ULANGAN 29:21 - Alkitab Singog In Mongondow Masa In Tanaa

²¹ Ki Tuhan in mopobaḻíbí kon inia mobaḻí contoh kon bayongan in suku Israel, bo mohukum kon inia pongin kutuk inta kinotangoian kon bonu in dodandian inta pinais kon bonu in buk tanaa, buk in hukum i Tuhan.

ULANGAN 29:21 Referans Kwoze

MATIUS 25:46

Bo mosia naa in bonuon kon tampat pohohukuman mononoi, táe intau inta mopia in mokouḻí kon kobiagan inta mononoi.”

MATIUS 25:41

Bo Sia in noguman doman kon i monia inta kon dotá in koḷoigi-Nea, ‘Bayádon in moiko nongkon tayowonku, sin moiko in intau mita inta binaḷa! Bayádon bo tuotdon kon bonu in tuḷu inta diá mopio-piong sin tua in sinadia in Ibilis bo malaekatnea kon i monimu!

MATIUS 25:32

Bo bayongan intau in sipunon kon tayowon-Nea bo poyotontaníon-Nea i mosia naonda gombala mopoyotontaní in domba bo bembé.

MATIUS 24:51

Dá bobantung tatua in totok binout i tuangnea, bo ḷumbúonnea kon tampat in intau mita inta mongomunapik. Mosia in mongombaḷ bo mororiga kon tua.”

MALEAKHI 3:18

Umat-Ku in mokoontongbí doman kon yoposi in ukur in intau mopia bo intau moraat, kon sigad in intau inta mogundoi kon i-Nakó bo inta diá.”

YEHEZKIEL 13:9

Akuoi in mohukumbí kon i monimu, ei nabi mita inta nopotaau kon toḷanow mita uboḷ bo norai kon oontongon mita! Moiko in diá bidon motaau in dumudui mobogoi in kotantúan kon bonu in ponisigan in umat-Ku. Tangoimu mita in ginaresandon kon bonu in tangoi mita in inanakan Israel, bo moiko in diá bidon mobui mangoi kon butámu. Dá kotaauandon monimu kon Akuoibí in ki Tuhan Inta Totok in moḷantud.

ULANGAN 30:10

Táe moiko in mustibí motoindudui kon i Tuhan Allahmu bo dumudui kon bayongan in hukum-Nea inta pinais kon bonu in buk tanaa, buk in Hukum i Tuhan. Moiko in mustibí mobui kon i-Nia takin ḻimbatú in ginamu.

ULANGAN 32:23

Tantú-Kubí popoangoi in bodito, Popiot-Ku in bayongan piot-Ku kon i monia.

YEREMIA 42:18

Ná doman in Akuoi, ki Tuhan Allah in Israel nopobutak in torú bo rogi-Ku kon intau inta nogutun kon Yerusalem, yo natua doman in Akuoi mopobutak in rogi-Ku kon i monimu inta mayá in Mesir. Intau in mokoningkimbí in mokoontong kon i monimu; singkuḻeonbí in moiko, bo tangoimu in pakéonbí saḷaku kutukan. Moiko in diá bidon mokoontong bui kon butámu tontaní.”

ULANGAN 28:59

Ki Tuhan in mopoangoi kon i monimu bo kon buímu in takit mita inta diá koundaman bo bodito mita inta diá motaau potogonon.

ULANGAN 28:61

Ki Tuhan in mopoangoi doman in noyagi-yagimai in takit bo bodito inta diá pinais kon buk tanaa, buk in hukum i Tuhan. Bo moiko in yopúondon.