WAHYU 4:11 - Alkitab Singog In Mongondow Masa In Tanaa

¹¹ “O Tuhan, o Allah nami! Tongábí Iko in patus motarima kon dodayow, horomat bo kawasa. Sin Ikobí in nogaid kon bayongan in yagi-yagi, bo lantaranbí doman ibog-Mu dá bayongan in yagi-yagi tua ain nobaḻí bo nobiag.”

WAHYU 4:11 Referans Kwoze

WAHYU 5:12

Bo mosia in nodondong noropot nanaa, “Ki Adí in Domba inta ain iratá tatua, patusbí motarima kon kawasa, kaoyúonan, kabijaksanaan bo ropot; Sia in patusbí horomaton, poḷantudon bo dayo-dayowon!”

YESAYA 40:28

Umpaka dá iko in diá nonotaau bo diá nokodongog? Ki Tuhanbí in Allah inta mononoi, inta nomaḻí kon sinangkub in dunia. Sia in diábí kon dodai in onda in moḷopí andeka moḷungkoyó; raian-Nea in diábí motaau doḷopon.

AMSAL 16:4

Bayongan yagi-yagi inta inaidan i Tuhan oyúonbí in makusudnea; bo makusud in intau moraat tuata in bodito.

WAHYU 10:6

Sia in nongibot pinodoyon kon tangoi i Allah inta diá mato-matoi bo inta ain nomia kon ḷangit bo butá, dagat bo bayongan in tombonunea. Malaekat tatua in noguman, “Wakutunea in diá bidon sorongon bui!

WAHYU 14:7

Malaekat tatua in nomaḷú noropot totok, nanaa: “Koondokdon kon i Allah, bo pomuliadon in Sia! Sin naadon in wakutu i Allah mohakim kon dunia. Sumbadon in Sia inta ain nomia kon ḷangit, butá dagat bo bayongan in bokaká!”

WAHYU 5:9

Mosia nopodondong in tobatú dondong mobagu, nanaa: “Iko in patus mogamá kon buk tatua bo moḷosi kon meterainea mita. Sin Iko ain iḻimod, bo dugú-Mu tatua, in pinoguboḻi-Mu kon intau nongkon bayongan suku, bahasa, negara bo bangusa sin ogoi kon i Allah.

IBRANI 1:10

Ki Allah in noguman doman, “Iko, Tuhan in nongkon pinomangkoianpamai nomia kon butá, bo Iko doman in nomia kon ḷangit.

KINOBAḺIAN 1:1

Kon pinomangkoian, tungkuḷ in ki Allah nomangkoi nomaḻí kon dunia naa,

SURAT I PAULUS KON JAMAAT RUM 11:36

Ki Allah in nomia kon bayongan yagi-yagi. Komintanbí nongkon i Allah bo pinomakusudbí doman kon i-Nia. Dinayo-dayowdon in ki Allah nodapot in kopaḷutan dunia naa! Amin.

EPESUS 3:9

bo akuoi in pinaké doman i Allah mogaid kon oaidan tatua sinbá bayongan in intau monotaau kon naonda in pinogogaid i Allah inta nomia kon dunia naa, mogaid kon tomayá-Nea inta binuni-Nea kon dunia naa nongkon tungkuḷ intua.

OUMAN IN RASUL MITA 14:15

“Ei, nongonu sin moiko in mogaidbí kon nanaa? Kami naa in intaubí doman ná moiko! Kami in kon naa tongábí namangoi mopoyaput in Habar Mopia kon i monimu sinbá taḷaanmaidon monimu in soaḷ mita inta diá baraguna tanion bo mopirisayadon kon i Allah inta aindon nobiag nongkon kinopatoian-Nea, ki Allah inta nomia kon ḷangit bo butá, dagat bo bayongan inta kon bonunea.

YEREMIA 32:17

“Tuhan Inta Totok in momulia, Ikobí inta nomaḻí kon ḷangit bo butá pinongin kawasa bo ropot-Mu inta moḷoben. Diábí in tobatúmai in mororiga aidan-Mu.

