WAHYU 7:17 - Alkitab Singog In Mongondow Masa In Tanaa

¹⁷ Sin ki Adí in Domba inta iḻimitú kon tampat pomomarentaan tatua in mobaḻí gombala monia, bo diaan-Nea in mosia mayá kon bokaká in tubig inta mokobiag. Bo inggamáandon i Allah in bayongan ḷuá kon mata monia.”

WAHYU 7:17 Referans Kwoze

YOHANES 4:14

táe intau inta monginum kon tubig ogoi-Ku in diá bidon moyoga-yogang, sin tubig inta ogoi-Ku kon inia in mobaḻí bidon bokaká kon bonu in awaknea, bo umuran ḷumuai bo mobogoi in kobiagan mononoi.”

YOHANES 4:11

Dá bobay tatua in noguman doman, “Diá in totayuk i Tuang bo nodaḷom totok in parigí tanaa. Kon ondabí in kouḻían i Tuang kon tubig inta mokobiag tua?

WAHYU 22:1

Bo malaekat tatua in nopoontong doman kon inakó in ongkag inta mobogoi in kobiagan. Ongkag tatua in nosilang totok naonda bo kristal inta moiḻig nongkon tampat pomomarentaan i Allah bo i Adí in Domba tatua,

WAHYU 21:4

Paḻitandon i Allah in bayongan ḷuá kon mata monia. Diá bidon in popatoi. Diá bidon in mokoajar kon gina. Amui ande ombaḷ onu inta mokonakitpa kon gina in diá bidon. Soaḷ mita inta nokoyongandon ain noinggamá.”

MAZMUR 23:5

Iko in nogoḷud kon pongaananku, kon tayowon in musungku. Iko in notomu kon inakó naonda bo mokokiangoi inta ihoromat. Iko in nobogoi kon inakó in oinumon mobayong totok inta mopia.

WAHYU 21:6

Bo Sia in noguman, “Komintandon nobaḻí! Akuoi naa in ki Alpa bo ki Omega, ki Inta muna-munamai bo ki Inta tumi-tumimai, Akuoibí naa in ki Tuhan nongkon pinomangkoian nodapot in pangabisan. Intau inta moyogang in poinumon-Ku, bo tongábí ogoi pomorosen nongkon bokaká inta mobogoi in kobiagan.

YOHANES 10:11

Akuoibí naa in Gombala inta mopia. Gombala mopia in mobogoibí in nyawanea sin kopontingan in dombanea mita.

YESAYA 25:8

Ki Tuhan Inta Totok in mokawasa in monginggamábí kon popatoi modapot in mononoi! Sia in momopatbí kon ḷuá nongkon bayongan in pogot, bo mopoyayú in kohohina inta binaba in umat-Nea kon sinangkub in butá. Ki Tuhan ain nosingog, bo tua in notantúbí kon mobaḻí.

YOHANES 10:14

Akuoibí naa in gombala inta mopia. Notongkai ná kinototaau i Amá kon i-Nakó bo kinototaau-Ku kon i Amá, dá natua doman in kinototaau-Ku kon domba-Ku mita bo mosia in nonotaau doman kon i-Nakó. Akuoi in moposarakan in nyawa-Ku sin kopontingan monia.

YEREMIA 2:13

Umat-Ku ain nogaid kon doyowa norupa in dosa: mosia in nonoḻikud kon i-Nakó, bokaká in tubig mobogoi in kobiagan kon intau; mosia in nogaid kon tabang noḷombang inta diá mokosion kon tubignea.”

YEHEZKIEL 34:23

Akuoi in moduíbí kon datu tobatú inta ná mogogundoi-Ku ki Daud, sin baḻíon-Ku gombala monia totobatú tua, bo sia in moḷukad kon i monia.

