YAKOBUS 2:5 - Alkitab Singog In Mongondow Masa In Tanaa

⁵ Toropdon, Utatku mita inta kinotabiku! Intau inta nobiag nobogá kon dunia naa, piniḻí i Allah mobaḻí intau inta mooyúon kon bonu in pirisaya. Intau mita tatua in mobaḻíbí anggota in umat i Allah ná inta pinodandi i Allah kon intau mita inta kinotabi-Nea.

YAKOBUS 2:5 Referans Kwoze

MATIUS 5:3

“Pia in kamang in intau inta nobogá kon tayowon i Allah, sin mosia tua inta mobaḻí umat i Allah.

LUKAS 6:20

Ki Yesus inimindoi kon dumodudui-Nea mita bo nosingog nanaa, “Pia in kamang in moiko, intau mita inta nobogá, sin moiko nion in umat i Allah!

WAHYU 2:9

Kinotaauan-Kubí in yoyiga mita monimu; Kinotaauan-Kubí kon moiko in nomasiking – táe sabanarnea moiko nion in nooyúonbí! Kinotaauan-Kubí doman in bayongan inta pinonapud kon i monimu i intau mita inta dumuí intau in Yahudi, bokaka deemanbí; mosia tua in dumoduduibí in Ibilis!

KORINTUS 2 8:9

Sin moiko in totokdon in nonotaau kon kita in totokbí in kinotabi i Yesus Kristus, Tuhan naton. Sia in nooyúonbí, táe sinumon intau bogá sin lantaranbí moiko, sinbá moiko in mobaḻí mooyúon.

LUKAS 12:21

Natua in mobaḻí kon intau inta moibog mooyúon bo rinut. Mosia in diábí moramuji bá mooyúon kon tayowon i Allah.”

PETRUS 1 1:4

Kita in moharap mako sinbá mokouḻí kon barakat mita inta ain sinadia i Allah kon umat-Nea. Barakat mita tatua ain sinagú-Nea kon soroga, sahingga in diábí mogoguyaat, ande mobongkog ande mobaḷui.

YAKOBUS 1:12

Kosanangdon in intau inta motaba wakutu in kinoantugan in sobaan. Sin aka sia bo mokotahangdon kon sobaan tatua, yo tarimaanneabí in bungainea. Bungainea tua in kobiagan inta ain pinodandi i Allah kon intau inta motabi kon i-Nia.

IBRANI 11:26

Irai Musa kon diábí nongonu in singkuḻeon sin mopirisaya kon i Datu Mopoposaḷamat inta pinodandi i Allah dika in mokouḻí kon bayongan kapunyaan kon butá in Mesir, sin iharap mako i Musa tua in kapunyaanbí kon singgai moiduduimai.

LUKAS 12:32

“Moiko inta tongá topiḻik, dikabí moondok! Sin mosanangbí in gina i Amámu in mobogoi in barakat kon i monimu kon bonu in kawasa-Nea.

KORINTUS 1 2:9

Tongá soaḷ tatua ain bidon noipais kon Buk Motusi, “Onu inta diá kon dodai in onda inontong andeka dinongog in intau, bo diá doman dodai onda in kinoraian intau, tuatabí in sinadia i Allah kon bayongan intau inta motoindudui kon i-Nia.”

MATIUS 25:34

Bo Datu tatua in moguman kon i monia inta kon dotá in koḷanan-Nea, ‘Igai, in moiko inta binarakatan i Amá-Ku, tuotdon kon dodatuan inta aindon sinadia kon i monimu kon wakutupa in dunia naa bagupa binaḻí.

WAHYU 21:7

Intau mita inta mountung, mokouḻí kon soaḷ mita natua nongkon i-Nakó, bo Akuoi in mobaḻí ki Allahnea, bo sia in mobaḻí ki adí-Ku.

YAKOBUS 1:9

Intau in Keresten inta nobiag nobogá, kosanangbí aka sia in poḷantudon i Allah.

TIMOTIUS 2 4:8

Bo tanaa mako in pinopooḷatdon mako kon inakó in saḷaku intau inta nountung. Kon singgai ponantúan ki Tuhan, hakim inta moadil totok tua in moposarakan in tombuinag tatua kon inakó. Deemanbí doman tongá akuoi in motarima kon tombuinag natua, táe bayonganbí doman intau inta umuran mogoḷat mako kon koangoian bui i Tuhan.

KORINTUS 2 6:10

Umpakabí pinokuyang monia in gina nami, táe umuranbí moḷunganga in gina nami. Kami in koontongan nobiag nobogá, táe nobayongdon intau in binaḻí nami nooyúon. Koontongan kami diá kon onu bo onu, táe sabanarnea bayongan rupa-rupa oyúonbí kon i nami.