MAZMUR 18:3

Ki Tuhan in naonda bo dinding inta moropot pogogadopanku. Ki Allahku in naonda bo buḷud batu pononiunganku. Naonda bo kaḻeaw inoḻingoian-Nea in akuoi, bo noḷukad kon inakó sinbá umuran in akuoi moaman.

NEHEMIA 9:5

Ibada kon singgai tua in pinangkoi in intau mita in Lewi inta noiduduimai naa: ki Yesua, ki Kadmiel, ki Bani, ki Hasabneya, ki Serebya, ki Hodia, ki Sebanya bo ki Petahya. Mosia in noguman, “Sindog bo dayowdon in ki Tuhan Allah naton! Podayowdon kon i-Nia modapot in mononoi! Dinayo-dayowdon in tangoi-Nea inta nopuḻing in kamuliaan, tangoi inta motoyang, noiḻiu kon bayongan dodayow!”

OUMAN IN RASUL MITA 17:24

Ki Allah inta nomia kon dunia bo tombonunea mita, Sia tuata in ki Tuhan in ḷangit bo butá. Sia in diábí nogutun kon baḷoi in dewa-dewa inta pinomia in ḻima intau.

SAMUEL 2 22:4

Akuoi in nokuani kon i Tuhan inta patus dayowon, Sia in nopoḷuat kon inakó nongkon musungku mita.

WAHYU 5:2

Bo akuoi in nokoontong kon tobatú malaekat inta motorindog totok nomaḷú noropot totok nanaa: “Ki ine in motaau mobuká kon ḻitodan in buk tanaa bo mobuka kon meterainea mita?”

AYUB 36:3

Mobayong in kinotaauanku; pakéonku intua sin moponiata kon moadil in Momomaḻíku.

MAZMUR 68:34

kon i-Nia inta nongin baḷangon dungkuḷmai. Indongogai! Ki Tuhan in nosingog, singog-Nea in moḷangon totok.

IBRANI 1:2

Táe kon singgai tumi naa in ki Adí-Neadon tontaní in pinotabá-Nea nopoyaput in singog-Nea tatua kon i naton. Ki Adí-Nea doman tanaa inta pinopodoyonan i Allah in nomia kon dunia naa. Sia in sinantú domandon i Allah motarima kon bayongan kapunyaan-Nea.

YEREMIA 10:11

Moiko, ei umat, musti mopotaau kon i monia kon dewa mita inta diá nomaḻí kon ḷangit bo butá tua in yopúonbí. Mosia in moinggamábí nongkon tudu in butá naa.)

YESAYA 40:26

Ḷangagdon kon ḷangit, bo taridika! Ki ine in nomaḻí kon tundi mita? Sia inta nonompia kon i monia naonda bo tontara, kinotaauan-Nea in kobayong monia, bo mogoiní kon batúannea podudui in tangoinea-tangoinea. Diábí tobatúmai in mobuḻi, popisí in moḷoben totok in kawasa i Tuhan!

ULANGAN 32:4

Ki Tuhan in mododuḷumu inta moroton, oaidan-Nea in motonggimok, bo bayongan daḷan-Nea in motuḻid. Ki Allahmu in mosatia, diábí in tombogá kon i-Nia, Sia in nogaid kon onu inta mopia bo totuu.

IḶUAIAN 20:11

Onom nosinggai, Akuoi, ki Tuhan, nomaḻí kon butá, ḷangit, dagat bo bayongan inta kon bonunea, táe kon singgai inta nogimpitu Akuoi in nogogai. Tuamai Akuoi, ki Tuhan, momarakat kon singgai in Sabat bo baḻíon-Ku singgai-Ku intua.

WAHYU 1:6

bo baḻíon-Nea tobatú bangusa in imang mita in kita, inta mogaid kon oaidan i Allah, ki Amá-Nea. Ki Yesus Kristus tuata inta momulia bo inta mongawasa modapot in kopaḷutannea. Amin!

WAHYU 19:1

Nopaḷut mako kon tua, akuoi in nokodongog kon naonda bo giow in intau mobayong inta nongkon soroga, noguman, “Dayowdon in ki Allah! Ki Allah naton inta mopoposaḷamat; Sia in Allah inta Moḷoben bo Mokawasa!