YEREMIA 17:3 - Alkitab Singog In Mongondow Masa In Tanaa

³ bo kon buḷud mita kon ḷuai in kotá. Sin bayongan in tampat pososumbaan kon berhala inta ain pinosindog monimu kon sinangkub in butá bo popisí in bayongan dosa inta ain inaidan monimu, dá baḻíon-Ku in musungmu mita mogakut kon bayongan in kapunyaan bo kaoyúonanmu.

YEREMIA 17:3 Referans Kwoze

YEREMIA 15:13

Ki Tuhan in noguman kon inakó, “Akuoi in mopotabábí kon musung sin mogakut kon kaoyúonan bo kapunyaan in umat-ku nobaḻí hukuman kon dosa mita inta ain inaidan monia kon sinangkub in butá.

YEREMIA 26:18

“Kon tungkuḷ in ki Hizkia nobaḻí datu in Yohuda, ki Nabi Mikha nongkon Moresyet nopotaau kon rayat in koyow tanaa nongkon i Tuhan Inta Totok in mokawasa, ‘Sion in pajekoon naonda bo gobá in tudunea, Yerusalem in mobaḻí pinosipunan kon apug, bo tombuḷud in Baḷoi Tuhan in mobaḻídon kayuon.’

DATU MITA 2 24:13

Bayongan in pakakat buḷawan inta pinomia i Datu Salomo sin pakéon kon Baḷoi Tuhan, pinoguraat i Nebukadnezar. Bo bayongan in pakakat inta koboḻi inta kon bonu in Baḷoi Tuhan tatua bo kon komaḻig in dinianea minayá in Babel. Bayongan intua nobaḻí noidudui kon onu inta ain siningog i Tuhan muna.

MIKHA 3:12

Popisí in aid moraatmu tatua, dá Sion in pajekoon naonda bo gobá, Yerusalem in mobaḻí bontuyungan in apug, bo tombuḷud in Baḷoi Tuhan in mobaḻídon kayuon in bo bonganga.

YEHEZKIEL 16:39

Ogoi-Ku in iko kon inta kinotabimu mita tatua, bo umpagon monia in tampat mita pinosundaḷan bo pinosumbaanmu kon berhala. Bayongan in pakeang bo ḷambámu in agowonbí monia, modapot in mopilang in iko.

YEHEZKIEL 6:3

Pokiindongogaidon in mosia bo pokitaridiai kon onu in poguman-Ku, ki Tuhan Inta Totok in moḷantud kon buḷud mita tatua, bo kon tombuḷud doman mita, kon irang mita bo kon ḷopá mita. Totuu, Akuoi in mopoangoibí in kedang sin morimumud kon pososumbaan kon berhala.

OMBAḶ 1:10

Bayongan in kapunyaannea ain inagow in musungnea mita. Nodapot in sia in nokoontongbí tontaní in sinuotan monia kon bonu in Baḷoi i Allah, aid tobatú inta kinodoí i Tuhan aidan in intau inta deeman umat-Nea.

YEREMIA 12:12

Nongkon ḷoḷan in padang gurun kon buḷud, intau mita mamangoi sin mogagow. Akuoi in nopoangoi in parang sin momoguyaat kon bayongan in ḻipú dá diádon tobatúmai in mobiag modame.

YESAYA 27:9

Táe dosa mita in Israel in tongábí motaau ampungan aka mezbah in dewa mita giḻingon koyimokon naonda bo silon. Bayongan in pototubáan kon dupa bo lambang i Dewi Asyera in rimumudon doman.

IMAMAT 26:30

Rimumudon-Kudon in tampat mita pososumbaanmu kon tudu in buḷud mita, mogumpag kon mezbahmu mita tampat pototubáan kon dupa, bo mopogambat in mayat mita monimu kon tudu in toḻindua mita in Tuhanmu inta ain noumpag tatua. Takin yaat in gina

MAZMUR 78:58

Mosia in noponontot kon i Allah in tampat pososumbaan kon berhala, bo pinointoi monia in Sia in patong mita monia.

YEREMIA 20:5

Musung monia in pomayá-Ku doman mako in mogamá bo mogakut pobayá in Babel in bayongan kaoyúonan in kotá tanaa, bo bayongan in kapunyaannea, nodapotbí in pakakat mita pusaka in datu mita in Yohuda.

ZEPANYA 1:13

Kapunyaan monia in agowonbí bo baḷoi mita monia in rimumudon. Mosia in mobaḷoibí, táe diábí koutunannea. Mosia in momuḷabí kon anggur táe diábí moiinum kon tubignea.”

YEREMIA 21:13

Onda intua ki Tuhan in noguman kon Yerusalem, “Ei Yerusalem! Kinoukatanmu in moḷantu-ḷantud in ḷopá mita kon diugmumai. Iko in naonda bo buḷud batu irib kon rawang inta notondodai, táe Akuoi in moḷawangbí kon inimu. Iko in moguman kon diábí tobatúmai in intau in mokotubu kon inimu andeka mokodangat kon dindingmu mita,

YEHEZKIEL 23:46

Ki Tuhan Inta Totok in moḷantud in noguman, “Oinídon in topaanan in intau sin mopororiga bo mogagow kon sundaḷ doyowa tatua.