YEHEZKIEL 45:19 - Alkitab Singog In Mongondow Masa In Tanaa

¹⁹ Imang in mustibí mogamá kon dugú in kuruban potobut kon dosa tatua, bodongka popoḻepo kon oigi mita in ngara in Baḷoi-Ku, bo kon siku doman opat in mezbah, bo kon oigi mita in bonawang inta nopobayá ná dangkuḷon kon bonunea.

YEHEZKIEL 45:19 Referans Kwoze

YEHEZKIEL 43:20

Gamádon in dugúnea topiḻik bo popoḻepo kon tungoi mita inta kon siku mita in mezbah tatua, bo kon sikunea opat inta kon dotá in bonunea takin doman sí in mezbah inta noiḻibu. Natuata in pogogaidmu mopotusi in mezbah tatua bo tondíonmudon kon i-Nakó.

YEHEZKIEL 43:14

Bo got nodapot kon tombutung in mezbah inta kon ḻimonag totok, koḷantudnea in tometer. Kon yuaknea koḷantudnea in doyowa nometer, bo tongobotak in meter in mosisi-sisí nongkon ḻibu in sioḷ in mezbah. Tonsilai nogintoḷu, in tudu totok in mezbah, bo mointo-intok degá tongobotakmai in meter nongkon bongkownea inta kon dotá in bonunea.

YEHEZKIEL 43:17

Kon yuaknea in notonggopat doman, batúan in sínea topopitu nometer, bo sinontompidan in ḷuainea inta tokoar in meter in koḷantudnea. (Kooḷad in gotnea tongobotak in meter.) Kon sínea kon dotá in pomukaan oyúon in tukad inta moponik kon tudu totok in mezbah.

YEHEZKIEL 43:19

Tongábí imang buí i Zadok nongkon suku Lewi in motaau mamangoi in tayowon-Ku sin mopobayá in oaidan pogundoian. Akuoi, ki Tuhan Inta Totok in moḷantud in nomarenta nokiaid intua. Ogoidon kon i monia in sapi koḷakian tobatú inta batáneapa sin pokuruban potobut kon dosa.

YEHEZKIEL 46:1

Ki Tuhan Inta Totok in moḷantud in noguman, “Bonawang dotá in pomukaan inta nopobayá in palas kon bonunea in mustibí umuran ḻingkopan kon bonu in onom nosinggai pogaidan. Bonawang tatua in tongábí motaau bukatan kon singgai in Sabat bo kon poramean kon singgai Moḷoben Buḷan Mobagu.

YEHEZKIEL 46:2

Kon singgai mita tatua mongongawasa in mustibí tumuot nongkon palas kon ḷuai mongin yuang moḷoben bodongka simindog kon diug in oigi in bonawang, kon dodai in imang mita moposumba in kuruban payongon bo kuruban dodamean nongkon mongongawasa. Kon ngara in bonawang tatua sia in mustibí dumokó bo mosumba kon i Tuhan, bodongka mayá. Onda intua modapot in doḷom, bonawang tatua in diábí motaau ḻingkopan.

IMAMAT 16:16

Natuata in pogogaid aka mondarit kon Yuang Totok Motusi nongkon kinonajisan in bangusa Israel bo bayongan dosa monia. Ḷoḷaigan i Tuhan musti daritan sin noitoyuak kon ḷoḷaigan in bangusa Israel bo kinotugatan in kinonajisan monia.