YEREMIA 11:12 - Alkitab Singog In Mongondow Masa In Tanaa

¹² Bo intau in Yohuda bo intau in Yerusalem minayá nokituḷung kon ilah mita ibanea inta sinumba monia pinongin nobogoi in sosumba kuruban. Ilah mita tatua in diábí mokoposaḷamat kon i monia kon dodai in bodito tatua mamangoi.

YEREMIA 11:12 Referans Kwoze

YEREMIA 2:28

Kon onda in berhalamu mita inta pinomia monimu tua? Aka oyúon in roriga, yo kuanidon in mosia moposaḷamat kon i monimu, aka mokoposaḷamat in mosia! Ei Yohuda, dewamu mita in ná kobayong in kotámu mita!

ULANGAN 32:37

Dá ki Tuhan in moḻibó kon umat-Nea, ‘Kon onda in ilah mita moropot inta pongatamai monimu?’

YESAYA 45:20

Ki Tuhan in noguman, “Poyosipundon bo angoidon moyotakin, moiko komintan inta nosaḷamat kon sigad in bangusa mita! Bodokdon in intau mita inta nongurig kon patong kayu, bo nosambayang kon dewa mita inta diá mokoposaḷamat.

TAWARIKH 2 28:22

Kon bonu in kaadaan inta totok in mororiga tatua, nodugangdon in dosa i Ahas kon i Tuhan.

HAKIM MITA 10:14

Bayádon kon dewa mita inta piniḻí monimu tatua. Pokuanidon kon i monia! Bio-biódon mako bá mosiadon in motuḷung kon dodai in moiko mobiag mororiga.”

ULANGAN 32:38

Mosia in nokaan kon ḷongó inta pinosumba monimu, bo nonginum kon anggur inta pinokuruban monimu. Oinídon in mosia mamangoi motuḷung kon i monimu, biódon mako sinbá mosia in mobaḻí pogogadopan monimu.

YEREMIA 44:8

Nongonu sin moiko in nogaidbí kon inta mokopomuká kon torú-Ku? Moiko in namangoi bo nogutun kon Mesir, butá inta deeman moiko in kitogi, bo moiko in mosumba kon berhala bo moposumba in kuruban kon dewa mita in butá tatua! Degá moibog in moiko morimumud kon awakmu tontaní sinbá singkuḻeon in moiko in bayongan in bangusa kon dunia bo tangoimu in pakéondon mobaḻí kutukan?

YESAYA 46:7

Patong tatua in pinakú bo inukat kon tampatnea, patong tatua in simindog mako kon tua bo diá mokopomamping. Aka intau mosambayang kon inia, diábí tubagannea, bo diábí mokoposaḷamat kon inia nongkon roriganea.

YEREMIA 18:15

Táe umat-Ku in noḻiongdon kon i-Nakó, bo notubá kon dupa sin posumba kon berhala. Mosia in noipintud kon daḷan dungkuḷmai inta musti bayáan monia, bo sinumabat kon daḷan inta diápa sinondodai.