YEREMIA 44:13 - Alkitab Singog In Mongondow Masa In Tanaa

¹³ Ná pinohohukum-Ku kon Yerusalem, yo natua doman in pohohukum-Ku kon i monia inta nogutun kon Mesir. Mosia in matoibí kon bonu in parang, popisí in gogoy andeka yampoi in takit.

YEREMIA 44:13 Referans Kwoze

YEREMIA 43:11

Ki Nebukadnezar in mamangoibí bo monaḷow kon Mesir. Bo intau mita inta ain sinantú kon matoi popisí in yampoi in takit in matoibí popisí in yampoi in takit. Mosia inta sinantú kon akuton saḷaku inta dinakop in akutonbí saḷaku intau dinakop, bo inta sinantú kon matoi kon bonu in parang in matoibí kon bonu in parang.

YEREMIA 11:22

Tuamai, ki Tuhan Inta Totok in mokawasa in noguman, “Akuoi in mohukumbí kon i monia! Intau mita moguod monia in matoibí kon parang, adí mita monia in matoibí in gogoy.

YEREMIA 42:18

Ná doman in Akuoi, ki Tuhan Allah in Israel nopobutak in torú bo rogi-Ku kon intau inta nogutun kon Yerusalem, yo natua doman in Akuoi mopobutak in rogi-Ku kon i monimu inta mayá in Mesir. Intau in mokoningkimbí in mokoontong kon i monimu; singkuḻeonbí in moiko, bo tangoimu in pakéonbí saḷaku kutukan. Moiko in diá bidon mokoontong bui kon butámu tontaní.”

YEREMIA 24:10

Akuoi in mopoangoibí kon i monia in parang, gogoy, bo yampoi in takit dá mosia komintan in matoi bo diá in kotaḷáan kon butá tanaa inta ain inogoi-Ku kon i monia bo kon mogoguyang monia.”

YEREMIA 21:9

Bayongan in intau inta mogutun kon bonu in kotá in matoibí popisí in parang, gogoy, andeka yampoi in takit. Táe mosia inta ḷumuai sin tumungkud kon intau in Babel inta koyogot in nonubu kon kotá tanaa, in kotaḻibanbí bo diá ḻimodon.

YEREMIA 42:16

“Parang bo gogoy inta kinoondok monimu tua in momatukbí kon i monimu modapot in Mesir, bo moiko in matoibí kon butá tatua.

YEREMIA 42:17

Bayongan in intau inta momakisa mayá in Mesir bo mogutun kon tua in matoibí kon bonu in parang, andeka matoi in gogoy andeka yampoi in takit. Diábí tobatúmai in moiḷagui nongkon bodito inta poangoi-Ku kon i monia; komintanbí matoi.

YEREMIA 24:9

Akuoi in mopoboditobí kon i monia námai tua modapot in bayongan in bangusa kon sinangkub in dunia mobaḻídon moondok. Kon ondakabí in pobogoian-Ku kon i monia, mosia in singkuḻeonbí, binaḻí kokosingan bo rebegonmai. Tangoi monia in pakéon mobaḻí kutukan.

HOSEA 9:6

Aka bodito moiangoi, bo moiko in diaan kon butá ibanea, dá inta kinotaḷáan kon sigad monimu in sipunonbí in intau mita in Mesir sin ḻimodon bo ḷobongon kon Mempis! Bonok bo dugi in mobiagbí moikoḷob kon tampat mita inta pinobaḷoianmu koḻipod bo pakakatmu mita saḷaka inta koboḻi.