WAHYU 8:7 - Alkitab Singog In Mongondow Masa In Tanaa

⁷ Malaekat muna in nogirup kon torompetnea, dá uyan in eis bo tuḷu noyobauk in dugú norogot totok noḷabú monag kon butá. Bo sepertiga in dunia naa nodait nopokak, ná doman tua, sepertiga doman in kayu bo bonok in noḷaḷow.

WAHYU 8:7 Referans Kwoze

WAHYU 9:4

Mosia tua in diábí inogoi momoguyaat kon bonok, ande kayu mita, ande pinomuḷa ibanea mako. Táe ogoibí in mosia mogaḷow kon intau mita inta diá kinompitan in meterai i Allah kon pogotnea.

YEHEZKIEL 38:22

Sia in hukumon-Kubí in yampoi in takit bo mosiḻimodan. Uyan morogot bo uyan in eis, tuḷú bo balerang in popobutak-Kubí kon inia bo kon tontaranea bo kon mobayong in bangusa inta dinumugang kon inia.

WAHYU 9:18

Sepertiga intau kon dunia naa kinoḻimodan in roriga toḷu inta noiantug tatua. Toḷu in roriga tua in; tuḷu, poyok, bo balerang inta iḷumuai kon bibig in kabaḷo mita tatua.

WAHYU 9:15

Dá binuḻiandon in malaekat opat tatua. Mosia tua in sinila-silaiandon in tugas, oyúon kon jam, kon singgai, kon buḷan bo kon taong sin moḻimod kon sepertiga nongkon bayongan in intau inta kon dunia naa.

YESAYA 28:2

Ki Tuhan in mopotabábí mangoi kon intau tobatú inta moropot bo motorindog. Koangoinea in naonda bo deḷang kotaki-takin in uyan eis, naonda bo uyan morogot bo ḷunud inta mokoiḻig. Pongin ropotnea pogambatnea in mosia kon butá.

MAZMUR 105:32

Sia in nopoonag in uyan eis, bo nopoangoi in kilat inta monampí magí mako.

WAHYU 16:21

Uyan eis moḷoben, inta toḷoḻima nokilo in kosibuḷnea, noḷabú nongkon ḷangit bo noidantug kon intau mita. Dá mosia in nohojat kon i Allah popisí bodito uyan eis inta totok in motoyang tua.

YESAYA 32:19

Totuu mosanang in moiko komintan sin tugat in tubig kon pinomuḷamu, bo bobiagonmu in kon ondakabí in bayáannea pongaanan takin diá in monuyayow. Táe musungmu in nádon onda bo kayuon inta inonag in uyan batu bo kotá monia in rumbunon.

YESAYA 30:30

Ki Tuhan mopodongogbí in singog-Nea inta momulia, bo pomuḷoi in intau in mokorasabí kon kawasa-Nea inta motoyang. Torú-Nea in mokopoangoibí kon tuḷú inta mokopokak, uyan morogot, uyan batu bo deḷang.

YESAYA 29:6

Ki Tuhan Inta Totok in mokawasa mopoḷuatbí in kotá tatua pongin deḷang bo ḻinug inta motoyang totok. Sia in mopoangoibí in deḷang bo tuḷú inta tumagab.

YOSUA 10:11

Kon tungkuḷ in intau mita in Amori nosiḻig kon buḷud tatua sin moḷagui nongkon tontara mita in Israel, ki Tuhan nopoḷabú in uyan eis inta moḷoben nongkon ḷangit kon i monia kinoouputbí in daḷan nodapot kon Azeka. Inta minatoibí kinoḷabúan in uyan eis in mobayo-bayong nongkon inta iḻimod in intau mita in Israel.

WAHYU 16:2

Malaekat inta muna in minayá bo nopobutak bonu in palonea tatua kon tudu in butá. Dá nomukádon in bituḷ mita inta mokoondok bo mokobahaya kon intau mita inta oyúon in tanda in mahaḷuk mita tatua bo kon intau mita inta nosumba kon patongnea.

WAHYU 12:4

Iputnea pinomorotnea, sahingga sepertiga in tundi nongototak kon butá. Naga tatua in simindog mako kon tayowon in bobay inta koyogot mononggadí tatua; sin monomayá moḻiom kon adí tatua aka pononggadídon i inánea.

WAHYU 6:8

Bo inontongku in tobatú kabaḷo inta nobilai. Ki inta sinumakoi tua tangoinea in ki Maut. Bo dumuduianmai kon inia in dodatuan popatoi. Tokoar in kawasa kon dunia naa in pinosarakan kon i monia, sinbá mosia in motaau moḻimod popototoi kon parang, malarat bo popototoi kon takit mita bo popototoi kon mahaḷuk mita inta mokokaan kon intau.

PETRUS 1 1:24

Kon bonu in Buk Motusi pinaisdon nanaa: “Bayongan in intau kon dunia naa naonda bo bonok, bo bayongan in kamuliaannea naonda bo bungai in bonok. Bonok moḷaḷow, dá bungainea in mototak doman;

YAKOBUS 1:11

Kon dodai mata in singgai momuká bo mopatúdon totok, yo moḷaḷow in bonok tatua sahingga in bungainea moḷabúdon bo diá domandon mopira. Natua doman intau nooyúon, morimumud in sia kon dodai in sia yogot mopobayá in totayaknea.

YOËL 2:30

Kon ḷangit bo kon butá mobayong in aidan-Mu in inta mokoherang. Moḷoḻimodan, dokot in tuḷú bo kapungan in poyok.

IḶUAIAN 9:33

Bo ki Musa in nonaḷámaidon kon i datu bo minayá in ḷuai in kotá; kon tua sia notonggó kon ḻimanea sin mosambayang kon i Tuhan. Kon dodaipa doman tatua nogogaidon in gotup, uyan eis bo diádon nonguyan.

WAHYU 7:1

Nopaḷut mako kon tua, akuoi in nokoontong kon malaekat opat inta sinimindog kon siku in dunia opat. Mosia in nomompon kon tompot inta nongkon siku opat in dunia naa sinbá diádon in tompot mogirup kon toba, kon dagat bo kon kayu mita.