YEHEZKIEL 37:4 - Alkitab Singog In Mongondow Masa In Tanaa4 Bo ki Tuhan nopotabá kon inakó nopotaau in koyow-Nea kon tuḷan mita inta noingkag tatua, Gade chapit la |
Ki Yesus notubag kon i monia, “Poguman-Ku kon i monimu, aka moiko bo totu-totuu mopirisaya bo diá mohawatir, yo moiko in deemanbí tongá motaau mogaid kon ná inta pinomia-Ku kon pangkoi in ara tatua, táe moiko motaaubí doman moguman kon buḷud tanaa, ‘Pobuatdon nongkon tampatmu tanion bo koḷabúdon kon bonu in dagat’; yo mobaḻíbí doman intua.
“Gamá in tungkud inta kon tayowon in Poti Dodandian, bo kamunda i Harun musti mosipun kon bayongan umat. Kon tayowon monia komintan, iko musti moguman kon buḷud batu inta kon tua sinbá moporoput magí in tubig. Natuata in iko mopoḷuai in tubig nongkon buḷud batu tatua sinbá oyúondon in ponginuman in umat bo bobiagon monia.”
Podudui in parenta i Tuhan nomaḷúdon in nabi tatua kon mezbah tatua, “Ei mezbah, ei mezbah! Nanaabí in guman i Tuhan, ‘Adí tobatú inta tangoian ki Yosia in pononggadíbí nongkon motoḷuadí i Daud. Kon tudumu naa, ei mezbah, ḻimodonnea in imang mita inta mopobayá in oaidan monia kon tampat pososumbaan kon dewa, bo inta ain doman noposumba in kuruban kon tudumu. Bo kon tudumu doman nion in potubáannea kon tuḷan mita in intau.’ ”