WAHYU 14:4 - Alkitab Singog In Mongondow Masa In Tanaa

⁴ Mosia tua intau inta umuran nodarit naonda bo porawan, sin mosia in diábí mosiug takin bobay. Mosia in umuran dumudui magí-mako kon i Adí in Domba kon ondakabí in bayáan-Nea. Mosia in sinobutdon nongkon sigad in intau mita. Mosia tuata inta ain pinobebas bo inogoi saḷaku sosumba inta muna kon i Allah bo kon i Adí in Domba tatua.

WAHYU 14:4 Referans Kwoze

WAHYU 3:4

Táe kon yua-yuak monimu inta kon Sardis oyúonpa in intau inta noḷukad mako sinbá ḷambungnea in umuran modarit. Mosia tua in mayá moyotakin-Ku takin mogiḷambung mobudó, sin mosia in patusbí motarima kon tua.

KORINTUS 2 11:2

Akuoi in mokotanob kon i monimu, naonda bo kototanob i Allah kon i monimu. Moiko nion in naonda bo mongodeaga inta ain pinodandiku kon nikaan in tobatú ḷoḷaki, ḷoḷaki tatua in ki Kristus.

YAKOBUS 1:18

Ibog-Neabí tontaní in nopobaḻí kon i naton ki adí-Nea mita pinongin Pirman-Nea inta nobanar. Tua komintan in pinomia-Nea sinbá kita in mokouḻí kon tampat inta moponting kon sigad in bayongan mahaḷuk inta pinomia-Nea.

WAHYU 5:9

Mosia nopodondong in tobatú dondong mobagu, nanaa: “Iko in patus mogamá kon buk tatua bo moḷosi kon meterainea mita. Sin Iko ain iḻimod, bo dugú-Mu tatua, in pinoguboḻi-Mu kon intau nongkon bayongan suku, bahasa, negara bo bangusa sin ogoi kon i Allah.

YOHANES 12:26

Intau inta moibog mogaid kon oaidan-Ku musti dumudui kon i-Nakó kon ondakabí in bayáan-Ku; sinbá kon onda in bayáan-Ku yo kon tua doman in sia. Intau inta mogaid kon oaidan-Ku horomatonbí i Amá-Ku.”

YOHANES 10:27

Domba-Ku mita in mokidongogbí kon singog-Ku mita. Kinotaauan-Kubí in mosia, bo mosia in dumuduibí kon i-Nakó.

WAHYU 17:14

Mosia in noyopakat kon moparang kon i Adí in Domba tatua. Táe ki Adí in domba tatua takin dumodudui-Nea mita inta mosatia bo inta ain inoiní bo piniḻí-Nea tatua in monaḷow kon datu mita tatua, sin Siata in Tuang in bayongan tuang, bo Datu in bayongan datu.”

MAZMUR 74:2

Toropdon in umat-Mu inta piniḻí-Mu nongkon dungkuḷmai, bangusa inta pinoḷuai-Mu sinbá mobaḻí kapunyaan-Mu. Toropdon in Tombuḷud in Sion, inta binaḻí-Mu pogogutunan-Mu.

KORINTUS 1 6:20

Sin moiko nion in sinaḷui bidon i Allah, bo nodait-Nea bidon inuboḻian. Tuamai umurandon paké kopiraan sahingga in ki Allah in pomuliaan.

YOHANES 8:12

Ki Yesus in buipa doman noguman kon i monia, “Akuoi naa in bayag in dunia. Intau inta dumudui kon i-Nakó in diá bidon sia mayá kon bonu in sindip, táe oyúondon in bayag kon kobiagannea.”

YEREMIA 2:3

Israel, iko in Akuoi tontaní in kitogi, batoḷ in dodob-Ku inta kinotabi-Ku. Akuoi in nopouma in bodito kon bayongan in intau inta nopororiga kon inimu, Akuoi, ki Tuhan, ain nosingog.”

PETRUS 1 2:9

Táe moiko nion in bangusa inta kinopiḻían, imang mita inta mobantung kon datu, bangusa inta mokudus, umat inta kapunyaan i Allah. Ain piniḻí bo inoiní i Allah in moiko iḷumuai nongkon sindip bo mayá tumuot kon bayag-Nea inta momulia, takin makusud bá moiko in mopotaa-taau mako in habar in bayongan inta pinomia i Allah inta diá in poḻiuan tua.

EPESUS 1:14

Roho tatua in nobaḻí jaminan kon kita in motarimabí kon onu inta ain pinodandi i Allah kon umat-Nea. Tanaa mobogoi in koyakinan kon i naton kon pobebasonbí i Allah in umat-Nea. Dinayo-dayowdon in ki Allah sin oaidan-Nea inta totok moḷoben tatua!

