WAHYU 8:5 - Alkitab Singog In Mongondow Masa In Tanaa

⁵ Nopaḷut mako kon tua malaekat tatua in nogamá kon tampat pototubáan kon kamania bodongka binonuannea in tuḷu inta nongkon tampat pobobogoian kon sosumba. Nopaḷut mako pinogarabnea kon butá naa. Dá totokdon nonggotup bo nongilat inta moyodudu-duduimai bo nobaḻídon in ḻinug.

WAHYU 8:5 Referans Kwoze

WAHYU 11:19

Dá nobukatdon in Baḷoi Allah kon soroga, bo kinoontongandon in Poti Dodandian kon bonunea. Bo nongilatdon moyo-moyodudui bo gonugur in gotup inta modowawá mako, takin doman ḻinug bo uyan eis inta totok morogot.

WAHYU 4:5

Nongkon tampat pomomarentaan tatua noisindar magí in kilat bo iḷumuai in singog in gotup inta moyo-moyodudui. Bo kon tampat pomomarentaan tatua oyúon in poḷombow pitu inta koyongki-yongkit; tuata in Roho i Allah taya pitu.

OUMAN IN RASUL MITA 16:26

Daḻíbí bo nobaḻí in ḻinug inta totok in moropot nodapot pondasi in ponjara tatua nodandú doman. Bayongan in ḷoḻingkop nobukat bo rante mita inta pinotogot kon bayongan intau inta pinonjara nongobuká.

YESAYA 29:6

Ki Tuhan Inta Totok in mokawasa mopoḷuatbí in kotá tatua pongin deḷang bo ḻinug inta motoyang totok. Sia in mopoangoibí in deḷang bo tuḷú inta tumagab.

MAZMUR 18:13

Nongkon kilat inta kon tayowon-Nea, iḷumuaidon in goḷom, uyan eis bo tuḷú.

IMAMAT 16:12

musti in sia mogamá kon tampat in tuḷú nongkon mezbah bo bonuannea in baga in tuḷú kopuḻingon bo doyowa noyangkom in dupa moaḷus, bodongka diaannea tumuot kon Yuang Totok Motusi.

WAHYU 11:13

Dá dodai intua nobaḻídon in ḻinug inta totok in moropot. Bo sepersepulú nongkon kotá tatua norimumud. Pitu noribu intau minatoi wakutu in ḻinug tatua. Intau mita ibanea in totokdon in noondok, dá nodayowdon in mosia kon koḷoḷoben in kawasa i Allah inta kon soroga.

WAHYU 6:12

Bo akuoi in nokoontongdon bui kon i Adí in Domba tatua nomukat kon meterai inggonomnea. Bo nobaḻídon in ḻinug inta totok mokoondok kon dunia naa. Mata in singgai irumondí naonda bo didit morondí inta nokasar bo buḷan sinimimpuya naonda bo dugú.

OUMAN IN RASUL MITA 4:31

Bo naonda in mosia nosambayang, tampat pinoyosipunan monia tatua in nodandú bo mosia komintan in kinawasa in Roho i Allah, dá mosia in diádon inangoian ondok in nopotaau in Pirman i Allah.

LUKAS 12:49

Ki Yesus in noguman nanaa, “Akuoi in mamangoi modia kon tuḷu kon dunia naa. Mopia totok aka tuḷu tatua bo modokotdon!

MATIUS 24:7

Sin bangusa bo bangusa mosiparangan bo dodatuan moparang doman takin dodatuan. Moiangoi in wakutu kon bayongan intau kodaitan in kaanon bo ḻinug kon bayongan tampat.

YESAYA 66:6

Indongogai! Oyúon in singog in gonugur kon kotá; oyúon in singog nongkon Baḷoi-Ku; tuata in singog-Ku inta koyogot motuḻí kon musung!

YESAYA 30:30

Ki Tuhan mopodongogbí in singog-Nea inta momulia, bo pomuḷoi in intau in mokorasabí kon kawasa-Nea inta motoyang. Torú-Nea in mokopoangoibí kon tuḷú inta mokopokak, uyan morogot, uyan batu bo deḷang.

DATU MITA IMITÁNEA 19:11

“Ḷuaidon kon angob tanion,” guman i Tuhan kon inia, “bo sindogdon tayow kon i-Nakó kon tudu in buḷud.” Bo ki Tuhan sinumaḻib kon tua, inunaan in tompot inta nogirup noropot totok nodapot in buḷud mita nongo botak bo buḷud mita batu in nongoḷosi. Táe ki Tuhan in diábí nokipogontong kon bonu in tompot tatua. Naonda in tompot tatua nooyong, nobaḻídon in ḻinug, táe ki Tuhan in diábí doman nokipogontong kon bonu in ḻinug tatua.

ZAKHARIA 14:5

Moiko in moḷaguibí mongin ḷopá inta nomotak kon tombuḷud tatua nobaḻí doyowa. Moiko in moḷaguibí ná mogoguyangmu kon tungkuḷ in ḻinug kon dodai in ki Uzia datu in Yohuda. Bo namangoidon in ki Tuhan Allahku, sinakinan in bayongan in malaekat.

YEREMIA 51:11

Ki Tuhan in nopotabádon kon datu mita in Media, sin moibog in Sia morimumud kon Babel. Natuata in pototuḻínea kon aid in intau mita inta norimumud kon baḷoi-Nea. Porwira mita in tontara in parang nomarenta, “Iḷanitai in piot! Podia kon kaḻeaw!

IḶUAIAN 19:16

Kon singgai inta nogintoḷu, dodai in doḷo-doḷomneapa nonggotup bo nongilat. Goḷom inta mobunod noitukatdon kon tudu in buḷud bo kinodongogandon singog in torompet inta totok in moḷangon. Bayongan in intau kon ḷoḷaigan urot mako sin moondok.

WAHYU 8:3

Tobatú malaekat ibanea inta nodia kon pototubáan kon kamania inta pinomia nongkon buḷawan, namangoi bo sinimindog kon tayowon meja pogogukatan kon sosumba. Sia inogoian in kamania nobayong sin potakin kon sambayang mita in bayongan umat i Allah bo posumba doman kon meja pototuduan kon sosumba inta kon tayowon tampat pomomarentaan.