YEREMIA 7:11 - Alkitab Singog In Mongondow Masa In Tanaa

¹¹ Degá inanggap monimu kon Baḷoi-Ku naa in pugad in mogogagow? Bayongan in oaidmu ain inontong-Ku.

YEREMIA 7:11 Referans Kwoze

YESAYA 56:7

“Moiko in diaan-Kubí mayá in Sion, mayá in tombuḷud-Ku inta motusi, bo ogoian-Ku in ḷunganga in gina kon Baḷoi pooibadaan-Ku. Kuruban mita inta pinosumba monimu kon mezbah-Ku in tarimaan-Kubí. Baḷoi-Ku in tangoionbí baḷoi pososambayangan in bayongan bangusa.”

MATIUS 21:13

Bo Sia in noguman kon i monia nanaa, “Aindon pinais kon Buk Motusi, ‘Baḷoi-Ku in tangoionbí Baḷoi Pososambayangan.’ Táe inaidanbí monimu pugad in mogogagow!”

MARKUS 11:17

Noiduduimai kon tua ki Yesus nobogoi in totundú kon intau mita kon tua. Sia in noguman, “Kon bonu in Buk Motusi ain pinais: Ki Allah in noguman, ‘Baḷoi-Ku in tangoionbí Baḷoi Pososambayangan in bayongan bangusa.’ Táe tanaa in binaḻí bidon monimu pugad in mogogagow!”

TAWARIKH 2 6:33

igumon mako nongkon tampat pinogutunan-Mu kon soroga moibogpa kaasí in Iko mokidongog bo mobogoi kon onu inta pinoigumnea. Pongin natua dá bayongan in bangusa kon dunia in monotaaudon kon ini-Mu bo motoindudui domandon kon ini-Mu ná umat-Mu Israel. Kotaauandon monia kon baḷoibí inta pinosindogku tanaa in tampat pooibadaan kon ini-Mu.

YOHANES 2:16

Bo Sia in noguman kon intau mita mopopotaḷui in paḷoma, “Tokodiadon komintan nongkon naa. Dikabí baḻíon monimu pasar in Baḷoi Amá-Ku!”

YEREMIA 23:24

Diábí tobatúmai in mokopogadop kon i-Nakó, sin Akuoi in oyúonbí kon bayongan tampat: kon soroga bo kon dunia.

IBRANI 4:13

Diábí tobatúmai in mahaḷuk in diá ontongon i Allah. Bayongan yagi-yagi komintanbí ontongon-Nea mako motarang kon tayowon-Nea. Bo mustibí tanggung jawab bo naton kon tayowon-Nea.

YEREMIA 29:23

Natuata in ukur monia popisí in nogaidon kon dosa mita moḷoben kon Israel: Mosia in nonuaḻing, bo nopomaké in tangoi i Tuhan sin mongonguman kon inta diá mita totuu. Tua in noyotoḻikud in ibog i Tuhan. Kinotaauan-Neabí in onu inta inaidan monia, bo sia tontaní in nobaḻí sakusi moḷawang kon i monia. Ki Tuhan ain nosingog.”

YEREMIA 2:34

Ḷambungmu in notamak in dugú in intau bogá bo in intau inta diá kotaḷá, deemanbí dugú in mononakow inta kinodomokan. Tongá umpaka natua,

YEREMIA 7:10

Naonda intua komintan inaidan monimu, moiko in mamangoi kon tayowon-Ku kon naa kon Baḷoi-Ku tontaní, bo moguman, ‘Moaman in kami!’ Onda intua moiko in mongingguputdon in mogaid kon inta moromú tua.

YEHEZKIEL 35:13

Ei bangusa in Edom, moambungangaḷ in moiko bo moḷoḷatú in singogmu kon i-Nakó. Dinongog-Ku bidon intua komintan.

YESAYA 1:12

Ki ine in nopotabá kon i monimu modia kon bayongan in sosumba tatua kon tungkuḷ in moiko mamangoi moibada kon i-Nakó? Ki ine in nopotabá kon i monimu mododondaḷoi magí mako kon Baḷoi Motusi-Ku?

DANIEL 9:18

Indongogaipa kaasí in kami, o Allah, ḷongowaipa in kami bo taridipa kaasí in roriga nami takin kinogoguyaatan in kotá inta sinangoi in tangoi-Mu. Kami in nosambayang kon ini-Mu deemanbí popisí in aid mita nami mopia, táe popisíbí in Iko in totok kototabi.