YEREMIA 32:21 - Alkitab Singog In Mongondow Masa In Tanaa

²¹ Pinongin kawasa bo ropot-Mu inta moḷoben Iko in nodia kon umat in Israel iḻumuai nongkon Mesir. Iko in nogaid kon inta mujizat mita bo inta mokoherang bo aid mita inta mokodoḻiok kon musung.

YEREMIA 32:21 Referans Kwoze

ULANGAN 26:8

Takin kawasa bo ropot inta moḷoben Iko nopoḷuai kon i nami nongkon Mesir. Iko nogaid kon mujizat mita bo inta mokoherang mita poḷat nopomuká in aid mita inta nokodoḻiok kon musung.

IḶUAIAN 6:6

Moiko in baḻíon-Ku umat-Ku, bo Akuoi in mobaḻí ki Allahmu. Dá kotaauandon monimu kon Akuoi naa in ki Tuhan, Allahmu, inta nopoḷuat kon i monimu nongkon pinononggataan kon Mesir.

MAZMUR 105:43

Dá inatod-Nea in umat-Nea takin pia in gina, intau mita inta piniḻí-Nea takin giow sanang in gina.

MAZMUR 105:37

Onda intua bangusa in Israel inatod-Nea iḻumuai, mosia in nodia kon buḷawan bo saḷaka; komintan nosehat bo noropot.

TAWARIKH 1 17:21

Kon sinangkub in dunia naa diábí in bangusa in ná Israel. Israel in bangusa tobatú inta pinoḷuat-Mu nongkon pinononggataan sin baḻíondon umat-Mu tontaní. Bayongan oaidan moḷoben bo inta mokoherang inta Inaidan-Mu kon i monia nokobaḻídon kon tangoi-Mu ponango-nangoian kon sinangkub in dunia. Pinoḷuat-Mu in umat-Mu nongkon Mesir, bo nopoguntun in bangusa mita ibanea kon tungkuḷ in umat-Mu minayá noparang.

ULANGAN 4:34

Dodai in onda in oyúon in ilah tobatú inta nobarani nogamá kon bangusa tobatú nongkon bangusa mita inta oyúon bodongka binaḻí umatnea tontaní, ná inta inaidan i Tuhan Allahmu kon inimu kon Mesir? Inontongdon monimu tontaní naonda in ki Allah takin ropot inta moḷoben nopoangoi in bodito bo parang, nomia kon inta mokoherang mita bo nomia kon soaḷ mita inta motoyang totok.

IḶUAIAN 13:14

Aka kon singgai moiduduimai ki adímu moḻibó onu in mangaḻe in tua komintan, yo nanaa in pototubag monimu, ‘Takin kawasa inta moḷoben, ki Tuhan nodia kon i naton iḻumuai nongkon butá in Mesir, tampat pinononggataan kon i naton.

IḶUAIAN 13:9

Porayaan tanaa nobaḻí tompoingat kon inimu ná tomponuot inta pinopotogot kon ḻima ande kon pogotmu. Porayaan tanaa moponorop kon i monimu sinbá umuran moposingog bo monotaau kon hukum mita i Tuhan, sin ki Tuhan nopoḷuaidon kon i monimu nongkon Mesir takin kawasa-Nea inta moḷoben.

IḶUAIAN 6:1

Ki Allah in noguman kon i Musa, kai-Nia, “Akuoi naa in ki Tuhan.

ULANGAN 7:19

Toropdon in bodito mita inta motoyang inta inontong monimu tontaní, soaḷ mita inta mokoherang, bo ropot inta moḷoben inta pinaké i Tuhan Allahmu sin mopoḷuat kon i monimu. Ná doman in popoaid i Tuhan Allahmu kon bayongan bangusa inta kinoondok monimu.

SAMUEL 2 7:23

Kon dunia naa in diábí in bangusa ná Israel. Tongábí Israel tuata in bangusa inta ain pinoḷuat-Mu nongkon pinononggataan sin mobaḻí umat-Mu tontaní. Bayongan in aid moḷoben bo inta mokoherang inta pinomia-Mu kon i monia, mopobaḻí kon tangoi-Mu ponango-nangoian kon dunia. Bangusa mita ibanea takin dewa mita monia aindon inuntun-Mu kon tungkuḷ in umat-Mu minayá noparang.

IḶUAIAN 3:20

Táe Akuoi mopomakébí in kawasa-Ku, bo mohukum kon Mesir takin mopoangoi in bayongan inta mokoondok kon tua. Mopaḷut mako in tua, ogoineadon in moiko mobuat nongkon tua.

ULANGAN 11:3

bo inta mokoherang mita inta pinomia-Nea. Moiko ain nokoontong tontaní onu inta ain pinomia-Nea kon i datu in Mesir bo kon bayongan in butánea.

YESAYA 63:12

Kon onda in ki Tuhan inta koyot-yotakin i Musa takin ḻima-Nea inta moropot motorindog, bo nomotak kon tubig kon tayowon monia sinbá tangoi-Nea in kotaauandon modapot in mononoi?