YEHEZKIEL 38:22 - Alkitab Singog In Mongondow Masa In Tanaa

²² Sia in hukumon-Kubí in yampoi in takit bo mosiḻimodan. Uyan morogot bo uyan in eis, tuḷú bo balerang in popobutak-Kubí kon inia bo kon tontaranea bo kon mobayong in bangusa inta dinumugang kon inia.

YEHEZKIEL 38:22 Referans Kwoze

WAHYU 16:21

Uyan eis moḷoben, inta toḷoḻima nokilo in kosibuḷnea, noḷabú nongkon ḷangit bo noidantug kon intau mita. Dá mosia in nohojat kon i Allah popisí bodito uyan eis inta totok in motoyang tua.

MAZMUR 11:6

Intau moraat ihukum-Nea in bodito, takin tuḷú, balerang bo tompot inta mokopokak.

YEHEZKIEL 13:11

Ei nabi mita inta deeman totuu nabi, dindingmu in moumpagbí. Poangoi-Kubí in uyan morogot. Dinding tatua in dangatanbí in deḷang bo onagon in uyan eis

YEREMIA 25:31

Modapot kon popod in butá singog-Nea in kodongogan; ki Tuhan in momia kon pelekara kon bangusa mita. Bayongan in intau in sisiganbí bo inta moraat in hukumonbí matoi.’ ”

YESAYA 66:16

Sin bayongan in intau inta kinokadapatan kotaḷá in hukumon-Neabí in tuḷú bo pitow, bo mobayongbí in hukumon matoi.

YESAYA 28:17

Koadilan baḻíon-Ku tontogot pogogukur, bo gina motuḻid baḻíon-Ku tontogot ponigad.” Uyan batu in mobundur mokopodarit kon bayongan in uboḷ inta pongata monimu. Ḷunud in mogiḻigbí kon pogogadopanmu.

YEHEZKIEL 5:17

Koḻikud in malarat in gogoy yo popoangoi-Kubí doman in yampoi in takit, aid moromú bo parang sin moḻimod kon intaumu, bo mahaḷuk mita inta mokokaan kon intau sin moḻimod kon i adí mita monia. Akuoi, ki Tuhan, ain nosingog.”

YESAYA 29:6

Ki Tuhan Inta Totok in mokawasa mopoḷuatbí in kotá tatua pongin deḷang bo ḻinug inta motoyang totok. Sia in mopoangoibí in deḷang bo tuḷú inta tumagab.

YOSUA 10:11

Kon tungkuḷ in intau mita in Amori nosiḻig kon buḷud tatua sin moḷagui nongkon tontara mita in Israel, ki Tuhan nopoḷabú in uyan eis inta moḷoben nongkon ḷangit kon i monia kinoouputbí in daḷan nodapot kon Azeka. Inta minatoibí kinoḷabúan in uyan eis in mobayo-bayong nongkon inta iḻimod in intau mita in Israel.

KINOBAḺIAN 19:24

Indoianmai daḻídon in ki Tuhan nopoonag in uyan balerang inta kodoko-dokot. Tua mita in noḷabú kon Sodom bo Gomora.

MATIUS 7:27

Onda in nonguyan, inuntag in ḷunud bo tompot in baḷoi tatua, dá noumpag bo nogoguyaat totok.”

WAHYU 8:7

Malaekat muna in nogirup kon torompetnea, dá uyan in eis bo tuḷu noyobauk in dugú norogot totok noḷabú monag kon butá. Bo sepertiga in dunia naa nodait nopokak, ná doman tua, sepertiga doman in kayu bo bonok in noḷaḷow.

WAHYU 14:10

yo intau tatua monginum kon anggur i Allah, tuata in torú-Nea inta ain inaḻin-Nea kon bonu in tampat-Nea, bo diábí ginaatan topiḻikpamai! Intau mita tatua in toko sikisaan kon bonu in tuḷu bo balerang kon tayowon in malaekat mita motusi bo kon tayowon Adí in Domba tatua.

WAHYU 20:9

Dá mosia irumangkap kon bayongan in dunia bodongka nongopung kon ḷoḷaigan in umat i Allah bo kon kotá inta kinotabi i Allah. Táe tuḷu in noponag nongkon ḷangit bo nomokak kon i monia.

YESAYA 34:3

Mayat mita monia in diá bidon ḷobongon, táe pomayádon mako moburuk bo mobó. Buḷud mita mobaḻídon mopura popisí in koiḻigan in dugú monia.

YEHEZKIEL 28:23

Akuoi in mopoangoibí in yampoi in takit, bo mopomayádon mako in koiḻigan in dugú kon daḷanmu mita. Iko in tubuonbí in musung nongkon bayongan in tampat, bo intaumu mita in ḻimodonbí. Dá kotaauanmudon kon Akuoibí in ki Tuhan.’ ”

YEHEZKIEL 39:6

Pomuká-Kubí in kopagongan kon butá in Magog bo kon pintad mita, inta pinogutunan in intaunea mita takin pia-pia mako. Dá kotaauandon monia komintan kon Akuoibí in ki Tuhan.

YOËL 3:2

Bayongan in bangusa in sipunon-Ku bo diaan-Ku kon Ḷopá Pohohakiman. Bo sisigan-Ku in mosia kon tua popisí in aid monia moraat kon umat-Ku sin mosia in nosila-silaidon mako kon butá in Israel bo umat-Ku in iḷumbú monia kon butá mita in intau ibanea.