KORINTUS 1 16:15

Tantú kinotaauan bidon monimu in ki Stepanus bo motoḷuadínea; mosia tua inta muna-munamai nobaḻí Keresten kon Akhaya. Mosia tua in totu-totuudon nogaid nobantung kon umat i Allah.

OUMAN IN RASUL MITA 20:28

Manangka intua yo mokopopiadon in moiko bo umuran moḷukad kon awak monimu bo poḷat doman ḷukadai in bayongan umat i Allah inta ain pinosarakan i Allah kon i monimu sinbá ḷukadan. Sin moiko nion ain sinantú in Roho i Allah mobaḻí moḷoḷukad bo mononompia kon umat i Allah inta ain sinobut-Nea in dugú i Adí-Nea tontaní.

YOHANES 13:37

Dá kai Petrus doman, “Tuhan nongonu sin diábí motaau akuoi in dumudui in tanaa mako? Morelabí in akuoi in matoi sin kopontingan i Tuhan!”

MATIUS 25:1

“Kon wakutu in koangoian i Allah saḷaku Datu, in naonda bo poumpamaan tanaa: Mopuḷú in mongodeaga nogamá kon togá, monia bo nonontomu kon nonikaan ḷoḷaki.

MATIUS 8:19

Bo namangoidon in tobatú mototundú kon agama Yahudi noguman kon i-Nia: “Guru, akuoi in dumudui kon inimu, kon onda kabí in bayáan-Mu!”

DONDONG MOḶANTUD 1:3

Iko in mobondu totok, tangoimu naonda bo ḷana mobondu inta noibutak; tuamai mongodeaga mita moibog kon inimu!

TIMOTIUS 1 4:3

Mosia in motundú kon intau bá diá mobuḷoi bo diá doman mokaan kon kaanon inta ain sinantú monia. Bokaka kaanon tatua in pinomia i Allah sin kaanon takin mosukur kon i-Nia in intau mita inta ain nopirisaya kon i Kristus bo inta ain nonotaau kon totundú inta mobanar nongkon i Allah.

KORINTUS 1 7:28

Táe aka iko bo tantúbí moibog mobuḷoi, yo diábí doman nongonu. Natua doman in mongodeaga, diábí doman baradosaan aka mokipobuḷoi. Tongá intau inta nobuḷoi tua mokouma kon roriga inta ibogonku in moiyayúbí mita kon i monimu intua komintan.

AMOS 6:1

Moboditodon in moiko inta nobiag nopia kon Sion, bo moiko inta noodom kon Samaria – moiko ei itoi mita in ḻipú in bangusa in Israel inta notondí naa, moiko inta biasamai inangoian in rayat sin pokituḷungan!

DONDONG MOḶANTUD 6:8

Umpaka onom nopuḷú in buḷoi, bo waḷu nopuḷú in pahang, bo mongodeaga mobarong totok,

MAZMUR 45:14

Ki adí bobay i datu tumuot takin taingkat, ḷambungnea ginaboḷan in buḷawan.

MATIUS 19:12

Oyúon in intau diá mobuḷoi sin sia in pinolahirbí natua, bo oyúon doman in nobaḻí natua sin popisí in intau ibanea, bo oyúon inta ibogneabí tontaní in doí mobuḷoi sinbá motaau mogaid kon oaidan i Allah. Ki ine in mokosanggup motarima kon inta pinoguman-Ku naa yo pomayádon mako tarimaannea in naa.”

EPESUS 5:27

Mangaḻenea kon tua, ki Kristus in noposadia in jamaat kinotompia kon tayowon i Allah, takin diá in gaatnea andeka inta motaau hojatan in intau ibanea.

IBRANI 12:23

Moiko in sinumakin kon tobatú pinoyodungkuḷan inta morame totok – pinoyodungkuḷan in adí mita guya-guyang i Allah, inta pinaisdon in tangoi monia kon bonu in soroga. Moiko in namangoi sinumayow kon i Allah hakim in bayongan intau naa. Moiko in sinumayow kon roho mita intau mopia inta ain sinompurna.

WAHYU 21:22

Diábí inontongku in Baḷoi Allah kon bonu in kotá tatua, sin Baḷoi Allah in ki Tuhanbí tontaní, ki Allah inta totok mokawasa, bo Adí in Domba tatua.

WAHYU 21:23

Kotá tatua diá bidon paraḷu simbayagan mata in singgai ande buḷan, sin kamuliaan i Allah aindon nokosimbayag kon tua, bo ki Adí in Domba in nobaḻí togánea.