YEREMIA 29:8 - Alkitab Singog In Mongondow Masa In Tanaa

⁸ Akuoi ki Tuhan, Inta Totok in mokawasa, Allah in Israel, mopotoingat kon i monimu sinbá diá mopomayá mako in awakmu koakaḷan in nabi mita inta nogutun kon yuakmu andeka i inekadon inta noguman kon mosia in mokotoḷanow kon singgai moiduduimai. Dika moindoimai kon togoindop mita monia.

YEREMIA 29:8 Referans Kwoze

EPESUS 5:6

Donaai in moiko koakaḷan in singog mita inta diá in baragunanea. Sin soaḷbí mita natua inta mokopomuká kon sakí in gina i Allah kon intau mita inta diá motoindudui kon i-Nia.

YEREMIA 5:31

nabi mita in monguboḷ, imang mita mogundoi podudui in ibognea tontaní bo moiko umat-Ku in moibog doman kon natua. Táe onu in aidan monimu aka moiangoidon in singgai imbuitnea?”

TIMOTIUS 2 3:13

Intau mita moraat bo mongouboḷ in kodugang-kodugangdon in koromú monia. Mosia in umuran monguboḷ kon intau ibanea, táe diábí kinotaauan monia kon mosia tua in kino akaḷanbí doman in intau ibanea.

YEREMIA 28:15

Tua komintan in pinotaauku kon i Hananya, bo akuoi in noguman doman bui, “Indongogai, ei Hananya! Ki Tuhan in diábí nopotabá kon inimu; iko in nomaḻídon kon bangusa tanaa nopirisaya kon tosingogon uboḷ.

YEREMIA 27:9

Dikadon mokidongog kon nabi mita andeka ki ineka doman inta mongampag kon i monimu mokiompu kon i datu in Babel, umpaka in mosia ain nongaku kon notarimadon kon topotundú nongkon togoindop, dimukud mita, andeka nopomaké in totaau mita.

YEREMIA 14:14

Táe ki Tuhan in notubag, “Nabi mita tatua in nopotaau in habar uboḷ pinodoyon kon tangoi-Ku; Akuoi in diábí nopotabá kon i monia, bo diábí doman nomarenta andeka noyosingog monia. Oontongon mita inta inouman monia in deemanbí nongkon i-Nakó; mosia in nonoḻindap kon soaḷ mita inta diá in mangaḻenea inta sinontuon inaidan monia tontaní.

WAHYU 19:20

Mahaḷuk tatua in kinodomokan takin intau mita inta morongaku nabi táe deemanbí totuu nabi inta ain norogaid kon soaḷ mita inta mokoherang kon tayowon mahaḷuk tatua. (Takin aid mita monia inta mokoherang tatua, mosia nonguboḷ kon i monia inta ain notarima kon tanda in mahaḷuk tatua bo inta ain nosumba kon patongnea.) Bo mahaḷuk tatua takin intau mita inta deeman totuu nabi tumpaḷa pinogambat kon bonu in tuḷu moḷoben inta kodoko-dokot takin balerang.

WAHYU 13:14

Bo bayongan in intau inta nobiag kon dunia naa akaḷannea in aidnea inta pinomianea kon tayowon in mahaḷuk inta muna tatua. Mosia in pinoki aidannea in patong mahaḷuk inta ain kinekeban in pitow, táe umuranpa nobiag.

TESALONIKA 2 2:3

Naondakadon in habar dinongog monimu, yo donaaibí baḷú kopongaruan monia in moiko, sin tongábí uboḷ i monia inta moibog mopongaru kon intau ibanea. Sinbá kotaauandon monimu, kon wakutu in diápa moiangoi in singgai tatua, munapabí nanaa in mobaḻí: Mobayong in intau mobaḷui in pirisaya bo monaḷámai kon i Kristus; bo intau moraat inta ain sinantú tumuot kon naraka in mamangoidon mopoontong in oaid monia.

SURAT I PAULUS KON JAMAAT RUM 16:18

Sin intau mita inta momia kon natua, deemanbí mogaid sin kopontingan i Kristus inta Tuhan naton, táe tongábí motayak kon kasanangan in gina monia tontaní. Dondouḷug bo singog monia moaḷus inta kodongogan tua in tongábí pakéon monia monguboḷ kon intau mita inta diápa nonotaau in onu bo onu.

LUKAS 21:8

Ki Yesus in noguman, “Mokopoingatdon, sinbá moiko in diá koakaḷan. Moantó in intau in mamangoi momaké in tangoi-Ku bo moguman, ‘Akuoi in Sia!’ bo ‘Wakutuneadon.’ Táe dikabí indongogan monimu in mosia.

LUKAS 6:26

Koboditodon in moiko aka komintan intau bo moduí kon inimu; sin natua doman in mogoguyang monia noduí kon nabi mita inta deeman totu-totuu nabi tungkuḷ intua.”

MATIUS 24:24

Sin oyúon in mongaku ki Mesias bo mongaku nabi táe mosia tua intaubí mongongakaḷ, tongá mosia in mogaid doman kon tanda mita inta moḷoben bo soaḷ mita inta mokoherang sahingga in aka mobaḻí, yo mosia in mokoakaḷ doman kon intau mita inta ain piniḻí.

