YEREMIA 10:8 - Alkitab Singog In Mongondow Masa In Tanaa

⁸ Pamandot bo bodok in mosia komintan sin dewa monia in tongábí kayu, diábí motaau motundú kon inta oyúon in mangaḻenea.

YEREMIA 10:8 Referans Kwoze

ZAKHARIA 10:2

Intau mita mopoigum in topotundú kon berhala mita bo mononoḻindap mita, táe tubag mita inta nouḻí monia in uboḷ bo tongábí kon bibig. Oyúon in noginsilang kon togoindop, táe insilang monia in tongábí mokopoḷaḻe kon i monimu, bo ḷoḻipoi inta inogoinea diá in mangaḻenea. Tuamai in rayat noirangkapdon magí-mako naonda bo domba. Moajar monia sin diá in itoi.

YEREMIA 10:14

Nokoontong kon tua komintan nosadardon in intau, kon sia tua in bodok bo diá kopomomangaḻe. Intau mita mononontaḷ kon buḷawan nooyádon, sin patong berhala inta pinomianea tua in uboḷbí bo diá konyawa.

HABAKUK 2:18

Kinutukdon in iko! Iko in noguman kon kayu topongkó, “Pobangondon!” andeka kon batu moḷoben tobatú, “Sindogdon!” Degá patong tobatú motaau moguman kon inimu? Umpakabí patong tatua inoḻitan in buḷawan andeka saḷaka, táe diábí in nyawa kon inia. Onubí in mangaḻenea in patong berhala? Tua in tongábí mia in intau. Inta mouḻímu kon inia in tongábí komintan uboḷ. Diábí in mangaḻe in pirisaya in mogogaid kon berhala kon onu inta pinomianea tatua, inta diá motaau mosingog tua.

YESAYA 44:19

Mogogaid kon patong tatua in diábí norai, “Kayu tatua topongkó in sinubáku, bo buingnea in pinakéku pinotubáan kon roti bo pinoangagan kon ponoyá sin kaanonku. Bo kiagat in kayu tatua in inaidanku patong. Dá tanaa akuoi in nosumbabí kon kayu topongkó!”

YESAYA 41:29

Totuu, dewa mita tatua diá in baragunanea, mosia tua in tongábí patong pinomia inta diá kodaya, bo diábí mokoaid kon onu bo onu.”

MAZMUR 135:18

Igumon mako natua in ukur in intau mita inta nomia kon tua, bo inta mopirisaya kon inia.

MAZMUR 115:8

Igumon mako natua in ukur in intau mita inta nomia kon tua, bo bayongan in intau inta mopirisaya kon inia.

YEREMIA 4:22

Ki Tuhan in noguman, “Mobodok totok in umat-Ku tatua, mosia in diábí nonotaau kon i-Nakó. Mosia in naonda bo mongoadí mita inta pamandot diábí in topiḻikmai in pomomangaḻe; mopandoi in mogaid kon inta moraat, diá mokoaid kon inta mopia.”

YEREMIA 2:27

Moiko in pokopooyáanbímai, sin kayu topongkó oiníon monimu ki amá bo batu tobatú oiníonmu iná. Moiko in deemanbí mamangoi kon i-Nakó, táe nonaḷábímai kon i-Nakó. Táe aka moiangoidon in roriga, yo Akuoibí in oiníon monimu sinbá mamangoi moposaḷamat kon i monimu.

HOSEA 4:12

Moiko in mopoigum in topotundú kon kayu topongkó! Tungkud tobatú in mopotaau kon inimu kon onu inta koibogmu kotaauan! Moiko in notongkai in buḷoi bobay tobatú inta nobaḻí sundaḷ; moiko in nonaḷámai kon i-Nakó bo nobogoi in awakmu kon ilah mita ibanea.

YESAYA 44:18

Totuu mobodok in intau mita ná tatua! Mosia in momilog kon mata bo gina monia dá diá momangaḻe kon onu bo onu.

YEREMIA 3:9

bo beresibí diá inagían in oyá. Sia in nonuaḻing popisí in nosumba kon batu bo pangkoi in kayu, dá butá tanaa in nobaḻídon nonajis.

YEREMIA 5:4

Akuoi in norai, “Ah, mosia in tongábí rayat biasa inta diá nonotaau in onu bo onu. Mosia in nogaid kon inta bodok, popisí in diá nonotaau mongo onu in kinoibog bo inta sinuntut i Tuhan Allah kon i monia.

YUNUS 2:8

Mososumba mita kon berhala inta diá in baragunanea, in nonaḷámaidon kon ini-Mu bo diádon notoḷutui.