YEHEZKIEL 21:21 - Alkitab Singog In Mongondow Masa In Tanaa

²¹ Datu in Babel in sinimindog kon diug in dopí totundú in daḷan tatua. Sinbá kotaauannea mongo onda in daḷan inta bayáannea, dá nopoigum in sia kon totundú kon berhala mita, monguḻingkó kon bobong pinobonuan kon piot bo monaridi kon poat in mahaḷuk inta bagu pinokuruban.

YEHEZKIEL 21:21 Referans Kwoze

AMSAL 16:33

Popisí in monotaau kon ukur, intau mopogonik in undi, táe inta motubag in tongábí ki Tuhan tontaní.

HAKIM MITA 18:20

Nopia in gina in tayowmobiag tatua in nokodongog kon tosingogon tatua. Dá, nogamádon in sia kon epod bo patong mita berhala tatua bo dinumudui kon i monia.

HAKIM MITA 17:5

Ki Mikha naa in koyongandon oyúon in tobatú tampat pososumbaannea. Sia in nomia kon tongonumai in patong berhala bo todit in epod bo noduí kon i adínea ḷoḷaki tobatú nobaḻí imang.

KINOBAḺIAN 31:30

Kinotaauankubí kon iko nobuat tatua popisí in iko moibogdon totok mobui. Nongonu sin iko nonakowbí kon patong moḷoḷukad kon i motoḷuadíku?”

KINOBAḺIAN 31:19

Kon dodai intua ki Laban kon tampat ponggonsingan kon bubuḷ in domba, koyogot doman monggonsing kon bubuḷ in dombanea mita, bo kon dodai intuata ki Rahel nonakow kon patong kapunyaan i amánea.

OUMAN IN RASUL MITA 16:16

Kon singgai tobatú doman, wakutu in kami minayá in tampat pososambayangan tatua, kami in noyodungkuḷ in tobatú bobantung bobay. Bobay tatua in kinawasaan in dimukud moraat bo inta mononoḷanow kon kobobiag in intau. Oaidannea tatua in nodia kon kauntungan moḷoben kon intau inta pinobantungannea.

ZAKHARIA 10:2

Intau mita mopoigum in topotundú kon berhala mita bo mononoḻindap mita, táe tubag mita inta nouḻí monia in uboḷ bo tongábí kon bibig. Oyúon in noginsilang kon togoindop, táe insilang monia in tongábí mokopoḷaḻe kon i monimu, bo ḷoḻipoi inta inogoinea diá in mangaḻenea. Tuamai in rayat noirangkapdon magí-mako naonda bo domba. Moajar monia sin diá in itoi.

HOSEA 4:12

Moiko in mopoigum in topotundú kon kayu topongkó! Tungkud tobatú in mopotaau kon inimu kon onu inta koibogmu kotaauan! Moiko in notongkai in buḷoi bobay tobatú inta nobaḻí sundaḷ; moiko in nonaḷámai kon i-Nakó bo nobogoi in awakmu kon ilah mita ibanea.

HOSEA 3:4

Natuabí doman in bangusa in Israel; noonggotdon totok in mosia in musti mobiag takin diá in datu andeka itoi, takin diá in kuruban andeka tugu mita mokaramat, takin diádon in berhala mita andeka ajimat mita inta mopotaau in onu inta noibunipa kon singgai moidudui.

AMSAL 21:1

Naonda bo pononompia i Tuhan kon tubig in ongkag sinbá moiḻig podudui in ibog-Nea, natua doman in pokokapit-Nea kon raian in datu.

AMSAL 16:10

Datu in motarima kon kawasa nongkon i Allah, dá, diábí in sia kotaḷá in monantú kon ibognea.

DATU MITA 2 23:24

Kon mopoaid in hukum mita inta pinais kon bonu in buk inta nouḻí i Imang Moḷoben ki Hilkia kon Baḷoi Tuhan, bayongan in mogogoiní kon dimukud bo mononoḻindap in pinoguntun i Datu Yosia nongkon Yerusalem bo nongkon bayongan in Yohuda, bo iḷumbúnea in bayongan dewa in tonibuḷoi, berhala, bo pakakat mita inta pinaké kon posumbaan kon dewa mita.

SAMUEL 1 15:23

Sin moḷawang kon parenta i Tuhan notongkaibí in mosihir in koraatnea, bo gina inta mododia notongkaibí in koraatnea ná nosumba kon ilah ibanea, Popisí in ki Tuang Datu ain noḷawang kon parenta i Tuhan, dá diádon akúon i Tuhan kon ki Tuang in datu.”

HAKIM MITA 18:24

Ki Mikha notubag, “Moiko nogamá kon patongku mita bo imangnea, nodapot in diádon koonu bo onu in akuoi, bo moiko in noguman, ‘Onu in nobaḻí!’ ”

HAKIM MITA 18:18

Naonda in intau ḻima tatua sinumuot kon baḷoi i Mikha bo nogamá kon epod takin patong mita berhala tatua, tayowmobiag in Lewi tatua noḻibó, “Onu in pomiaan monimu tanaa?”

HAKIM MITA 18:14

Intau toimata taya ḻima inta muna pinotabá tatua noguman kon yobayatnea mita, “Bá kotaauandon monimu kon baḷoi tobatú kon naa oyúon in patong inta inaipan in saḷaka! Oyúon doman in patong mita ibanea bo epod. Raika mongo onu in musti pomiaan naton.”

ULANGAN 18:10

Kon sigad monimu dikabí in moposumba kon i adínea mita mobaḻí kuruban payongon. Bo dikabí tobatúmai in mobaḻí mononanow, motayak kon tanda mita, momaké in totaau ande

PINOGIAPAN 23:28

Dá dinianeadon in ki Bileam minayá in tudu in Buḷud Peor inta noitayow in padang gurun.

PINOGIAPAN 23:23

Diábí in totaau in kumaan kon i Yakub diábí in ponggaing in mokomampu monayow kon Israel. Tosingogon in intau soaḷ bangusa tatua, ‘Indoiai in mokoherang inta inaidan i Allah!’

PINOGIAPAN 22:7

Dá minayádon in itoi mita in intau Moab bo Midian tua takin kodia-dia in tondan poguboḻi kon i Bileam sinbá moibog in sia mongutuk kon intau in Israel. Naonda in noiyaput kon i Bileam, mosia nopotaaudon in koyow i Datu Balak.

MATIUS 22:9

Manangka intua bayádon kon pinoyotangaan daḷan bo oinídon in intau mita inta moyodungkuḷ monimu kon tua, bo dia mamangoi kon rame ponikaan tanaa.’

HAKIM MITA 18:17

Toimata taya ḻima tatua bayá-bayádon sinumuot kon baḷoi, bo nogamá kon patong kayu inta inaipan in saḷaka tatua takin patong mita ibanea, bo epod. Tayowmobiag in Lewi tatua in sinimindogdon mako takin tontara mita onom nogatut inta kon ngara moḷoben.