ZAKHARIA 13:4

Kon singgai tatua, nabi mita in angoianbí in oyá in mogaid naonda bo nabi. Mosia in diá bidon mogiḷambung in nabi sin monguboḷ bo dumodia kon oontongon monia.

MIKHA 2:11

Koibog monimu in nabi inta moibog monguboḷ bo mongakaḷ poḷat monoḷanow kon moiko in mokouḻíbí kon anggur bo oinumon inta mokoḷoḷangu inta mobayong totok.”

YEREMIA 23:21

Ki Tuhan in noguman, “Totokbí in mogaid in nabi mita tatua, bokaka mosia in diábí pinotabá-Ku. Podoyon kon tangoi-Ku in mosia mopotaau in habar, bokaka diábí in koyow in inogoi-Ku kon i monia.

EPESUS 4:14

Dá kita in diábí naonda bo mongoadí mita inta pinoyaying magí-mako in noyagi-yagimai in totundú in intau mita inta mongomunapik. Mosia tua in mongonguman kon diá totuu sin mopotaḷá kon onu inta noitutui.

YEREMIA 23:27

Kai monia kamai dá pinongin togoindop mita inta inouman monia tua, umat-Ku in mokoḻiongbí kon i-Nakó ná mogoguyang monia nokoḻiong kon i-Nakó bo nosumba kon Baal.

YOHANES 1 4:1

Utat mita inta kotabiku! Donaaibí mogampang kinopiri-pirisayanea kon intau mita inta mongaku kinawasa in Roho i Allah, táe ujipa muna in mosia tua sinbá kotaauandon monimu mongo roho kon i monia tua nongkon i Allah andeka deeman. Sin nobayongdon intau in maya-mayá mako bo mongaku nabi bokaka deemanbí totuu nabi.

YEREMIA 23:25

Bayongan inta siningog in nabi mita tatua in kinotaauan-Ku bidon. Pinodoyon kon tangoi-Ku mosia in nonguboḷ kon koyow-Ku in sinarimadon monia pinongin togoindop.

YEREMIA 29:1

Akuoi in nomais kon surat kon imang mita, nabi mita bo itoi mita in bangusa inta nobiagpa, bo kon bayongan intau ibanea inta ain inakut i Nebukadnezar nongkon Yerusalem pinobayá in Babel.

YEREMIA 29:21

Ki Tuhan Inta Totok in mokawasa, Allah in Israel, ain nosingog soaḷ ki Ahab ki adí ḷoḷaki i Kolaya, bo soaḷ ki Zedekia ki adí ḷoḷaki i Maaseya inta nomaké in tangoi i Tuhan sin mopotaau kon inimu in soaḷ mita inta diá totuu. Ki Tuhan in noguman kon Sia in moposarakanbí kon i monia kon kawasa i Nebukadnezar datu in Babel inta moḻimod kon i monia kon tayowonmu.

YEREMIA 29:23

Natuata in ukur monia popisí in nogaidon kon dosa mita moḷoben kon Israel: Mosia in nonuaḻing, bo nopomaké in tangoi i Tuhan sin mongonguman kon inta diá mita totuu. Tua in noyotoḻikud in ibog i Tuhan. Kinotaauan-Neabí in onu inta inaidan monia, bo sia tontaní in nobaḻí sakusi moḷawang kon i monia. Ki Tuhan ain nosingog.”

YEREMIA 37:9

Akuoi, ki Tuhan, mopotoingat kon i monimu, sinbá dika monompobaḻik kon awakmu tontaní takin morai kon intau in Babel ain minayá bo diádon mobui mangoi. Sin notantú bidon kon mosia in mobuibí mangoi.

OMBAḶ 2:14

Inta pinotaau in nabi mita kon inimu, tongábí tompobaḻik bo uboḷ komintan. Mosia in diábí kon dodai in onda in nobuká kon dosamu, manangka intua iko in diábí notobat. Noyotoḻikud kon tua yo mosia in tongábí mopotaau kon inimu in tosingogon mita uboḷ inta mokosanang.

YEHEZKIEL 13:6

Oontongon mita monia in diábí totuu bo toḷanow mita monia in tongábí uboḷ. Mosia in tumangoi kon nodia kon koyow nongkon i-Nakó, bokaka Akuoi in diábí nokoimontanmai in nopotabá kon i monia. Yo naondabí in pongongamang monia kon mobaḻí in toḷanow monia?

YEREMIA 23:16

Kon intau inta nogutun kon Yerusalem, ki Tuhan Inta Totok in mokawasa noguman, “Dika indongogan in tosingogon in nabi mita inta umuran tongá mobogoi in kamang inta diá in mangaḻenea. Mosia in tongábí mopotaau in onu in inta kon raian monia tontaní bo deemanbí koyow-Ku.

YEREMIA 29:15

Podudui kon i monimu, ki Tuhan ain nobogoi in nabi mita kon Babel.