WAHYU 2:9 - Alkitab Singog In Mongondow Masa In Tanaa

⁹ Kinotaauan-Kubí in yoyiga mita monimu; Kinotaauan-Kubí kon moiko in nomasiking – táe sabanarnea moiko nion in nooyúonbí! Kinotaauan-Kubí doman in bayongan inta pinonapud kon i monimu i intau mita inta dumuí intau in Yahudi, bokaka deemanbí; mosia tua in dumoduduibí in Ibilis!

WAHYU 2:9 Referans Kwoze

WAHYU 3:9

Toropdon in naa: Intau mita inta ain nobaḻí umat in Ibilis tua, in intaubí mita mongouboḷ inta mongaku intau mita in Yahudi bokaka deemanbí. Mosia tua in aidan-Kubí sahingga in mosia mamangoi tumungkud kon tayowonmu. Bo kotaauandon monia kon kotabi-Kubí in moiko.

KORINTUS 2 8:9

Sin moiko in totokdon in nonotaau kon kita in totokbí in kinotabi i Yesus Kristus, Tuhan naton. Sia in nooyúonbí, táe sinumon intau bogá sin lantaranbí moiko, sinbá moiko in mobaḻí mooyúon.

SURAT I PAULUS KON JAMAAT RUM 9:6

Deemanbí makusudku moguman kon dandi i Allah in diádon pakéon; táe deemanbí komintan intau Israel in umat inta piniḻí i Allah.

KORINTUS 2 6:10

Umpakabí pinokuyang monia in gina nami, táe umuranbí moḷunganga in gina nami. Kami in koontongan nobiag nobogá, táe nobayongdon intau in binaḻí nami nooyúon. Koontongan kami diá kon onu bo onu, táe sabanarnea bayongan rupa-rupa oyúonbí kon i nami.

TIMOTIUS 1 6:18

Ponorop domandon kon i monia sinbá mosia in mopoontong in aid inta mopia. Kobayongdon in mogaid kon inta mopia, mokopopia kon gina bo moibog mobogoi.

LUKAS 4:18

“Roho i Tuhan oyúon kon i-Nakó, sin Akuoi in ain piniḻí-Nea mopoyaput in Habar Mopia kon intau mita bogá. Sia nopotabá kon i-Nakó mopotaau in popoḷuaian kon intau mita kon sinokodakop bo mongundam kon mata in intau mita bilog; bo mopoḷuat kon intau mita inta sinokodorot

WAHYU 2:2

Kinotaauan-Kubí onu inaidan monimu. Moiko in morajing totok in mogaid bo totok doman mosabar. Kinotaauan-Kubí doman kon kinodoíbí monimu in mosia inta moraat. Bo intau mita inta dumuí rasul bokaka deemanbí totuu rasul, aindon inuji monimu bo kinokadapatan monimu kon mosia tua in intaubí mita inta mongouboḷ.

LUKAS 6:20

Ki Yesus inimindoi kon dumodudui-Nea mita bo nosingog nanaa, “Pia in kamang in moiko, intau mita inta nobogá, sin moiko nion in umat i Allah!

SURAT I PAULUS KON JAMAAT RUM 12:12

Utat, poharapdon kon i Tuhan takin ḷunganga in gina, mokoposabar aka koantugan in susa, bo umuran posambayang.

SURAT I PAULUS KON JAMAAT RUM 5:3

Deemanbí doman tongá tua, moḷungangabí doman in gina naton aka kita bo koantugan in roriga, sin kotaauan bidon naton kon roriga tatua in mokopomukábí kon ibog mogaid totu-totuu.

TIMOTIUS 1 1:13

umpakabí tungkuḷ intua akuoi naa in umuran moponapud in diá totuu bo momogutú poḷat doman moningkuḻe kon i-Nia. Táe sinotabibí i Allah in akuoi, sin dodai intua akuoi in diápa mopirisaya, sahingga in diábí kinotaauanku onu in pinomiaku tatua, noitutui ande noitaḷá.

TESALONIKA 1 3:4

Sin kon dodai in kami koyota-yotakinpa monimu, muna bidon pinoguman nami, kon kita in pastibí mokorasa kon roriga. Bo totuu kon nobaḻídon intua komintan; kinotaauan bidon monimu intua.