WAHYU 5:6

Noiduduimai bui kon tua akuoi in nokoontong kon tobatú ki Adí in Domba sinimindog kon yua-yuak in tampat pomomarentaan tatua bo iḻibu in mahaḷuk opat bo bayongan itoi tatua. Ki Adí in Domba tatua in nádon onda bo ain iratá. Pitu in tungoi-Nea bo pitu doman i mata-Nea. Tuata in Roho i Allah inta ain pinotabá-Nea kon bayongan dunia naa.

MATIUS 2:6

Bo iko Betlehem, butá i Yohuda, iko in deemanbí totok in mointok kon sigad monia inta nomarenta kon Yohuda. Sin nongkon inimubí naa moisindog in tobatú intau inta mobaḻí itoi, Sia inta moḷukad kon bayongan umat-Ku kon Israel.”

YESAYA 12:3

Naonda bo tubig motumping mokoguḻí kon rogang in intau, natuata in moiko in moposanang kon gina, popisí in pinosaḷamat i Allah.”

MAZMUR 28:9

Posaḷamatdon in umat-Mu, o Tuhan, barakataidon in intau-Mu mita. Kobaḻídon naonda bo gombala kon i monia, bo ḷukadaidon in mosia modapot in mononoi.

MIKHA 5:4

bo Sia in mobogoi in kobiagan modame. Aka tontara in Asyur monubu kon butá naton bo mondangat kon poḷoḷukadan naton, yo itoi mita naton inta moropot totok in potabádon momarang kon i monia. Itoi mita naton tatua in monaḷowdon kon Asyur podoyon kon ropot in pakakat in parang, bo moposaḷamat kon i naton nongkon kawasa monia.

YESAYA 60:20

Kon inimu in oyúonbí in mata in singgai inta diádon tumoyo-toyop, bo buḷan inta diá kon dodai in onda in tumoyop. Sin Akuoi ki Tuhan in nobaḻí mononimbayag mononoi kon inimu wakutumu mononogumatoi in mopaḷutdon.

YESAYA 49:9

Intau inta pinonjara pinoki poḷuaian-Ku; inta kon tampat mosindip diaan-Ku mayá in mobayag. Nodapot in inta kon tombuḷud inta noḷogat mosia in diábí kodaitan, kon kinoouput in daḷan oyúonbí in kaanon.

YESAYA 35:10

Intau mita inta pinoḷuat i Tuhan in mobuibí; mosia in tumuot kon kotá in Yerusalem takin giow, pogot monia in moḷumbá popisí in ḷunganga in gina inta mononoi. Mosia in moḷunganga in gina bo morame; robonoḷ in gina bo amui moinggamádon komintan.

YESAYA 30:19

Ei moiko inta nogutun kon Yerusalem, moiko in diábí tantú mongombaḷ. Ki Tuhan in monotabibí, bo ḷagidon motubag kon i monimu aka moiko mokuani mokituḷung kon i-Nia.

YESAYA 25:6

Kon Buḷud in Sion, ki Tuhan Inta Totok in mokawasa in mosadia kon pongaanan in bayongan in intau kon dunia. Inoḷudan-Nea in kaanon inta totok in mopia in nanamnea bo anggur inta piniḻí.

WAHYU 4:11

“O Tuhan, o Allah nami! Tongábí Iko in patus motarima kon dodayow, horomat bo kawasa. Sin Ikobí in nogaid kon bayongan in yagi-yagi, bo lantaranbí doman ibog-Mu dá bayongan in yagi-yagi tua ain nobaḻí bo nobiag.”

PETRUS 1 5:2

ḷukadaibí monimu kopiaraan in domba i Allah inta ain pinosarakan kon i monimu. Ḷukadai takin sanang in gina ná inta kinoibog i Allah, dikabí tongá pakisa in gina. Bo dika doman mogaid kon oaidan tatua tongá sakadar motayak kon kauntungan tontaní, táe aidaibí intua sin lantaranbí moiko totu-totuubí moibog mopobayá in oaidan i Allah.

