YEHEZKIEL 17:16 - Alkitab Singog In Mongondow Masa In Tanaa

¹⁶ Podoyon kon i-Nakó, ki Allah inta nobiag, ki Tuhan Inta Totok in moḷantud, datu in Yohuda in matoibí kon Babel, popisí in sia in nonoḻikudon kon ibotnea bo iḻimimpat kon dodandiannea takin i datu in Babel inta ain nopoḻitú kon inia kon ḷoḻitúan in datu.

YEHEZKIEL 17:16 Referans Kwoze

YEHEZKIEL 12:13

Táe pogambat-Kubí in landará-Ku sin podomok kon inia. Bo diaan-Ku in sia kon kotá in Babel, bo kon tua matoi in sia takin diá bidon mokoimontanmai in mokoontong kon kotá tatua.

YEREMIA 52:11

Nopaḷut mako kon tua ki Zedekia iḷontok kon mata, bo sinokig bo dinia kon Babel. Kon tua pinobonu in sia kon ponjara, bo diádon nokoimontanmai in iḻumuai kon tua nodapot in sia minatoi.

YEHEZKIEL 17:13

Bo piniḻínea in intau tobatú nongkon motoḷuadí in datu in Yohuda tatua, nomia kon dodandian takinnea, bo nopotabá kon inia nongibot kon motoindudui kon inia. Ki Datu in Babel tatua in nodomok kon intau mita mongoponting,

YEHEZKIEL 16:59

Ki Tuhan Inta Totok in moḷantud noguman, “Popoaid-Kubí kon inimu podudui in aidmu tontaní, sin iko in nonoḻikudon kon ibotmu bo iḻimimpatdon kon dodandian-Ku takinmu.

YEREMIA 39:7

Onda intua ki Zedekia iḷontok doman kon matanea, bo inumantungan poḷat dinia kon Babel.

MAZMUR 15:4

inta mopoompámai kon intau inta kinodoí i Allah, táe mohoromat kon intau inta mosatia kon i Tuhan; inta mogintompod kon dandi, umpakabí morugi

DATU MITA 2 24:17

Onda intua ki Nebukadnezar noduí kon i Matanea pokuamáan i Yoyakhin, nobaḻí datu in Yohuda, bo nomaḷui kon tangoinea nobaḻí ki Zedekia.

SAMUEL 2 21:2

(Intau mita in Gibeon deemanbí intau in Israel; mosia in noituot paanan mointok in intau in Amori. Intau mita in Israel ain nongibot kon moḷukad kon i monia, táe ki Saul in noḷongasibí noyopú kon i monia sin sia in norai kon kopontingan in intau in Israel bo Yohuda.) Bo ki Daud in nogoiní kon intau mita in Gibeon tatua

YOSUA 9:20

Kita in diábí motaau moḻimod kon i monia sin kita ain nodandi; bo aka kita ḻimimpat kon dandi tatua dá hukumon i Allah in kita.

PINOGIAPAN 30:2

Aka ḷoḷaki tobatú modandi takin mongibot kon i Tuhan, dá sia in sinumogotdon kon tobatú dandi, sia in musti mogaid kon onu inta ain pinodandinea tatua, bo diábí motaau in monginggamá kon onu inta ain siningognea.

IḶUAIAN 20:7

Dika morotag kon tangoi-Ku, sin Akuoi, ki Tuhan Allahmu, in mohukumbí kon i ineka inta mopomia ibo-ibog kon tangoi-Ku.

IḶUAIAN 8:2

Aka diá duduianmu, yo butá tanaa in puḻinganku in tumpaḷak mobaḻí hukuman.

TIMOTIUS 2 3:3

Diábí in tabi monia kon tumpaḷa intau, sahingga doíbí mongampung kon intau inta kotaḷá kon i monia, bo moibo-ibog in moporaatmai kon intau ibanea, bo diá doman mokotahang kon ibog, totok doman in morogi bo soaḷ inta mopia in kodoíbí monia.

TIMOTIUS 1 1:10

pinopomakusud doman kon i monia inta mokotor in oaid, kon i monia inta mongibog kon tumpaḷa ḷoḷaki, kon i monia inta banselang, kon i monia inta mongouboḷ bo kon i monia inta umuran mongonguman kon diá totuu, bo oaid mita inta diá kinoibog in totundú inta mobanar.

SURAT I PAULUS KON JAMAAT RUM 1:31

mosia in doíbí mosimangartian; diá doman mosatia bo diá doman in totabian kon tumpaḷa intau.

MALEAKHI 3:5

Guman i Tuhan Inta Totok in mokawasa, “Akuoi in mamangoibí kon inimu sin mohakim. Akuoi in ḷagidon mobaḻí sakusi kon mososihir mita, kon intau mita inta mototuaḻingan, inta noguman kon uboḷ, inta notombogá kon dodai in nobogoi in gaji kon intau inta sinondanan, inta nondorot kon intau boba-bobay, uno-unon, bo intau ango-angoi, bo kon intau mita inta diá mohoromat kon i-Nakó.”

HOSEA 10:4

Mosia in mosingog kon ambungangaḷ bo momia kon dandi diá totuu bo tumogot kon dodandian inta diá in mangaḻenea. Hukum tuuyon dá inta diá moadil in mobiag naonda bo tagoi kon gobá inta ain pinasoḷan.

YEHEZKIEL 17:10

Totuu kon sia in noimuḷadon noropot, táe umuran degá in sia mobiag poḷat in modugang mobayong? Degá diá moḷaḷow in sia aka irupon in tompot in pomukaan? Degá diá moingkag in sia kon tampat inta pinomuḷaan kon inia?”

DATU MITA 2 24:20

Ki Tuhan in sinumorú totok kon intau mita in Yerusalem bo intau in Yohuda dá diádon inindoian-Neamai in mosia.

YEREMIA 34:21

Ki Zedekia datu in Yohuda bo pojabat mita in pomarentaanea in ogoi-Ku kon intau mita inta moibog moḻimod kon i monia. Ogoi-Kubí in mosia kon tontara in Babel, inta tanaa mako ain nonaḷámai kon i monimu.

YEHEZKIEL 21:23

Intau mita in Yerusalem in diábí mopirisaya kon mosia in tubuon, sin mosia in nomiadon kon dodandian takin Babel. Táe toḻindap tanaa in mobogoi in tompoingat kon i monia kon mosia in domokonbí popisí in dosa mita monia.