YEREMIA 23:13 - Alkitab Singog In Mongondow Masa In Tanaa

¹³ Dosa in nabi mita in Samaria ain inontong-Ku. Mosia in nosingog podoyon kon tangoi i Baal, bo mopoḷaḻe kon Israel, umat-Ku.

YEREMIA 23:13 Referans Kwoze

YEREMIA 2:8

Imang mita diá in moḻibó kon onda in Akuoi, Tuhannea. Intau mita inta nokadai kon hukum in diá doman nonotaau mongo ki ine in Akuoi, mongongawasa mita in nomarontak kon i-Nakó. Nabi mita in mosingog podoyon kon tangoi in Baal, bo nosumba kon berhala inta diá in baragunanea.”

YESAYA 9:16

Bangusa tatua ain nonaḷámai kon Tuhan bo moromúdon bo bayongan in tosingogon monia moraat. Tuamai in kon sigad in tayow mobiag mita diá tobatúmai in sinaḻiban i Tuhan. Sia in diábí notabi kon boba-bobay mita bo uno-unon. Táe ki Tuhan in sinumorúpabí bo umuran mohukum.

TAWARIKH 2 33:9

Ki Manasye nokopopisí kon rayat in Yohuda nogaid kon dosa mita inta moraa-raat nongkon dosa inta inaidan in bangusa mita inta pinoguntun i Tuhan nongkon Kanaan kon tungkuḷ in umat i Tuhan sinumuot kon butá tatua.

DATU MITA IMITÁNEA 18:40

Dá nogumandon in ki Elia, “Domok in nabi mita in Baal tatua! Dika pomayá mako in tobatúmai in mokoḷagui!” Bo intau mita in nodomokdon kon nabi mita in Baal tatua, onda intua dinia i Elia in mosia kon Ongkag in Kison bo iḻimodnea kon tua in mosia komintan.

YEREMIA 23:32

Akuoi, ki Tuhan, in moḷawangbí kon nabi mita tatua inta nopotaau in togoindopnea mita inta nopuḻing in uboḷ. Mosia in nopoḷangkam in umat-Ku pinodoyon kon uboḷ bo ambungangaḷ monia. Akuoi in diábí nopotabá kon nabi mita tatua. Mosia in beresibí diá baraguna kon umat-Ku. Akuoi, Tuhan, ain nosingog.”

YEREMIA 36:2

“Gamádon in ḻitodan in buk tobatú, bo paisdon kon tua in bayongan inta ain pinoguman kon inimu soaḷ Israel bo Yohuda, soaḷ bayongan in bangusa. Paisdon in bayongan tosingogon-Ku pinangkoi kon dungkuḷ totok Akuoi nosingog kon inimu kon tungkuḷ in pinomarentaan i Datu Yosia nodapot in singgai naa.

HOSEA 4:11

Ki Tuhan in noguman, “Ei umat-Ku, pinomayá anggur noonggot andeka anggur nobagu nonginggamádon kon pandoimu morai motoratakmai.

HOSEA 4:12

Moiko in mopoigum in topotundú kon kayu topongkó! Tungkud tobatú in mopotaau kon inimu kon onu inta koibogmu kotaauan! Moiko in notongkai in buḷoi bobay tobatú inta nobaḻí sundaḷ; moiko in nonaḷámai kon i-Nakó bo nobogoi in awakmu kon ilah mita ibanea.

MIKHA 1:5

Bayongan tua in mobaḻíbí popisí in intau in Israel binaradosa bo nomarontak kon i Allah. Ki ine in nokopopisí kon Israel binaradosa? Tuata in Samaria inta ki iná in kotánea tontaní! Ki ine in nokopopisí kon Yohuda nosumba kon berhala? Yerusalembí tontaní ah!