OUMAN IN RASUL MITA 20:28

Manangka intua yo mokopopiadon in moiko bo umuran moḷukad kon awak monimu bo poḷat doman ḷukadai in bayongan umat i Allah inta ain pinosarakan i Allah kon i monimu sinbá ḷukadan. Sin moiko nion ain sinantú in Roho i Allah mobaḻí moḷoḷukad bo mononompia kon umat i Allah inta ain sinobut-Nea in dugú i Adí-Nea tontaní.

MIKHA 7:14

O Tuhan, ḷukadaidon in umat-Mu, umat inta piniḻí-Mu. Mosia in nogutun noitontaní kon kayuon mai-maí, kon yuak in butá inta mopia. Biódon mako in mosia mokouḻí kon kaanon kon rawang bonok in Basan bo kon Gilead ná dungkuḷmai.

YEREMIA 31:9

Mosia in mayá takin moḷabú in ḷuá, Ḻipoion-Ku bo kapiton-Ku in mosia. Diaan-Ku in mosia mongin tampat mita inta mobayong in tubig, mongin daḷan motondodai inta diá in kopintudan. Kon i Israel, Akuoi in naonda bo ki amá; Epraim in ki adí-Ku ḷoḷaki guya-guyang.”

YESAYA 40:11

Naonda bo gombala Sia in noḷukad kon paanan-Nea; Sia tontaní in mosipun kon i monia. Ki adí mita in domba koyotan-Nea, takin moḷukó in tosingogon Sia in modia kon i indenea mita.

MAZMUR 22:26

Kon yuak in poyodungkuḷan in umat akuoi in modayow kon ini-Mu, sin bayongan in inta ain inaidan-Mu. Kon tayowon in umat inta mopirisaya posumbaku in kuruban inta pinodandiku.

YESAYA 30:25

Kon singgai benteng mita in musungmu kinopung bo intaunea mita iḻimod, batúan in buḷud bo tombuḷudnea mopoḷuaidon in tapá mita.

YESAYA 51:11

Dá intau mita inta pinoḷuat i Tuhan in mobuidon mosia in tumuot kon Yerusalem takin rogiow pogot monia in motarimbuka popisí in ḷunganga inta mononoi. Mosia in mobarasanang bo morogiow, kinopatoian bo amui noinggamádon.

YESAYA 65:19

Akuoi tontaní in mosanangbí popisí in Yerusalem, bo moḷunganga in gina popisí in intaunea. Kon kotá tatua in diá bidon in ombaḷ, bo diá bidon in kuani mokituḷung.

MATIUS 5:4

Pia in kamang in intau inta nokuyang in gina, sin mosia tua iropotanbí in ginanea!

YOHANES 4:10

Ki Yesus in notubag, “Aka kuma bo kinotaauanmu in totabi i Allah bo kinotaauanmu in ki ine in noigum kon inumon kon inimu, yo nopasti bidon kon iko tontaní in moigumbí kon tubig inumon kon i-Nia tua. Bo ogoian-Neabí iko in tubig kobiagan tatua.”

WAHYU 14:4

Mosia tua intau inta umuran nodarit naonda bo porawan, sin mosia in diábí mosiug takin bobay. Mosia in umuran dumudui magí-mako kon i Adí in Domba kon ondakabí in bayáan-Nea. Mosia in sinobutdon nongkon sigad in intau mita. Mosia tuata inta ain pinobebas bo inogoi saḷaku sosumba inta muna kon i Allah bo kon i Adí in Domba tatua.

WAHYU 21:22

Diábí inontongku in Baḷoi Allah kon bonu in kotá tatua, sin Baḷoi Allah in ki Tuhanbí tontaní, ki Allah inta totok mokawasa, bo Adí in Domba tatua.

WAHYU 21:23

Kotá tatua diá bidon paraḷu simbayagan mata in singgai ande buḷan, sin kamuliaan i Allah aindon nokosimbayag kon tua, bo ki Adí in Domba in nobaḻí togánea.