ULANGAN 14:21 - Alkitab Singog In Mongondow Masa In Tanaa

²¹ Mahaḷuk inta minatoi mako naníon diábí motaau in kaanon monimu, táe motaaubí in kaanon in intau mita ango-angoi inta nogutun kon yua-yuak monimu, ande potaḷui kon bangusa ibanea. Moiko nion in umat inta ain piniḻí kon i Tuhan Allahmu. Tapú in adí in domba ande adí in bembé diábí motaau in poyodungúon takin tubig in teté i indenea.”

ULANGAN 14:21 Referans Kwoze

IḶUAIAN 23:19

Pomuḷoi in taong moiko in musti modia mangoi kon baḷoi i Tuhan Allahmu in gandum inta muna-munamai iratab monimu. Tapú in adí in domba ande tapú in adí in bembé diábí motaau poyodungúon takin tubig in teté i inánea.”

IḶUAIAN 34:26

Pomuḷoi in taong moiko musti modia mayá kon Baḷoi i Tuhan Allahmu in bungai in boyómu inta ḷontú nongkon butámu. Tapú in ki adí in domba ande ki adí in bembé diábí motaau dungúon poyotakinon tubig in teté i inánea.”

ULANGAN 14:2

Moiko nion in kapunyaan i Tuhan Allahmu; nongkon bayongan in bangusa kon dunia naa, moikobí nion inta piniḻí i Allah nobaḻí umat-Nea.”

IMAMAT 22:8

Sia in diábí motaau mokaan kon tapú in mahaḷuk inta minatoi tontaní ande minatoi sin dinomok in mahaḷuk ibanea. Aka sia mokaan, dá sia in mobaḻí monajis. Akuoi in ki Tuhan.

IMAMAT 17:15

Pomuḷoi in intau Israel ande intau ango-angoi inta mokaan kon tapú in mahaḷuk inta minatoi tontaní ande minatoi sin dinomok in mahaḷuk ibanea, yo musti momatá kon pakeangnea poḷat moinggú bo oḷatonnea dapot in mata in singgai tumoyop, bain tua bo sia mobaḻí modarit.

YEHEZKIEL 4:14

Táe akuoi in notubag, “Kaasí Tuhan Inta Totok in moḷantud! Pinangkoipamai kon mointokan nodapot in tanaa, diápa kon dodai in onda in akuoi in noponajis in awakku pinongin nokaan kon mahaḷuk inta minatoi andeka ki agat in mahaḷuk inta mokokaan kon mahaḷuk ibanea. Diábí kon dodai in onda in akuoi in nokaan kon kaanon inta iharam.”

PETRUS 1 1:16

Kon bonu in Buk Motusi in pinais nanaa: “Kotusibí in moiko, sin Akuoi in motusi.”

SURAT I PAULUS KON JAMAAT RUM 12:2

Donaai in moiko dumudui kon ibog in dunia naa. Pomayádon mako in ki Allah in monoimbagu kon i monimu, sinbá mobaḷui in moiko. Sahingga in kotaauandon monimu onu kinoibog i Allah, tuata inta mopia bo inta mokosanang kon gina-Nea bo inta mosompurna.

OUMAN IN RASUL MITA 15:20

Táe kita in momaisdon kon surat bo mononggina kon i monia, sinbá donaai in mokaan kon kaanon inta ain pinosumba kon dewa, andeka mokaan kon tapú in mahaḷuk inta sinagangan, andeka mokaan kon dugúnea. Bo bá umuran mokopoyayú in mosia kon oaid mita inta mokotor.

DANIEL 12:7

Intau ibanea tatua in nopotundú in ḻimanea doyowa nosimpaḷ ná ḷangit. Dinongogku in sia nongibot pinodoyon kon i Allah inta mononoi bo noguman, “Bayongan inta nobaḻí tatua in modapotbí in toḷu notaong kapin. Naonda in mopaḷut mako in pomogutúan kon umat i Allah mopaḷut, dá mopaḷut domandon in inta mokoherang mita tatua.”

DANIEL 8:24

Sia in mobaḻíbí moropot totok, táe deemanbí noidoyon kon ropotnea tontaní. Sia in mopoangoibí in inta mokoyopú inta mokokoningkim bo onukabí in aidannea kodapotanneabí. Sia in momutúbí kon intau mita inta motorindog bo umat i Allah.

IḶUAIAN 19:6

bo sinondí-Ku kon i-Nakó tontaní, bo moiko in mobantung kon i-Nakó mobaḻí imang mita.”

IMAMAT 11:40

Intau inta nodia ande nokaan kon tapú in mahaḷuk inta minatoi tatua mustibí momatá kon pakeangnea, táe sia in umuranbí nonajis modapot kon mata in singgai tumoyop.

ULANGAN 7:6

Aidaidon in tua komintan sin moiko nion in kapunyaan i Tuhan Allahmu. Nongkon bayongan bangusa kon dunia naa, moikobí nion inta piniḻí i Tuhan Allahmu mobaḻí umat inta sinondí kinotabi-Nea.

ULANGAN 14:20

Mahaḷuk kokoḻikipan inta diá haram in motaaubí kaanon.

YEHEZKIEL 44:31

Ḷagapan bo mahaḷuk mita ibanea inta minatoi mako natua, andeka inta dinomok in mahaḷuk moraat, diábí motaau in kaanon in imang mita.”

IḶUAIAN 22:30

ná doman tua in sapi bo domba koḷakian inta muna pinogadí. Pomayádon mako in mahaḷuk mita tatua takinpa ki inánea kon bonu in pitu nosinggai koonggotnea, bodongka posarakandon kon i-Nakó kon singgai noginwaḷu.