ULANGAN 4:29 - Alkitab Singog In Mongondow Masa In Tanaa

²⁹ Bo moiko in motayakdon kon i Tuhan Allahmu, bo aka moiko motayak kon i-Nia takin ginamu totu-totuu, yo mouḻímubí in Sia.

ULANGAN 4:29 Referans Kwoze

MAZMUR 119:2

Pia in kamang in intau inta dinumudui kon parenta-Nea, bo takin ḻimbatú in gina moḷongasi monotaau kon i Tuhan.

TAWARIKH 2 15:4

Táe naonda in mosia kinoantugan in roriga, yo nopoigumbí in mosia in totuḷung kon i Tuhan, Allah in Israel. Nopoigum in mosia in topotundú-Nea bo inogoi-Nea doman.

MAZMUR 119:10

Takin ḻimbatú in gina akuoi moḷongasi monotaau kon ini-Mu, dikabí kaasí pomayá-Mu mako in akuoi in tumabat kon parenta-Mu.

ULANGAN 30:10

Táe moiko in mustibí motoindudui kon i Tuhan Allahmu bo dumudui kon bayongan in hukum-Nea inta pinais kon bonu in buk tanaa, buk in Hukum i Tuhan. Moiko in mustibí mobui kon i-Nia takin ḻimbatú in ginamu.

YOËL 2:12

Ki Tuhan in noguman, “Táe tanaa mako, pobuidon mangoi kon i-Nakó takin ḻimbatú in gina, sindaḷan mopuasa, mogamui bo mongombaḷ.

MAZMUR 119:145

Takin ḻimbatú in gina akuoi mokuani kon ini-Mu; tubagaipa kaasí in akuoi o Tuhan, akuoi in moibog dumudui kon parenta-Mu.

MAZMUR 119:58

Takin ḻimbatú in gina akuoi mopoigum in totabi-Mu, kotabipa kaasí in akuoi podudui in dandi-Mu.

YEREMIA 3:10

Naonda in nogaid kon tua mita, Yohuda inta diá mosatia tua nobui kon i-Nakó táe tongá ki ubo-uboḷmai, sin ginanea in diábí notuḻid. Akuoi, ki Tuhan, ain nosingog.”

NEHEMIA 1:9

Táe aka kami in bui mobui mangoi kon ini-Mu bo dumudui bui kon parenta-Mu mita, dá kami inta ain noirarit tatua in sipunon-Mubí bui, umpakabí kami in kon popod mita in butá. Bo kami in pobuion-Mubí bui kon tampat inta ain piniḻí-Mu mobaḻí tampat pooibadaan kon ini-Mu.

TAWARIKH 2 31:21

Sia in nokodapot kon oaidannea, sin bayongan inta inaidannea kon kopontingan in Baḷoi Tuhan andeka dumudui kon hukum mita i Tuhan, pinobayá takin ḻimbatú in gina bo takin doman tabi kon i Tuhan Allahnea.

TAWARIKH 2 15:15

Bayongan in rayat Yohuda noḷunganga in gina sin mosia in nomiadon kon ibot tatua takin ḻimbatú in gina. Mosanang in gina monia in noibada kon i Tuhan, bo ki Tuhan in noibog doman notarima kon i monia. Inogoi-Nea kon i monia in kaadaan inta moonow kon butá monia.

TAWARIKH 2 15:12

Mosia in nodandi kon i Tuhan kon takin ḻimbatú in gina bo dimukud monia in mobiag podudui in ibog i Tuhan, Allah in mogoguyang monia.

ULANGAN 6:5

Kotabibí in ki Tuhan Allahmu takin bayongan ginamu: Poniata intua kon bonu in kobiaganmu bo oaidmu.

ULANGAN 10:12

“Tanaa, Utat mita, poḻimbonu kon gina onu in kinoibog i Tuhan Allahmu aidan monimu: Horomatbí in ki Tuhan Allahmu bo aidaidon in bayongan parenta-Nea. Kotabibí in Sia bo pooibada kon i-Nia takin kotompodon in gina bo ropotmu.

ULANGAN 11:13

Dá duduiaidon in parenta mita inta pinotaauku kon inimu singgai in naa; kotabibí in ki Tuhan Allahmu bo poibadadon kon i-Nia takin ḻimbatú in gina bo ropotmu.

ULANGAN 26:16

“Singgai in naa ki Tuhan Allahmu nomarenta kon i monimu mogaid kon bayongan in parenta tatua; aidaidon komintan intua pokosatia bo takin doman ḻimbatú in gina bo ropotmu.

YOSUA 22:5

Bo ḷukadai sinbá moiko in umuran dumudui kon hukum inta pinarenta i Musa kon inimu, inta: Kotabi in ki Tuhan Allahmu, duduiaidon in koibog-Nea, duduiai in parenta-Nea mita, kosatia kon i-Nia bo posumbadon kon i-Nia takin ḻimbatú in ginamu bo takin bayongan in dimukudmu.”

NEHEMIA 9:27

dá pinosarakan-Mudon in mosia kon musungnea inta takin raat in nongawasa bo nondorot kon i monia. Táe kon bonu in roriga inta noiantug, mosia in nokuani kon ini-Mu nopoigum in totuḷung. Nongkon soroga inindogogan-Mu; takin tabi moḷoben sinubagan-Mu. Pinotabá-Mu mangoi in itoi bo intau mita mobarani inta nopoḷuat kon i monia nongkon musung.

YEREMIA 51:50

Ki Tuhan in noguman kon intau in Israel kon Babel, “Moiko in noiḷaguidon kon poḻimodan! Dá bayádon in tanaa! Dika mogoḷat! Umpakabí noyayú in moiko nongkon baḷoi, toropdon in Akuoi, Tuhanmu, bo kon Yerusalem.

YEHEZKIEL 6:9

kon tua mosia in mobiag kon bonu in poḷumbúan. Bo kotoropandon monia in Akuoi bo komangaḻeandon monia kon Akuoi in mohukum bo moningkuḻe kon i monia sin gina monia in diá motoindudui kon i-Nakó. Mosia in nonaḷámaidon kon i-Nakó bo ain nomiḻí kon berhala nobaḻí toḻiu-Ku. Bo mosia in doídon kon awak monia tontaní popisí in bayongan in aid moraat bo moromú inta ain inaidan monia.

AMOS 5:4

Ki Tuhan in noguman kon intau in Israel, “Pobuidon mangoi kon i-Nakó, dá mobiagbí in moiko.

SAMUEL 1 7:3

Bo nogumandon in ki Samuel kon umat in Israel, “Aka moiko moibogdon mobui mangoi kon i Tuhan bo mosumba kon i-Nia takin ḻimbatú in ginamu, yo mustibí ḷumbúon monimu in bayongan dewa ibanea bo patong i Dewi Asytoret. Totu-totuudon posarakai in awakmu kon i Tuhan bo tongádon pooibada kon i-Nia, dá moiko in poḷuaton-Neadon nongkon intau in Pilistin.”

TAWARIKH 2 15:2

dá minayá in sia nokipodungkuḷ kon i Datu Asa, bo noguman, “Uḻe Datu Asa, bo bayongan in intau inta nogutun kon Yohuda bo kon Benyamin! Indongogai! Ki Tuhan modagin kon i monimu aka moiko modagin kon i-Nia. Aka moiko mopoigum in topotundú i Tuhan, yo ogoian-Neabí doman. Táe aka moiko doí mopandungmai kon i-Nia, yo diábí doman in Sia mopandungmai kon i monimu.