YAKOBUS 3:13 - Alkitab Singog In Mongondow Masa In Tanaa

¹³ Aka kon sigad monimu oyúon intau inta mobijaksana bo mopandoi, yo mustibí intua poniatanea kon kobobiag mopia takin mogaid kon soaḷ mita inta mopia, inta sinakinan in gina inta diá mosiḷantud bo kabijaksanaan.

YAKOBUS 3:13 Referans Kwoze

GALATIA 5:23

moompá in dodia, bo mokotahang kon gina. Diábí in hukum agama in molarang kon oaid mita natua.

YAKOBUS 3:17

Táe intau inta nokouḻí kon kabijaksanaan nongkon i Allah, yo sia in muna-munamai totok modarit, onda intua moibog in sia kon dodamean, mobahasa mako, bo motoindudui. Moḷoben in tabinea bo oaidnea mongopia. Diábí in sia momiḻí kon intau bo diábí tongá ki ubo-uboḷmai mopia.

MATIUS 5:5

Pia in kamang in intau inta moaḷus in oaid bo pososingog sin mosia tua i motarima kon dandi i Allah.

KOLOSE 3:12

Utat mita, moiko nion in umatbí i Allah inta ain sinotabi bo piniḻí-Nea mobaḻí kapunyaan-Nea tontaní. Tuamai in musti popoontong doman monimu in totabian, pia in gina, diá motosiḷantud, pososingog moaḷus bo mobahasa kon tumpaḷa intau bo mosabar aka koantugan in roriga.

PETRUS 1 2:12

Kopiaan in oaidmu kon sigad in intau mita inta diápa nonotaau kon i Tuhan, sahingga in aka singogon monia kon iko in intau moraat, yo koontongandon monia in oaidmu inta mopia, dá modayowdon in mosia kon i Allah kon singgai koangoian-Nea.

TITUS 3:2

Tongginaai sinbá mosia in diá umuran moibog moponapud in uboḷ kon intau ibanea andeka moibo-ibog mobobayowan i inekadon, sin maníka umuran mokopopia kon dodia kon tumpaḷa intau bo mokopoaḷus doman kon pososingog takin bayongan in intau.

TIMOTIUS 2 2:25

Sia in musti mokopoḷukó kon bahasa aka motundú kon intau mita inta moibog momaḷawang; bo tantú mopoigum mako bá ogoian i Allah in kasampatan in intau mita tatua sinbá mogogaidon in mogaid kon dosa bo monotaaudon kon totundú inta noitutui.

PILIPI 1:27

Dá tuamai naa in poigumonku, kobiagbí in moiko podudui in onu inta pinoigum kon bonu in Habar Mopia i Kristus, sinbá aka moiangoi in akuoi yo diá bo diá kodongogankudon, kon moiko in umuranbí notobatú kon gina bo raian in moramuji mogaid kon onu inta pinirisaya podudui in Habar Mopia nongkon i Allah.

TIMOTIUS 1 6:11

Táe iko inta ain piniḻí i Allah, mokopoyayúdon kon tua komintan. Tayakdon in onu inta mopia kon tayowon i Tuhan, aidai in onu inta moitutui, posambayang bo mokopotantú kon pirisaya kon i Kristus, kotabibí in tumpaḷa intau, mobalajar mosabar bo aidai in onu inta mokosanang kon gina in intau.

YAKOBUS 2:18

Degá oyúon intau in moguman, “Oyúon intau in umandoḷ kon pirisayanea bo oyúon doman in umandoḷ kon oaidnea.” Dá akuoi in moguman, “Poontongka kon inakó in pirisaya takin diá in oaid bo poontongku kon inimu in oaidku saḷaku bungai kon akuoi in mopirisaya.”

PETRUS 1 2:9

Táe moiko nion in bangusa inta kinopiḻían, imang mita inta mobantung kon datu, bangusa inta mokudus, umat inta kapunyaan i Allah. Ain piniḻí bo inoiní i Allah in moiko iḷumuai nongkon sindip bo mayá tumuot kon bayag-Nea inta momulia, takin makusud bá moiko in mopotaa-taau mako in habar in bayongan inta pinomia i Allah inta diá in poḻiuan tua.

