YEREMIA 34:16 - Alkitab Singog In Mongondow Masa In Tanaa

^16-19 Pojabat mita in pomarenta in Yohuda bo Yerusalem takin pogawai mita in komaḻig, imang mita bo bayongan in moḷoḷukad kon butámu ain noposah kon dodandian tatua poḷat noratá kon sapi, pinongkó doyowa, bo minayá kon sigad in doyowa nopongkó tatua. Táe, onda intua nobaḷui in raian monimu bo noningkuḻe kon i-Nakó. Ata mita inta ain pinoḷuat monimu podudui in ibog monia, ginamá bui monimu bo pinakisa nobaḻí ata bui. Tuamai, Akuoi, Tuhan, moguman kon moiko in iḻimimpatdon kon parenta-Ku, bo diá dinumudui kon saratnea mita, sin moiko in diábí nopoḷuat kon tumpaḷa bangusamu Israel. Yo, maníka Akuoi in mobogoi in kabebasan kon inimu: Kabebasan matoi kon poparangan andeka yampoi in takit andeka in gogoy. Akuoi in mopomiabí kon i monimu ná moiko nopomia kon sapi inta iratá monimu tatua. Pomiaan-Kubí in bayongan bangusa kon dunia mokoningkim in mokoontong kon onu in inaidan-Ku kon i monimu.

YEREMIA 34:16 Referans Kwoze

IMAMAT 19:12

Dika modandi podoyon kon tangoi-Ku aka moiko komakusud kon diá mogintompod kon dandi monimu tatua, sin oaid monimu tatua mopoompábímai kon tangoi-Ku. Akuoi in ki Tuhan Allahmu.

YEHEZKIEL 18:24

Táe aka intau mopia bo diádon mogaid kon inta mopia, modapotbí in momangkoidon momia kon inta moraat bo bayongan in aid inta mokorongó inta biasamai aidan in intau moraat, yo degá umuran in sia mobiag? Diá! Nongkon bayongan in aidnea inta mopia yo diá bidon tobatúmai in toropon bui. Sia in matoibí popisí in nogaidon kon dosa bo diá motoindudui kon i-Nakó.

YEHEZKIEL 3:20

Aka intau inta mopia momangkoidon momia kon dosa, bo sia in potayow-Ku kon anib, dá sia in matoibí aka iko in diá mopotoingat kon inia. Sia in matoibí popisí in dosanea mita, bo aidnea mita inta mopia in diá bidon toropon-Ku. Táe totaau kon kinopatoiannea in moibaba kon inimu.

YEREMIA 34:11

Táe noiduduimai nobaḷui in raian monia, bo nogamá bui kon ata mita tatua, bo nomakisa kon i monia nobaḻí ata bui.

IḶUAIAN 20:7

Dika morotag kon tangoi-Ku, sin Akuoi, ki Tuhan Allahmu, in mohukumbí kon i ineka inta mopomia ibo-ibog kon tangoi-Ku.

SAMUEL 1 15:11

“Nomanasaḷdon in akuoi sin noduídon kon i Saul nobaḻí datu, sin sia in nonoḻikudon kon i-Nakó, bo doídon dinumudui kon parenta-Ku.” Noajar totok in gina i Samuel, bo kinoouputbí in doḷom sia nopoigum in totabi kon i Tuhan.

MALEAKHI 1:12

Táe moiko in moningkuḻebí kon i-Nakó sin kainimu kamai in mezbah-Ku in diábí in mangaḻenea, bo moposumba kon tua in kaanon inta kinodoí monimu.

MALEAKHI 1:7

Pinongin in nopokuruban in kokaanon inta diá patus pokuruban kon tudu in mezbah-Ku. Bo moiko in moḻibó ‘Naonda in pinononingkuḻe nami kon ini-Mu?’ Pinongin noporaa-raatmai kon mezbah-Ku.

YEHEZKIEL 39:7

Táe kon yua-yuak in intau in Israel, poniata-Kubí in tangoi-Ku inta motusi, bo tangoi-Ku tatua in diá bidon tamakon bui. Dá kotaauandon in bangusa mita kon Akuoibí in ki Tuhan, Allah inta motusi nongkon Israel.”

YEHEZKIEL 20:39

Ki Tuhan Inta Totok in moḷantud in noguman, “Ei intau mita in Israel, tanaa in taaudon kon inimu. Kumudungdon in mogaid kon dosa pongin mosumba kon berhalamu mita! Táe toropdon kon naonda in mopaḷut mako kon tua moiko in mustibí tumoḷutui kon i-Nakó bo diádon moporaa-raatmai kon tangoi-Ku inta motusi pongin modia kon sosumba kon berhalamu mita tatua.

YEHEZKIEL 13:22

Intau mita mopia inta diá pomiaan-Ku ibo-ibog, in ginogondokdon monimu takin ouman uboḷmu. Intau mita moraat duíon monimu sinbá umuran mogaid kon dosa bo diá posaḷamaton.