YEHEZKIEL 18:17 - Alkitab Singog In Mongondow Masa In Tanaa

¹⁷ Diábí kon dodai in onda in sia in mogaid kon moraat andeka mopoḷuan takin rente. Sia in motoḷutui kon hukum-Ku mita bo dumudui kon parenta-Ku. Yo adí tatua in mobiagbí diábí matoi popisí in dosa mita i amánea.

YEHEZKIEL 18:17 Referans Kwoze

MALEAKHI 3:7

Naonda bo mogoguyang monimu koḻipod, moiko komintan in sinumabatdon kon hukum-Ku mita bo diá nosatia in nopobayá intua. Pobuidon mangoi kon i-Nakó, dá Akuoi in mamangoidon bui kon inimu. Táe moiko in moḻibó, ‘Onu in musti aidan nami sinbá mobui kon ini-Mu?’

DANIEL 4:27

Tuamai in aka motaau dá ki Tuangku in dumuduipa kon tonggina in bobantung naa. Dikadon in ki Tuangku mogaid kon dosa, táe aidaidon in onu inta mopia bo moadil, bo kotabidon in intau nobiag nobogá. Takin natua ki Tuangku in umuranbí mobiag mopia-pia mako.”

YEHEZKIEL 33:13

Aka Akuoi in modandi kon moposaḷamatbí kon intau inta mopia, táe aka sia momangkoidon momia kon dosa bo moharap mako kon sia in posaḷamatonbí popisí in aidnea mopia dungkuḷmai, yo notoboḻingodon in sia. Diá bidon toropon-Ku in aidnea inta mopia dungkuḷmai bo matoibí in sia popisí in dosanea mita.

YEHEZKIEL 20:30

Dá potaaudon kon intau in Israel in onu inta pinotaau-Ku kon i monia, Akuoi ki Tuhan Inta totok in moḷantud. ‘Nongonu sin moiko in nomiabí kon dosa mita ná inta pinomia in mogoguyangmu? Ná mosia, moiko in dinumudui doman kon berhala mita inta mokorongó tua.

YEHEZKIEL 20:18

Noyoḻiudon kon tua tayowmobiag mita kon sigad monia, sinongginaan-Ku nanaa, ‘Dika dumudui kon atorang mita inta pinomia in mogoguyangmu. Dika dumayan kon kabiasaan monia bo dika doman moponajis in awakmu pongin mosumba kon berhala mita monia.

YEHEZKIEL 18:28

Nosadardon in sia kon bayongan inta pinomianea bo nogogaidon in nogaid kon dosa. Yo sia tua in diábí matoi táe umuranbí mobiag.

YEHEZKIEL 18:13

Sia in mopoḷuan bo moigum kon rente. Yo degá mobiag in intau natua? Diá! Sia in nomiadon kon bayongan in oaid inta mokorongó tua, bo sia in matoibí! Sia in matoi popisíbí in aidnea tontaní.

YEHEZKIEL 3:21

Aka intau inta mopia tatua ogoianmu in tompoingat sinbá diá mogaid kon dosa, bo dumudui in sia kon tongginamu, dá diábí in sia hukumon-Ku, bo iko in mosaḷamatbí.”

YEREMIA 16:19

Tuhan, Ikobí in inta noḷukad kon inakó bo nobogoi in ropot kon inakó; Iko in notuḷung kon inakó kon dodai in nororiga. Bangusa mita nongkon popod in butá in mamangoibí kon ini-Mu bo moguman, “Mogoguyang nami in tongábí oyúon in ilah uboḷ inta totokbí in diá in mangaḻenea.

AMSAL 29:14

Aka datu mobela kon hak in intau moyangkó, yo kon taonganneabí in sia in momarenta.

AMSAL 29:7

Intau mopia in monotaaubí kon hak in intau moyangkó, táe intau moraat in diábí monotaau intua.

AMSAL 14:31

Ki ine in mopoaid in mopia kon intau bogá, mohoromat kon i Allahnea; ki ine in mopororiga kon intau moyangkó, mopoompámai kon i Inta nomaḻí kon inia.

AYUB 29:16

Aka kon intau nobogá, akuoi in nobaḻí ki amá; kon intau ango-angoi, akuoi in nobaḻí mododuḷu.

IMAMAT 18:30

Dá ki Tuhan noguman, “Duduiaidon in atorang mita inta inogoi-Ku bo dikadon dumayan kon dodia in intau mita inta nogutun kon butá in Kanaan wakutu in moiko diápa nogutun kon tua. Dika moponajis in awakmu tontaní takin momia kon oaid mita tatua. Akuoi ki Tuhan Allahmu.”

IMAMAT 18:4

Duduiaidon in hukum-Ku mita bo aidai in onu inta pinoki aid-Ku kon inimu. Akuoi naa in ki Tuhan Allahmu.

LUKAS 19:8

Kon baḷoinea tatua, ki Zakheus sinimindog bo noguman kon i Tuhan, “Tuhan, kapunyaanku tobotak ogoikudon kon intau mita bogá bo aka oyúon doman in intau inta pernadon inuboḷanku, yo pobuionkudon bui kon inia koopat noguntuḷ in kobayongnea!”

SURAT I PAULUS KON JAMAAT RUM 2:7

Bo ki Allah in mobogoibí in kobiagan mopia bo mononoi kon i monia inta umuran mogaid kon inta mopia, kon i monia inta motayak kon inta momulia, inta motayak kon kahoromatan bo inta motayak kon inta mononoi.

MAZMUR 119:1

Pia in kamang in intau inta nobiag diá in bogit bo notoindudui kon hukum mita i Tuhan.

YEHEZKIEL 18:18

Noyoḻiudon kon tua ki amánea inta moibog monombuḻitok bo mogagow bo momia kon inta moraat ibanea, in matoibí popisí in dosa mita inta pinomianea tontaní.

MAZMUR 119:3

Pia in kamang in intau inta nobiag podudui in ibog i Tuhan, bo diá nogaid kon moraat.