WAHYU 3:18

Tuamai naa in tonggina-Ku kon i monimu, potaḷui kon buḷawan kon i-Nakó, buḷawan taakan sinbá mobaḻídon mooyúon in moiko. Bo potaḷui doman kon ḷambung mobudó kon i-Nakó, sinbá mogiḷambungdon in moiko bo awak monimu inta nopilang bo mokooyá in kooḻingoiandon. Bo potaḷui domandon kon undam poḻepo kon mata sinbá mokoontongdon in moiko.

TIMOTIUS 1 6:18

Ponorop domandon kon i monia sinbá mosia in mopoontong in aid inta mopia. Kobayongdon in mogaid kon inta mopia, mokopopia kon gina bo moibog mobogoi.

LUKAS 16:25

Táe ki Abraham in notubag, ‘Uḻe, toropdon adíku: iko aindon nokorasa kon bayongan inta mopira wakutu iko nobiagpa kon dunia, táe ki Lazarus naa in tongábí nokorasa kon bayongan inta diá mopia. Manangka intua tanaa mako sia in mokouḻí kon inta mopia kon naa. Yo iko in mokouḻí kon roriga.

MATIUS 11:5

Moiko ain nokoontong: intau bilog mokoindoi, intau ḻempeng mokobayá, intau pinanyaki kuḻit inta mokorongó nopia, intau bongoḷ mokodongog, intau minatoi in nobangon bo Habar Mopia pinoyaput kon intau mita bogá.

SAMUEL 1 2:30

Akuoi, ki Tuhan Allah in Israel, koḻipod ain nodandi, kon motoḷuadímu bo bui inanakanmu in mogundoi kon i-Nakó mobaḻí imang mononoi. Táe tanaa in kinodoí-Kudon intua! Sin ki inta mohoromat kon i-Nakó in horomaton-Kubí táe inta mopoonagmai kon i-Nakó, in pokoonag-Kubí doman.

PETRUS 2 1:11

Aka natua, dá moiko in motaaudon totok tumuot kon dodatuan inta mononoi nongkon i Tuhan bo Datu Mopoposaḷamat naton ki Yesus Kristus.

TIMOTIUS 2 4:18

Totuubí kon ki Tuhan in momilatbí kon inakó nongkon bayongan tomayá moraat, sahingga in diaan-Neabí in akuoi tumuot kon dodatuan-Nea kon soroga takin saḷamat. Tuamai in tantúbí dayow in Sia modapot in kopaḷutan dunia naa! Amin.

TESALONIKA 2 1:5

Bo noniatadon kon naa kon moadilbí totok in pononantú i Allah: Lantaran moiko bo nobiagdon nororiga sin popisí noramuji tumuot kon Dunia Mobagu i Allah, dá moiko in patusdon tumuot kon dunia tatua.

EPESUS 3:8

Kon sigad in bayongan umat i Allah, yo akuoibí naa in totok in mokooyá. Táe ki Allah ain noponotabi in oaidan tanaa kon inakó; oaidan mopoyaput in Habar Mopia soaḷ kaoyúonan i Kristus inta diá modai-dait;

SURAT I PAULUS KON JAMAAT RUM 8:17

Dá, aka kita ki adí mita i Allah, yo kita naa in intaubí mita inta mogogabat-Nea bo inta motarima kon barakat mita inta ain sinadia i Allah kon i adí-Nea mita. Kita in noyotakin i Kristus motarima kon onu inta ain sinadia i Allah kon i-Nia; sin aka kita bo mokorasa kon roriga takin i Kristus, yo kita in pomuliaanbí doman moyotakin-Nea.

LUKAS 16:22

Diá noonggot kon tua minatoi in intau bogá tatua bo dinia in malaekat mita pinobayá in tampat inta mopia kon diug i Abraham kon soroga. Natua doman in intau inta nooyúon tatua, minatoidon doman bo iḷobong.

ZAKHARIA 11:7

Akuoi, ki Zakharia, inuboḻian in mopopotaḷui mita kon domba sin moḷukad kon domba mita inta ratáan. Oyúon in tungkudku; tobatú in sinangoianku “Totabi” bo tobatú in “Bogotan”. Onda intua akuoi in nomangkoidon noḷukad bo nonompia kon domba mita tatua.

YESAYA 29:19

Intau mita bogá bo mokooyá in mokorasadon bui kon kobiagan mopia inta inogoi i Allah inta mokudus Allah in Israel.

YESAYA 14:32

Onu in potubag naton kon totabá mita inta namangoi nongkon bangusa in Pilistin? Kita in mopotaau kon i monia kon ki Tuhan ain noposindog in Sion, bo umat-Nea inta nororiga in ḷukadanbí kon tua.

AYUB 34:19

Sia in doíbí dumotá kon datu mita, andeka mopouna in intau nooyúon nongkon intau nobogá. Sin mosia komintan in Siabí in nomaḻí.

