dondong topotundú i Daud,

ULANGAN 32:35

Ki Tuhan in motuḻíbí bo mohukum kon i monia, diádon moonggot bo mosia moḷabú moyopú; wakutu in kogoguyaatan monia diádon moonggot.

PILIPI 3:19

Intau mita natua in moputúbí, sin tuhan monia in sianbí monia, bo aid monia inta moromú tua duíonbí monia; sin tongábí bonu in dunia naa in umuran raion monia.

HOSEA 5:9

Israel in moyopúbí, sin noiangoidon in wakutunea mohukum kon inia. Indongogai, ei rayat in Israel, tua in notantúbí kon mobaḻí.

YESAYA 24:2

Bayongan intau in moiḷampangbí kon ukur inta motongkai: imang mita bo rayat, ata bo tuangnea, mopopotaḷui bo mototaḷui, moḷoḷuan bo inta nopoḷuan, nooyúon bo nobogá.

YEREMIA 6:21

Akuoi in mokopopisíbí kon intau mita tanaa moipintud bo moḷabú. Guyanga ḷoḷaki bo adí, yobayat bo topodiug komintanbí moyopú.”

YEREMIA 10:15

Berhala mita tatua diá koboḻi, patusbí in singkuḻeon bo poompáanmai. Aka moiangoi in wakutunea mosia in moyopúbí.

YEREMIA 44:10

Táe dapot in singgai naa moiko in doíbí tumonsiup. Moiko in diábí mohoromat kon i-Nakó bo diá nobiag podudui in hukum inta inogoi-Ku kon inimu bo mogoguyangmu.

YEHEZKIEL 23:18

Nopaḷut mako kon tua diádon inumado-adop in sia in sumundaḷ bo mopoontongdon in awaknea kon intau mita. Mobú in Akuoi in mokoontong kon inia, ná kobú-Ku mokoontong kon i guya-guyangnea.

KINOBAḺIAN 19:34

Nopoikoḷomai kon singgai, ki adínea guya-guyang noguman kon i ai-ainea, “Kogobíi akuoi ain nosiug takin i amá! Bain doḷom bo poinumon bui naton in ki amá dapot in moḷoḷangu bui. Bodongka iko mosiug takinnea. Bá kitada in tumpaḷadon mokouḻí kon adí.”

YEREMIA 14:15

Mosia in nopotaau kon pinodoyon kon tangoi-Ku butá tanaa in diábí koantugan in parang andeka gogoy, bokaka Akuoi in diábí nopotabá kon i monia noguman kon tua. Akuoi, ki Tuhan, in nopotaau kon inimu, Yeremia, onu in aidan-Ku kon nabi mita inta diá pinotabá-Ku tua. Ḻimodon-Ku in mosia pongin parang bo gogoy.

YEREMIA 23:12

Tuamai, daḷan monia in morondogbí bo mosindip, dá moipintud in mosia bo moḷabú. Akuoi in mopoangoibí in bodito kon i monia, aka moiangoidon in wakutunea mohukum kon i monia. Akuoi, ki Tuhan, ain nosingog.