YAKOBUS 1:21

Tuamai ḷumbúdon in tabiat inta nonajis bo moraat. Táe koaḷusdon in gina motarima kon pirman inta pinomuḷa i Allah kon bonu in ginamu, sin moḷoben kawasa in pirman tatua kon moposaḷamat kon inimu.

MOHOHUTUBA 8:1

Totuu mosanang in intau mobijaksana. Kotaauannea in tubag in bayongan pelekara. Pandoi nokopomomi kon inia sin pia in gina, dá pogotnea in umuranbí motarimbuka.

MAZMUR 107:43

Igumon mako intau mobijaksana in morai kon bayongan intua bo akúon monia kon ki Tuhan in umuranbí motabi.

TIMOTIUS 1 4:12

Mokopoingat sinbá diá in tobatúmai intau in mopandang enteng kon inimu popisí in iko noguodpa. Táe poramujidon sinbá iko in umuran mobaḻí contoh bo doduduianmai kon soaḷ inta mopia i intau mita inta mopirisaya, pinangkoi kon pososingog, oaid bo kon soaḷ kototabimu kon tumpaḷa intau bo kopopirisayamu kon i Kristus Yesus takin kobobiagmu inta motompia.

KORINTUS 2 10:1

Akuoi ki Paulus, inta kain intau in diá mobarani moyogintayow mako, tongá mobarani aka moyogiyayúan monimu. Tanaa mako pinodoyon kon koaḷus bo kopopia in gina i Kristus,

MATIUS 11:29

Aidaidon onu inta pinoki aid-Ku kon inimu, bo duduidon kon oaid-Ku, mokopoompá kon dodia bo mokopoaḷus kon pososingog, dá iko in mokodungkuḷ kon kopiaan.

YAKOBUS 3:1

Utat mita! Dikabí mobayong in kon sigad monimu in moibog mobaḻí guru. Kinotaauanbí monimu kon kita inta mobaḻí guru in adilonbí moboga-bogat nongkon intau ibanea.

EPESUS 4:2

Umuranbí pokopoompá kon dodia, mokopoaḷus kon pososingog bo umuran domandon mokoposabar. Popoontongbí in tabimu kon oaid inta moibog mosituḷungan.

GALATIA 6:4

Pomuḷoi intau in mustibí moindoi kon oaidannea tontaní, mopia andeka diá in oaidnea. Aka mopia dá tuabí in mokosanang kon ginanea. Táe donaaibí mopoyobandingmai onu inta inaidan intau ibanea.

GALATIA 6:1

Utat mita! Aka oyúon intau in kino kadapatan monimu nogaid kon noitaḷá, dá moiko inta nobiag noidudui kon ibog in Roho i Allah, musti modia bui kon intau tatua mongindaḷan inta moitutui. Táe koḷukóon in mosingog, bo moiko in musti mokopoingat sinbá diá kopongaruan doman.

KORINTUS 2 8:24

Tuamai poigumon nami, poniatabí in tabi monimu kon i monia, sinbá bayongan in jamaat monotaaudon kon moiko in motabibí kon i monia, bo onu in dinui-duímai nami soaḷ moiko moniata kon totuubí.

DANIEL 2:21

Siabí inta nonantú kon sempo bo wakutu, Sia in nopoḷabú bo noduí kon pongawasa. Siabí doman inta nobogoi in kabijaksanaan, bo noponotabi in pomomangaḻe.

MATIUS 21:5

“Pogumandon kon bobay in Sion, Indoiai, Datumu namangoi kon inimu. Moompá in dodia-Nea bo sinumakoi kon keledai tobatú, tobatú keledai inta moguodpa.”

ZEPANYA 2:3

Angoidon bui kon i Tuhan, ei bayongan intau inta moompá in dodia kon butá tanaa, bo bayongan in intau inta dinumudui kon parenta-Nea mita. Pogaidon kon onu inta kinoibog i Tuhan, bo pokoompádon kon dodia kon tayowon-Nea. Dika-dika bo iko in moisimparut nongkon hukuman kon singgai ki Tuhan mopoontong in torú-Nea.

