YEHEZKIEL 38:23 - Alkitab Singog In Mongondow Masa In Tanaa

²³ Natuata in aid-Ku moponiata kon bayongan in bangusa kon Akuoi in moḷantud bo motusi. Dá kotaauandon monia kon Akuoibí in ki Tuhan.”

YEHEZKIEL 38:23 Referans Kwoze

MAZMUR 9:16

Bangusa mita inta diá nonotaau kon ini-Mu notopak kon bubú inta kinaḻi monia tontaní; mosia in noibaaḷ kon pukot monia tontaní.

YEHEZKIEL 38:16

Bo sinubumu in umat-Ku Israel naonda bo deḷang nondangat kon dunia. Aka wakutunea moiangoidon, iko in potabá-Ku sin mongawasa kon butá-Ku. Takin aid-Ku pongin inimu, ei Gog, bayongan bangusa in monotaaudon mongo ki ine in Akuoi, tuata in ki Allah inta motusi.

YEHEZKIEL 36:23

Poniata-Kubí in kototusi in tangoi-Ku inta moḷoben tua, tangoi inta ain kinotor monimu kon yua-yuak in bangusa mita, dá kotaauandon monia kon Akuoibí in ki Tuhan. Akuoi, ki Tuhan Inta Totok in moḷantud ain nosingog. Pakéon-Ku in moiko kon moponiata kon bangusa mita kon Akuoi naa in motusi, ki Tuhan Inta Totok in motusi.

YEHEZKIEL 37:28

Aka Baḷoi-Ku bo kon yua-yuakdon monia modapot in mononoi, dá kotaauandon in bangusa mita ibanea kon Akuoi, ki Tuhan in ain nomiḻí kon Israel nobaḻí umat-Ku tontaní.”

YEHEZKIEL 39:27

Akuoi in buibí modia kon i monia mobui nongkon butá mita in musung monia, bo kototusi-Ku in koontongandon kon bayongan in bangusa popisí in aid-Ku tatua.

YEHEZKIEL 39:13

Bayongan in intau kon butá tatua in moduḷubí moḷobong; bo podoyon kon oaidan monia tatua dá mosia in mokouḻídon kon tombuinag kon singgai popountungan-Ku. Akuoi, ki Tuhan Inta Totok in moḷantud ain nosingog.

YEHEZKIEL 39:7

Táe kon yua-yuak in intau in Israel, poniata-Kubí in tangoi-Ku inta motusi, bo tangoi-Ku tatua in diá bidon tamakon bui. Dá kotaauandon in bangusa mita kon Akuoibí in ki Tuhan, Allah inta motusi nongkon Israel.”

YEHEZKIEL 20:42

Aka moiko bo diaan-Kudon mobui kon butá in Israel, butá inta pinodandi-Ku kon mogoguyangmu, yo kotaauandon monimu kon Akuoibí in ki Tuhan.

YEHEZKIEL 37:6

Popokompit-Ku bui in ugat bo tapú kon inimu poḷat bakuton-Ku in kuḻit in moiko. Moiko in ogoian-Ku in poginaan dá mobiag. Dá kotaauandon monimu kon Akuoibí in ki Tuhan.”

YEHEZKIEL 39:21

Ki Tuhan in noguman, “Akuoi in moponiatabí in kamuliaan-Ku kon bangusa mita. Mosia komintan in mokoontongbí kon naonda in Akuoi mopomaké in kawasa-Ku sin mopobayá in onu mita inta ain sinantú-Ku inta moadil.

IḶUAIAN 14:4

Baḻíon-Ku in sia motogat in gina sinbá aḷowanneadon in moiko. Táe poontong-Kudon in kawasa-Ku kon i datu in Mesir bo tontaranea mita, bá kotaauandon monia kon Akuoi naa in ki Tuhan.” Bo inaidandon intau in Israel onu inta ain pinarenta i Tuhan kon i monia.

YESAYA 25:3

Iko in dayowonbí in bangusa mita inta moropot, bo koondok kon kotá mita in bangusa mita inta moromú.

YEHEZKIEL 20:41

Naonda in moiko diaan-Ku ḷumuai nongkon butá mita inta pinoporaritan kon i monimu, sipunon-Ku in moiko bo motarima kon bayongan in kuruban payongonmu. Dá kotaauandon in bayongan in bangusa kon Akuoi naa in ki Allah inta Totok in mokudus.

YEHEZKIEL 28:22

Potaaudon kon intaunea mita kon Akuoi ki Tuhan Inta Totok in moḷantud noguman kon i monia, ‘Akuoi naa in musungmu, ei Sidon. Intau mita in modayowbí kon i-Nakó popisí in inta inaidan-Ku kon i monia. Kon tungkuḷ in Akuoi nohukum kon intaumu, kotaauandon monia kon Akuoibí in ki Tuhan inta motusi.

YEHEZKIEL 28:25

Ki Tuhan Inta Totok in moḷantud in noguman, “Sipunon-Kubí in intau mita in Israel nongkon butá mita moyayú kon tampat inta ain pinoporaritan-Ku kon i monia, bo bayongan in bangusa in monotaaudon kon Akuoi in motusi. Bangusa in Israel in mogutunbí bui kon butá monia tontaní, butá inta ain inogoi-Ku kon mogogundoi-Ku ki Yakub.