AYUB 34:10

Ei intau mita inta moarip, indongogai! Umpaka dá ki Allah Inta mokawasa totok mogaid kon moitaḷá?

IḶUAIAN 20:6

Táe Akuoi in mopoontongbí in tabi-Ku kon ribuan buí in intau mita inta motabi kon i-Nakó bo inta motoindudui kon parenta-Ku.

YAKOBUS 1:16

Utat mita inta kinotabiku, dika moibog koakaḷan in moiko!

TESALONIKA 1 2:12

Kami umuran mononggina bo mobogoi in moginrigon kon gina monimu bo mondodak sinbá moiko in moidudui kon inta kinoibog i Allah. Inoiní-Nea in moiko sinbá mobaḻí umat kon Dunia-Nea inta Mobagu bo mokorasa kon kawasa-Nea inta moḷoben.

EPESUS 1:18

Poigumonku doman kon i Allah, sinbá bukáan-Nea in raian monimu sahingga in mobayagdon bo komangaḻeandon monimu in onu inta motaau harapon monimu nongkon i Allah inta nogoiní kon i monimu. Bo bá kotaauandon doman monimu kon mobayongbí totok in barakat mopia inta sinadia i Allah kon umat-Nea;

KORINTUS 2 4:15

Tua komintan in lantaranbí kopontingan monimu. Sin aka mobayong in intau monotaau kon totabi i Allah, yo mobayong doman in mopoyaput in sukur kon i Allah; dá ki Allah in dayowon totok.

YOHANES 7:48

“Oyúondon degá in kon sigad in itoi mita naton andeka intau in Parisi in nopirisaya kon i-Nia?

LUKAS 22:29

Ná ki Amá ain nobogoi kon i-Nakó in hak momarenta, dá Akuoi in mobogoi in hak tatua kon i monimu.

MARKUS 7:14

Bo ki Yesus nogoiní kon intau mobayong tatua bo noguman bui kon i monia, “Indongogai sinbá komangaḻean monimu!

ZAKHARIA 11:11

Kon singgai doman tatua dodandian tatua irabutdon. Mopopotaḷui mita in domba tatua monaridimai kon inakó, bo mosia in nonotaaudon kon ki Tuhan in koyogotdon in mosingog pinongin bayongan in aidku.

ZEPANYA 3:12

Kon tua pomayá-Kudon mako in mogutun in tobatú bangusa inta moompá in dodia, inta mopongata in totuḷung-Ku. Mosia in motaaubí in mogutun kon tua.

AMSAL 8:32

Tuamai, indongogaidon in akuoi, ei intau mita inta mongobagupa! Duduiaidon in topotundúku, dá mosanangbí in iko.

AMSAL 7:24

Tuamai, adí mita, indongogaidon in akuoi. Tondudutdon in tongginaku mita.

AYUB 38:14

Bayag in singgai noposimantagmai in buḷud bo ḷopá naonda bo toimpaḷot kon butá ḷamentong bo pinongopían kon jubah tobatú.

DATU MITA IMITÁNEA 22:28

Guman i Mikha, “Aka ki tuang datu bo mobui takin mosaḷamat, dá mangaḻenea kon tua kon ki Tuhan in diábí nosingog pinongin inakó! Bayongan intau kon naa in nobaḻí sakusi.”

OUMAN IN RASUL MITA 7:2

Dá ki Stepanus in nosingog, “Guyanga mita bo utat! Indongogaipa in singogku naa: Wakutu in mogoguyang naton ki Abraham diápa nomamping kon Haran, wakutu intua sia in nogutunpa kon Mesopotamia, bo ki Allah inta totok in moḷantud in namangoi kon inia

HAKIM MITA 9:7

Naonda in dinongog i Yotam in soaḷ tatua, sia minayá sinimindog kon tudu in Buḷud Gerizim, bo nomaḷú kon intau mita tatua, “Indongogai in akuoi, ei intau mita in Sikhem, sinbá indongogan domandon i Allah in moiko!

SAMUEL 1 2:8

Nongkon roriga binuat-Nea in intau inta diá koonu bo onu, nongkon roriga pinoḷuat-Neadon in intau inta mokooyá. Mosia in binaḻí-Nea yobayat in intau mita moḷoben, bo inogoian in tangoi moḷantud. Aip in butá naa ki Tuhanbí in kitogi, kon ḻimonikannea pinosindog-Nea in dunia.

AMSAL 13:7

Oyúon in tumangoi nooyúon, bokaka diá koonu bo onu; oyúon in ḷumabit nobiag bogá, bokaka nooyúon totok.

YAKOBUS 1:19

Utat mita inta kinotabiku, tarukira kopira in naa! Pomuḷoi in intau musti ḻimikat in mokidongog, tongá mokopoḷaḷoi in mosingog bo donaai doman baḷú tumorú.