ULANGAN 10:22 - Alkitab Singog In Mongondow Masa In Tanaa

²² Kon tungkuḷ in mogoguyangmu minayá in Mesir, kobayong monia tua in tongábí pitu nopuḷú in intau. Táe ki Tuhan Allahmu ain nomaḻí kon i monia nobarong nádon onda bo kobarong in tundi kon ḷangit.”

ULANGAN 10:22 Referans Kwoze

KINOBAḺIAN 46:27

Ki adí mita i Yusup inta pinononggadí kon Mesir in taya dua, sahingga motoḷuadí i Yakub inta noyaput kon Mesir kobayongnea komintan in pitu nopuḷú.

IḶUAIAN 1:5

Bayongan in buí i Yakub koantónea in pitu nopuḷú. Ki Yusup noiunadon nogutun kon Mesir.

KINOBAḺIAN 15:5

Ki Tuhan in nodia kon i Abram iḻumuai bodongka noguman kon inia, “Ḷangagka kon ḷangit, bo tungkuḷaika iyap in tundi mita; yo buímu in kobayongnea naonda bo tundi mita tatua.”

ULANGAN 1:10

ki Tuhan Allahmu nopobaḻídon kon i monimu nobarong totok naonda bo tundi mita kon ḷangit.

NEHEMIA 9:23

Binaḻí-Mu in buí monia naonda bo kobayong in tundi mita kon ḷangit. Inogoian-Mu in mosia in butá sin pogutunan monia, butá inta ain pinodandi-Mu kon mogoguyangnea.

ULANGAN 28:62

Umpaka kobayong monimu in nádon kobayong in tundi kon ḷangit, tongádon topiḻik in kon sigad monimu in mobiagpa, sin moiko in diá motoindudui kon i Tuhan Allahmu.

OUMAN IN RASUL MITA 7:14

Onda intua binayá i Yusup pinoki gamá in ki amánea ki Yakub takin bayongan in ginaḷumnea pitu nopuḷú boḻima in kobayongnea.

PINOGIAPAN 26:51

Kobayong in ḷoḷaki mita intau in Israel in 601.730.

IBRANI 11:12

Umpaka wakutu intua ki Abraham nádon onda bo intau minatoi in awaknea, táe nobayongpabí doman in buínea, diábí koiapan in kobayongnea sin nádon tundi kon ḷangit bo bungaion kon bingkí in pintad kobayongnea.

PINOGIAPAN 26:62

Ḷoḷaki mita inta nongkon suku i Lewi inta umur tobuḷan bo namonik kobayongnea in 23.000. Mosia iniap pinoyotontaní nongkon intau mita inta tobangusanea, sin mosia in diá nokouḻí kon butá tonsilai kon Israel.

KINOBAḺIAN 22:17

Akuoi mobogoi in barakat kobarongon totok kon inimu bo baḻíon-Ku in buímu moantó naonda bo tundi kon ḷangit bo ná kobayong in bungayon kon bingkí in dagat. Ki adí bo ki ompumu in monaḷowdon kon musung mita monia.

ULANGAN 26:5

Onda intua kon tayowon i Tuhan Allahmu, musti in iko mopoyaput in tosingogon mita tanaa: ‘O Tuhan, mogoguyangku naa intau in Aram inta nodondaḷoi. Sia nodia kon koluarganea minayá in Mesir bo nogutun kon tua nobaḻí mokokiangoi. Kon tungkuḷ in minayá intua mosia tongá topiḻik, táe mosia in nobaḻí bangusa inta moḷoben bo moropot.

KINOBAḺIAN 46:26

Buí i Yakub inta minayá in Mesir kobayongnea in onom nopuḷú bo onom in intau, diápabí pinoyoiyap in ki mototakanea mita.

ULANGAN 1:11

Igumon mako ki Tuhan, Allah in mogoguyangmu, umuran modugang kon kobayong monimu modapot in koribu noguntuḷ, bo mopobaḻí kon i monimu bangusa inta mobiag mooyúon bo motompia ná podudui kon inta pinodandi-Nea!