KORINTUS 2 8:2

Umpakabí mosia in kinoantugan in totungkuḷ inta totok in mobogat. Táe gina monia in tantúbí noḷunganga, sin umpaka kon bonu in roriga táe moibogpabí doman in mosia nobogoi in sumbangan pinotuḷung kon intau ibanea umpaka mosia totok doman in nobiag nobogá.

SURAT I PAULUS KON JAMAAT RUM 8:35

Oyúon degá in mokomampu moḷamboi kon i Kristus aka Sia in motabi kon i naton? Kasusahan, roriga, pomogutúan, malarat, kobiagan mobogá, anib ande popatoi, tua mita degá in mokoḷamboi kon tua?

WAHYU 7:14

Dá tubagku kon inia: “Diábí kinotaauanku, ki Tuangbí in nonotaau kon tua.” Dá sia in noguman bui kon inakó: “Mosia naa in intau mita inta nosaḷamatdon nongkon roriga inta moḷoben, bo ain binatáan monia kinobudó in jubah monia kon bonu in dugú i Adí in Domba tatua.

LUKAS 22:65

Bo noyagi-yagipa doman in siningog monia inta poningkuḻe kon i-Nia.

LUKAS 12:21

Natua in mobaḻí kon intau inta moibog mooyúon bo rinut. Mosia in diábí moramuji bá mooyúon kon tayowon i Allah.”

SURAT I PAULUS KON JAMAAT RUM 2:17

Táe tanaa naonda in moiko uḻe utat? Moiko in mongaku intau Yahudi. Moiko in kinumadai kon hukum agama Yahudi bo mopia totok in gina monimu kon hubungan monimu takin i Allah.

OUMAN IN RASUL MITA 26:11

Moantó in pinogutúku in mosia kon baḷoi mita pososambayangan, pakisaanku sinbá diádon mopirisaya in mosia kon i Yesus. Totokbí moyaat in ginaku kon i monia tungkuḷ intua, noidapot in aḷowanku in mosia kon ḻipu-ḻipúannea.”

OUMAN IN RASUL MITA 14:22

Kon kotá mita tatua mosia in minayá noginrigon kon gina in intau mita inta mopirisaya kon i Yesus bo nononggina sinbá umuran mopirisaya kon i Yesus. Nanaa in tonggina monia tua, “Munapabí moantó in roriga mouḻí naton, bain tua bo mokorasa kon kopiaan kon Dunia Mobagu i Allah.”

YOHANES 16:33

Naa komintan in poguman-Ku sinbá moiko in mokouḻí kon kobiagan motompia bo moonow sin notobatú-Kudon. Kon dunia naa moyoyangpabí in moiko, táe korotonbí in ginamu, sin Akuoi in diábí taḷowon in dunia naa!”

MATIUS 4:10

Dá ki Yesus in notubag, “Bayádon iko, Ibilis! Sin aindon pinais nanaa: Iko in musti mosumba kon i Tuhan, ki Allahmu, bo tongábí Sia in motaau poibadaanmu!”

WAHYU 1:9

Akuoi ki Yohanes, ki utatmu inta kinoantugan doman in roriga inta ná noiantug kon intau mita inta mopirisaya kon i Kristus. Mustibí mokoposabar in monahang kon roriga in kita saḷaku kapunyaan-Nea. Akuoi in iḷumbú kon Pulau Patmos popisí in nopotaau in koyow inta nongkon i Allah, inta inirigonan i Yesus pinongin onu inta inouman-Nea.

WAHYU 2:13

Kinotaauan-Kubí in pinogutunan monimu. Moiko in nogutun kon tampat inta pinomarentaan in Ibilis, táe moiko in motoinduduibí kon i-Nakó. Sedang bo wakutu in ki Antipas, sakusi-Ku inta motoindudui tua iḻimod kon tayowonmu kon tampat poyoyosipunan in Ibilis, yo moiko in umuranbí doman nongaku saḷaku intau mita inta mopirisaya kon i-Nakó.

WAHYU 2:24

Táe moiko inta ibanea mako kon Tiatira inta diá dinumudui kon totundú inta moraat tatua, bo diá doman nobalajar kon pongotahuan mita in Ibilis, naa in poguman-Ku, diábí dugangan-Ku insibuḷan in tanggungan monimu.