YEREMIA 22:23 - Alkitab Singog In Mongondow Masa In Tanaa

²³ Moiko in mogutun moaman iḻibu in oigi mita in kayu ḷokuyú in Libanon, táe kon singgai moiduduimai aka moiko kotugatan in inta mokonakit, moiko in mororigabí naonda bo bobay inta koyogot in mononggadí.”

YEREMIA 22:23 Referans Kwoze

YEREMIA 6:24

Nokodongog kon habar tatua, intau mita in Yerusalem kinodaitandon in daya. Mosia in inangoian in ondok, bo nororiga naonda bo bobay inta mononggadí.

YEREMIA 22:6

Bo kon i-Nakó yo komaḻig in datu in Yohuda in totuubí kon mogaga, ná kogaga in butá in Gilead bo buḷud mita in Libanon; táe tampat tatua in baḻíon-Kubí naonda bo padang gurun inta diá inutunan in intau.

HABAKUK 2:9

Kinutukdon in iko! Iko in mopooyúon in motoḷuadímu pongin kauntungan inta nouḻímu pinodoyon kon aid moḻingá, sinbá baḷoimu tontaní in moodom bo moiḷagui nongkon susa bo bodito.

OBAJA 1:4

Umpakabí pomiaanmu in baḷoimu ná koḷantud in pugad in ḷagapan boniá, bo ná koḷantud in tundi mita kon ḷangit, yo iko in notantúbí kon pogonag-Ku.

AMOS 9:2

Umpakabí mosia tumuot kon dunia in intau minatoi, singkapon-Kubí in mosia. Umpakabí moponik kon ḷangit, poponagon-Kubí in mosia nongkon tua.

HOSEA 7:14

Mosia in diábí totu-totuu mosambayang kon i-Nakó. Aka mosia mosambayang, mosia in umobatbí kon tosiugan monia, bo mogamui naonda bo onu inta inaidan in intau mita inta diá mopirisaya kon i-Nakó. Aka mosia mosambayang moigum kon gandum bo anggur, mosia in monongkekeb kon awak ná inta inaidan in intau mita inta nosumba kon dewa. Mosia in totu-totuubí kon moḷawang kon i-Nakó.!

HOSEA 5:15

Umat-Ku in taḷaan-Kubí modapot in roriga kon i monia tugatdon popisí in dosanea mita, bo mamangoi sin motayak kon i-Nakó. Degá kon bonu in roriganea, mosia in moḷongasi moyodungkuḷ-Ku.”

YEREMIA 49:16

Iko in koakaḷanbí in aidmu inta mododia. Diábí in moondok kon inimu ná kainimu. Iko in mogutunbí kon sigad mita in batu, kon tudu in buḷud. Táe, umpaka inaidanmu in baḷoimu kon tampat inta moḷantud totok, ná koḷantud in pugad in ḷagapan boniá, yo poponagonbí doman i Tuhan in iko nongkon tua. Ki Tuhanbí in noguman kon tua komintan.”

YEREMIA 48:28

Moiko intau in Moab, taḷaaidon in kotámu mita bo pogutundon kon tombuḷud in batu ná ḷagapan paḷoma nogaid kon pugadnea kon bingkí in irang.

YEREMIA 21:13

Onda intua ki Tuhan in noguman kon Yerusalem, “Ei Yerusalem! Kinoukatanmu in moḷantu-ḷantud in ḷopá mita kon diugmumai. Iko in naonda bo buḷud batu irib kon rawang inta notondodai, táe Akuoi in moḷawangbí kon inimu. Iko in moguman kon diábí tobatúmai in intau in mokotubu kon inimu andeka mokodangat kon dindingmu mita,

YEREMIA 3:21

Kon tudu in buḷud mita kinodongogan in dowawá; tua in singog in umat in Israel inta nongombaḷ bo noigum totok, popisí in mosia ain binaradosa, bo nokoḻiongdon kon i Tuhan Allah monia.

PINOGIAPAN 24:21

Kon bonu in pinosindapan tatua ki Bileam nokoontong kon buí i Keni, bo nopotaau in tosingogon tanaa, “Tampat pinogutunanmu tua in totuu kon morigon, naonda bo pugad kon tudu in buḷud batu.

YEHEZKIEL 17:3

inta koibog-Ku ki Tuhan Inta Totok in moḷantud poguman kon i monia: Oyúon in ḷagapan boniá moḷoben tobatú inta mogaga in bubuḷnea bo kokoḻikipan mooḷad bo moropot. Iḷumayug in sia ná buḷud in Libanon, nomutoḷ kon tubu in pangkoi in ḷokuyú totanga,