YEHEZKIEL 31:4 - Alkitab Singog In Mongondow Masa In Tanaa

⁴ Nobiag in sia sin tubignea in tugat. Ongkag kon bonu in butá mobogoi in kaanon kon inia, momutak kon bayongan in uakatnea, bo momuntad kon pangkoinea mita ibanea.

YEHEZKIEL 31:4 Referans Kwoze

WAHYU 17:15

Malaekat tatua in noguman doman, “Tubig inta inontongmu tatua, tampat inta iḻitúan in sundaḷ tatua, tuata in bangusa mita, rayat mita, negara mita bo bahasa mita.

WAHYU 17:1

Onda intua tobatú malaekat nongkon malaekat pitu inta nokadai kon palo pitu tatua in namangoi kon inakó bo noguman, “Igai, bá popoontongku kon inimu in hukuman kon sundaḷ moḷoben, tuata in kotá moḷoben inta pinosindog kon bingkí in ongkag mita.

YEHEZKIEL 17:8

Bokaka pangkoi in anggur tatua ain noimuḷa kon butá inta mopia takin doman tubig inta mobayong nodapot in nonondaun mobambar in sia, bo momungai modatog, bo nobaḻí pangkoi in anggur inta mopia.

YEHEZKIEL 17:5

Onda intua ginamánea in totanga in pinomuḷa inta noguodpa nongkon butá in Israel, bo pinomuḷanea kon gobá inta mopia, inta diá kodai-daitan in tubig.

AMSAL 14:28

Kokokawasa in datu noidoyon kon kobayong in rayatnea; aka diá in rayat diábí in sia motaau mongawasa.

YEREMIA 51:36

Tuamai in ki Tuhan in noguman kon intau in Yerusalem, “Akuoi in motuḷungbí kon pelekaramu bo motuḻí kon aid mita in musungmu mita kon inimu. Bokaká mita bo ongkag mita in Babel ingkagan-Kubí.

YEHEZKIEL 17:7

Kon tungkuḷ intua oyúon in ḷagapan boniá moḷoben ibanea; koḻikipnea in mooḷad bo bubuḷnea in mobunod. Bo pangkoi in anggur tatua nopotugat in uakatnea mita bo tanganea mita kon ḷagapan boniá inta nobagu tatua takin kamang sinbá ḷagapan tatua moibog mobogoi kon inia in tubig mobayo-bayong nongkon inta oyúon kon gobá tatua.