YEREMIA 6:21 - Alkitab Singog In Mongondow Masa In Tanaa

²¹ Akuoi in mokopopisíbí kon intau mita tanaa moipintud bo moḷabú. Guyanga ḷoḷaki bo adí, yobayat bo topodiug komintanbí moyopú.”

YEREMIA 6:21 Referans Kwoze

YESAYA 8:14

Popisí in Akuoi Totok in motusi, Akuoi in nobaḻí batu kopopintudan kon rayat in Yohuda bo Israel, bo poyogaḷap inta modomok kon intau in Yerusalem.

YEHEZKIEL 3:20

Aka intau inta mopia momangkoidon momia kon dosa, bo sia in potayow-Ku kon anib, dá sia in matoibí aka iko in diá mopotoingat kon inia. Sia in matoibí popisí in dosanea mita, bo aidnea mita inta mopia in diá bidon toropon-Ku. Táe totaau kon kinopatoiannea in moibaba kon inimu.

YEREMIA 13:16

Ki Tuhan Allahmu musti poḷantudonmu kon dodai in diápa in Sia mopoangoi in sindip, bo sioḷmu in moipintud kon buḷud, kon dodai in bayag inta inoḷatmu mako baḷuiannea mobaḻí sindip.

PETRUS 1 2:8

bo “Tuata in batu inta nobaḻí kopopintudan in intau, batu inta mokopopisí kon i monia moḷabú.” Mosia in moipintud sin mosia diá mopirisaya kon singog i Allah. Natuabí in sinantú i Allah kon i monia.

SURAT I PAULUS KON JAMAAT RUM 11:9

Ki Daud in noguman doman nanaa, “Pomayádon mako in rame monia tua mobaḻí naonda bo poyogaḷap kon i monia tontaní bo mobaḻí bubú inta koḷabúan monia bo morimumud!

SURAT I PAULUS KON JAMAAT RUM 9:33

Kon Buk Motusi ain pinais nanaa soaḷ batu tatua, “Tarukiradon in naa: Ain inukatan-Ku in Sion tobatú batu inta mokopopisí kon intau moipintud; tobatú batu moḷoben inta mokopopisí kon intau moidompaḷak. Táe intau inta mopirisaya kon i-Nia in diábí pokopooyáan-Neamai.”

YEHEZKIEL 5:10

Guyanga in mokaandon kon i adínea tontaní bo adí in mokaandon kon guyanganea. Natuata in pohohukum-Ku kon i monia, bo inta mobiagpa in porariton-Ku kon bayongan in tampat.

YEREMIA 21:7

Iko bo pogawaimu mita takin intau mita inta noisimparut kon parang, gogoy bo yampoi in takit, komintan pomayá-Ku mako in domokon i Datu Nebukadnezar bo in musung mita inta moibog moḻimod kon inimu. Ki Nebukadnezar in moḻimodbí kon i monimu komintan takin diá in ampung bo diá in tabi. Akuoi, ki Tuhan, ain nosingog.”

YEREMIA 18:21

Táe tanaa, Tuhan, biódon mako in adí mita monia matoi in gogoy andeka matoi kon poparangan. Biódon mako in bobay mita monia kobuḻian in buḷoi ḷoḷaki bo adí; biódon mako in ḷoḷaki mita matoi popisí in yampoi in takit bo intau moguod in matoi kon poparangan.

TAWARIKH 2 36:17

Ki Tuhan in nopogonú kon gina in datu in Babel sinbá monubu kon i monia. Ki datu tatua in noḻimod kon intau in Yohuda inta nongobagupa, noitakin doman in mosia inta kon bonu in Baḷoi Tuhan. Diábí in Sia nonotabi kon tobatúmai in intau, noguod andeka noguyang, ḷoḷaki andeka bobay, notakit andeka nosehat. Mosia komintan inogoi i Allah kon i datu in Babel.

IMAMAT 26:37

Moiko in moḷagui bo moyodangat, umpakabí diá in mogaḷow. Bo moiko in diábí mokosanggup monayow kon musungmu mita.

YEREMIA 8:12

Ei umat-Ku, sabanarnea in mustibí in moiko mooyá sin nogaidon kon bayongan inta mokooyá tua! Táe moiko in mobunod in pogot bo diá kooyá. Tuamai in moḷabúbí in moiko ná intau ibanea inta ain noḷabú; mopopatdon in ouman kinobiaganmu aka hukumon-Kudon in moiko.

YEREMIA 13:14

Bo mosia in poyodatongon-Ku. Nogurang bo noguod in pomiaan-Ku natua takin diábí in ampung. Mosia in yopúon-Kubí takin diábí in tabi andeka diábí in ampung. Akuoi, ki Tuhan, ain nosingog.”

YEREMIA 18:23

Táe iko, Tuhan, nonotaau kon bayongan inta sinomayá monia sin moḻimod kon inakó. Tuamai, dika mongampung kon i monia; dika momopat kon taḷá monia. Bongkugdon in mosia modapot in moḷabú. Aidaidon kon i monia podudui in torú-Mu.”

YESAYA 8:15

Mobayong in intau in moḷabú moipintud bo tompaḻían. Mosia in moibonubí kon bonu in poyogaḷap.”