YAKOBUS 1:2 - Alkitab Singog In Mongondow Masa In Tanaa

² Utatku mita! Aka moiko bo mokouḻí kon sobaan morupa-rupamai, yo anggap intua tobatú kopiaan.

YAKOBUS 1:2 Referans Kwoze

YAKOBUS 1:12

Kosanangdon in intau inta motaba wakutu in kinoantugan in sobaan. Sin aka sia bo mokotahangdon kon sobaan tatua, yo tarimaanneabí in bungainea. Bungainea tua in kobiagan inta ain pinodandi i Allah kon intau inta motabi kon i-Nia.

PILIPI 1:29

Sin moiko inogoian bidon i Allah in totabi inta deemanbí tongá mopirisaya kon i Kristus, táe poḷatbí doman motanggung kon roriga-Nea.

PETRUS 2 2:9

Dá kotaauanbí i Tuhan in moposaḷamat kon intau mita inta dinumudui kon ibog-Nea aka mosia koantugan in sobaan mita. Bo kotaauanbí doman i Tuhan in motagú kon intau mita inta moraat sin sikisaan kon Singgai Ponantúan,

KOLOSE 1:24

Tanaa mopiabí in ginaku in mororiga sin kopontinganmu. Sin aka awakku bo mororiga, yo tua in mangaḻenea akuoi nogintompodon kon roriga inta diápa kinorasaan i Kristus, sin kopontingan in jamaat saḷaku awak-Nea.

WAHYU 2:10

Dikabí moondok kon yoyiga inta diádon moonggot in musti korasaan monimu. Pokotorop, oyúon in tongonumai intau kon sigad monimu in potuoton Ibilis kon bonu in ponjara sin mosoba kon i monimu. Moiko in mokorasa kon yoyiga kon bonu in mopuḷú nosinggai. Táe kotoinduduibí tantú in moiko kon i-Nakó modapot in matoi, dá moiko ogoian-Ku in kobiagan mononoi saḷaku tombuinag sin nountungdon.

OUMAN IN RASUL MITA 5:41

Rasul mita tatua in nobuidon nongkon sidang agama tatua takin pia in gina, sin kinotaauan bidon monia kon natuabí in mobaḻí dumodudui i Yesus. Patusbí in mosia motarima kon singkuḻe lantaran ki Yesus.

IBRANI 10:34

Bo moiko in noitakin doman nokorasa kon koajar in gina monia inta kinurung kon ponjara. Bo wakutu in kapunyaan monimu nodait inagow, diá noyaat in gina monimu, sin kinotaauandon monimu kon oyúonpabí in mopia-pia nongkon tua bo inta mononoi totok.

PILIPI 2:17

Matoikabí in akuoi sin mobaḻí kuruban in sambayangmu kon i Allah inta pinirisayamu, yo diábí moyaat in ginaku kon i monimu.

SURAT I PAULUS KON JAMAAT RUM 5:3

Deemanbí doman tongá tua, moḷungangabí doman in gina naton aka kita bo koantugan in roriga, sin kotaauan bidon naton kon roriga tatua in mokopomukábí kon ibog mogaid totu-totuu.

YAKOBUS 1:16

Utat mita inta kinotabiku, dika moibog koakaḷan in moiko!

YAKOBUS 1:19

Utat mita inta kinotabiku, tarukira kopira in naa! Pomuḷoi in intau musti ḻimikat in mokidongog, tongá mokopoḷaḷoi in mosingog bo donaai doman baḷú tumorú.

YAKOBUS 5:11

Mosia in sinangoi nosanang sin notaba. Dinongogdon monimu in soaḷ kososabar i Ayub, bo kinotaauan monimu kon pangabisannea binarakatan i Tuhan in sia. Sin tabi i Tuhan in totok moḷoben bo Sia in mopia in gina.

PILIPI 2:18

Ná doman tua, ibogonku in mosanang doman gina monimu takin ginaku.