YEREMIA 9:12

Akuoi in noḻibó, “Tuhan, nongonu sin butá tanaa in pinomayábí mako in noḷogat bo noingkag naonda bo padang gurun nodapot in diádon in tumaḻib? Oyúon degá in mopandoi totok sinbá momangaḻe kon naa komintan? Ki ine in pinoginsilangan-Mu sinbá sia in mokopoyaput kon intau ibanea?”

YESAYA 61:1

Kawasa i Tuhan Inta Totok in Moḷantud oyúon kon inakó; Sia in nomiḻí bo nopotabá kon inakó sin modia kon habar mopia kon intau nobogá bo moḻipoi kon intau inta nokuyang in ginanea, sin mopotaau kon intau inta sinokodakop kon mosia in ḷagidon poḷuaton, bo kon intau mita kon bonu in ponjara kon mosia in ḷagidon poḷuaion.

MAZMUR 149:4

Ki Tuhan in moibog kon umat-Nea; pinountung-Nea in intau inta moompá in dodia.

AYUB 28:28

Ki Allah in noguman kon intau, “Sinbá mokouḻí kon hikmat, ki Allah in musti horomaton monimu. Sinbá momangaḻe, inta moraat musti poyayúon monimu.”

PINOGIAPAN 12:3

Ki Musa naa in intau inta moompá totok in dodia, noiḻiu kon bayongan intau inta nobiag kon dunia naa.

PETRUS 1 3:4

Táe, ḷambáaibí bonu in gina monimu in ḷambá inta diá mogogu-goguyaat, tuata in budi inta mopia bo moonow in raian. Tuabí in ḷambá moḷunat inta kinoibog i Allah.

KORINTUS 1 6:5

Totok mokooyá uḻe! Umpaka yo beresidon diá in intau mobijaksana kon sigad monimu inta motaau mopoyotutui in soaḷ inta tongá natua mita inta mobaḻí kon sigad monimu intau in Keresten!

MATIUS 7:24

“Pomuḷoi in intau inta nokidongog kon singog-Ku bo aidannea intua komintan, yo sia tua in ibarat intau inta mopandoi, inta noposindog in baḷoinea kon tudu in batu.

YEREMIA 9:23

Ki Tuhan in noguman, “Intau mobijaksana in diábí motaau in moyunggagá popisí in kobobijaksananea, intau moropot popisí in ropotnea, bo intau nooyúon popisí in kaoyúonannea.

YESAYA 60:6

Butámu in posipunandon in unta mobayong, mosia in mamangoi nongkon Midian bo Epa. Nongkon Syeba intau modia kon buḷawan bo kamania, sindaḷan modayow kon aid i Tuhan.

MOHOHUTUBA 8:5

Intau inta motoindudui kon inia, in moaman bo mobiag motompia; intau inta moarip in monotaaubí mongo toonu bo naonda in dumudui kon i datu.

MAZMUR 45:4

Pogabitdon in kedangmu kon ogotan, ei datu inta motorindog, iko in totok in momulia bo motaingkat!

MAZMUR 25:9

Ki Tuhan in mokapit kon intau inta moompá in gina, bo motundú kon i monia onu in kinoibog-Nea.

IBRANI 13:5

Aka mobiag yo dikabí kawasaan in ibog kon doit, táe kosanangbí in momaké kon onu inta nouḻímu sin ki Allah nogumandon nanaa, “Akuoi in diábí mopomayá mako andeka monaḷámai kon inimu.”

YESAYA 29:19

Intau mita bogá bo mokooyá in mokorasadon bui kon kobiagan mopia inta inogoi i Allah inta mokudus Allah in Israel.

PETRUS 1 1:15

Táe aidaibí in naa, kotusidon in moiko kon bayongan in yagi-yagi inta inaidan monimu, ná ki Allah inta ain nogoiní kon i monimu tua in motusibí totok.

MAZMUR 122:8

Popisí in inanakan bo yobayatku akuoi in moguman, “Igumon mako iko in mobiag motompia!”