ULANGAN 12:10 - Alkitab Singog In Mongondow Masa In Tanaa

¹⁰ Naonda in moiko ḷumoḷan kon Ongkag in Yordan, ki Tuhan Allahmu in motuḷungbí kon i monimu ḻimitú bo mogutun kon butá inta kon ḷoḷan in ongkag tatua. Sia in mogoḻingoibí kon i monimu nongkon bayongan musung, bo moiko in mobiagbí moaman bo motompia.

ULANGAN 12:10 Referans Kwoze

YEHEZKIEL 34:28

Mosia in diá bidon pogagowan in bangusa mita inta diá nonotaau kon i-Nakó, andeka domokon in mahaḷuk mita moraat. Mosia in mobiag bidon motompia bo mooyúon, bo diá bidon in tobatúmai in intau in mopogogondok kon i monia.

YEREMIA 33:11

Táe kon tampat mita tatua in kodongoganbí bui in singog ḷunganga bo pia in gina takin dowawá in ponikaan. Kodongoganbí doman in dondong in intau mita inta nodia kon kuruban sukur kon Baḷoi-Ku. Mosia in mogumanbí, ‘Posukurdon kon i Tuhan Inta Totok in mokawasa, sin mopia in Sia bo tabi-Nea in mononoi.’ Butá tanaa in baḻíon-Kubí mobiag motompia ná dungkuḷ. Akuoi, ki Tuhan, ain noguman.”

ULANGAN 11:31

Diádon moonggot bo moiko in ḷumoḷandon kon Ongkag in Yordan bo ḻimitúdon kon butá inta ogoi i Tuhan Allahmu kon inimu. Naonda in moiko mogagow kon butá tatua bo mogutun kon tua,

ULANGAN 4:22

Diádon moonggot bo moiko ḷumoḷan poḷat ḻimitú kon butá inta mopia tua; táe akuoi in diábí moitakin, sin akuoi in matoidon kon naa.

ULANGAN 3:27

Bayádon kon tudu totok in Buḷud Pisga bo indoidon kon dotá in utuan bo toḷatan, kon dotá in pomukaan bo toyopan. Taridiaidon kopia onu in inontongmu tua, sin iko in diá bidon moiḷoḷan kon Ongkag in Yordan.

YEHEZKIEL 38:8

Tongonupamai notaong sia in parentaan-Kudon monubu kon butá tobatú takin intaunea inta ain sinipun nongkon sigad in nobayong in bangusa bo inta kon singgai noiduduimai mogutun kon butá tatua takin moodom. Ki Gog in mongawasabí kon buḷud mita in Israel inta noonggotdon in noingongow bo nopuḻingdon in apug mita, táe tanaa inutunandon in rayat mita inta nobiagdon noodom.

YEHEZKIEL 34:25

Akuoi in momiabí kon dodandian takin i monia, inta noḷukad kon kobiagan monia. Untunon-Kubí in bayongan mahaḷuk moraat nongkon sinangkub in butá, dá domba-Ku mita in mogutun moodom kon rawang mita bo mosiug kon kayuon mita.

YEHEZKIEL 28:26

Mosia in mobiagbí moodom kon tua bo moposindog in baḷoi mita bo mononggobá poḷat momuḷa kon anggur. Akuoi in mohukumbí kon bayongan in topodiug monia inta ain noningkuḻe kon i monia, dá Israel in moodomdon. Dá kotaauandon monia kon Akuoibí in ki Tuhan Allah monia.”

YEREMIA 32:37

Akuoi in mosipunbí kon bangusa tanaa nongkon bayongan butá tampat pinoporaritan-Ku kon i monia popisí in torú-Ku bo rogi-Ku kon i monia. Mosia in diaan-Kubí bui kon tampat tanaa bo ogoi-Kudon mogutun kon naa takin moaman.

YEREMIA 23:6

Aka momarenta in sia, intau in Yohuda in mosaḷamatbí, bo intau in Israel in mobiagbí moaman. Datu tatua in tangoionbí ‘Tuhan kasaḷamatan naton’.

AMSAL 1:33

Táe intau inta mokidongog kon inakó in koḷukadanbí. Sia in mobiagbí moaman bo diá bidon moondok.”

MAZMUR 4:8

Binaḻí-Mu in gina-Ku nodugang noḷunganga noiḻiu kon ḷunganga in intau inta nokouḻí kon bungai in boyó mobarong.

SAMUEL 1 7:12

Nopaḷut mako kon tua ki Samuel noposindog in batu tobatú, kon pinosigadan in Mizpa bo Sen. Sia in noguman, “Ki Tuhan totu-totuudon notuḷung kon inaton.” – Bo batu tatua in sinangoiannea “Batu Pinotuḷungan”.

YOSUA 4:12

Podudui kon inta pinarenta i Musa, pojuang mita nongkon suku i Ruben, i Gad bo tongosilai in suku Manasye, munadon iḷumoḷan kon ongkag.

ULANGAN 33:28

Dá buí i Yakub in mobiagbí takin diá in tongkuḷabot kon butá inta nopuḻing in gandum bo tubig in anggurnea, bo binutakan in topuot nongkon ḷangit.

ULANGAN 33:12

Bo kon suku i Benyamin sia noguman: “Naadon in suku inta kinotabi i Tuhan. Sia nogoḻiung kon i monia singgai bo doḷom bo nogutun kon sigad monia.”

ULANGAN 9:1

“Indongogai Utat mita! Singgai naa moiko ḷumoḷandon kon Ongkag in Yordan sin mayá ḻimitú kon butá in bangusa mita inta moḷobe-ḷoben bo moropo-ropot nongkon i monimu. Kotá mita monia mongoḷoben bo dininding nodapot in ḷangit.

IḶUAIAN 33:14

Ki Tuhan noguman, “Moiko in ḷukadan-Ku sinbá mokouḻí kon butá inta pinodandi-Ku.”

YOSUA 11:23

Bayongan in butá tatua inagow i Yosua pinodudui kon parenta i Tuhan kon i Musa, bo inogoi kon intau in Israel nobaḻí kapunyaan monia. Butá tatua in sinila-silai, bo batúan in suku nokouḻí kon tongosilai. Bangusa Israel nogogaidon noparang bo butánea in noaman bo nobiag notompia.

DATU MITA IMITÁNEA 8:56

“Dinayo-dayowdon in ki Tuhan inta ain nobogoi in kobiagan notompia kon umat-Nea ná inta pinodandi-Nea pinongin i Musa mogogundoi-Nea. Bayongan inta mopia inta pinodandi-Nea ain inintompodan-Nea.

YOSUA 14:1

Noiduduimai naa in ouman kon naonda in butá in Kanaan kon dotá in toyopan kon Ongkag in Yordan sinilai-silai kon umat in Israel. Inta nosilai kon butá tatua kon umat in Israel in ki Imang Eleazar, ki Yosua adí i Nun, bo tongguḷu mita in motoḷuadí kon bonu in suku mita in bangusa Israel.

TAWARIKH 1 22:18

Gumannea, “Ki Tuhan Allahmu ain notuḷung kon i monimu, bo nobogoi in dodamean bo bayongan in kobiagan motompia kon bayongan butá. Sia in nopountungdon kon inakó nongkon bayongan in bangusa inta dungkuḷmai nogutun kon butá tanaa. Tanaa mosia in notoguondokdon kon inimu bo kon i Tuhan.

YEHEZKIEL 38:11

Iko in monantúdon kon monubu kon butá inta diá dininding tatua, inta intaunea mita nogutun takin pia-pia mako bo notompia kon kotá mita inta diá dininding bo diá doman in pakakat mita in parang.