TITUS 3:5 - Alkitab Singog In Mongondow Masa In Tanaa

⁵ Sia in noposaḷamat kon i naton, táe deemanbí popisí in kita ain nogaid kon inta mopia, táe popisíbí in tabi-Nea kon i naton. Sia in noposaḷamat kon i naton takin Roho i Allah inta ain nobogoi kon i naton in kolahiran bo kobiagan mobagu takin cara nondarit kon i naton.

TITUS 3:5 Referans Kwoze

TIMOTIUS 2 1:9

Ki Allah in noposaḷamat bo nogoiní kon i naton bá mobaḻí umat inta kinotabi-Nea. Tua in inaidan-Nea, deemanbí pinodoyon kon oaid naton mopia, táe pinodoyon-Neabí kon makusud-Nea tontaní bo totabi-Nea inta pinongin i Kristus Yesus kon wakutupa in dunia naa diápa pinomia.

KORINTUS 1 6:11

Koḻipod oyúon in kon sigad monimu in umuran mogaid kon natua mita. Táe tanaa in poniatadon kon nodaritdon in moiko nongkon bayongan oaid inta diá mopia. Moiko in nobaḻídon umat i Allah inta piniḻí-Nea. Moiko buidon noyobayat i Allah, sin nopirisayadon kon i Tuhan Yesus Kristus bo popisí kawasa doman in Roho inta nongkon i Allah naton.

PETRUS 1 3:21

Dá bá kotaauandon monimu kon onu inta nobaḻídon tatua nobaḻí oḻinow in baptisan inta nokosaḷamat kon i monimu tanaa. Baptisan tatua in deeman tobatú upacara pondaritan kon bayongan inta nokotor kon awak, táe tua in dodandianbí kon i Allah inta nongkon bonu in ginamu inta mopia. Baptisan tatua in mokosaḷamat kon i monimu sin ki Yesus Kristus ain nobiag bui nongkon kinopatoian,

PETRUS 1 1:3

Koḻigaidon in kita mosukur kon i Allah, ki Amá i Tuhan naton ki Yesus Kristus! Sia in totok motabi kon i naton, manangka intua kita in inogoian-Nea in kobiagan mobagu inta pinodoyon kon kinobiagan bui i Yesus Kristus nongkon kinopatoian. Naabí in mobogoi in harapan moroton kon i naton.

SURAT I PAULUS KON JAMAAT RUM 12:2

Donaai in moiko dumudui kon ibog in dunia naa. Pomayádon mako in ki Allah in monoimbagu kon i monimu, sinbá mobaḷui in moiko. Sahingga in kotaauandon monimu onu kinoibog i Allah, tuata inta mopia bo inta mokosanang kon gina-Nea bo inta mosompurna.

EPESUS 2:4

Táe moḷobendon totok in totabi i Allah! Ná domai tua in tabi-Nea kon i naton,

EPESUS 5:26

Inaidan i Kristus intua sinbá motaau-Nea daritan in jamaat tatua takin totundú-Nea bo takin tubig inta pobaptis, sinbá motaaudon posarakan-Nea kon i Allah.

MAZMUR 51:10

Biódon mako in akuoi mokodongog kon habar mokopia kon gina, sinbá gina inta binutuk-Mu naa in buidon monggiow.

SURAT I PAULUS KON JAMAAT RUM 11:6

Ki Allah in nomiḻí kon i monia sin pinodoyon kon tabi-Nea, deemanbí pinodoyon kon aid monia. Sin aka Sia nomiḻí kon i monia pinodoyon kon aid in intau, dá tabi tatua in deeman bidon totu-totuu tabi.

IBRANI 4:16

Tuamai, koḻigai in kita dika moondo-ondok in mayá kon tayowon i Allah inta nomarenta takin pia in gina. Motabibí in ki Allah kon i naton bo ogoian-Neabí in barakat, sahingga motarimabí in kita kon totuḷung-Nea aka kon wakutuneadon.

KOLOSE 3:10

Bo tanaa moiko inogoiandon in kobiagan inta mobagu. Moiko nion in nobaḻí bidon intau nobagu, inta koyogot toimbaguon i Allah inta nopomia kon i monimu podudui in batangan-Nea tontaní. Makusudnea bá totu-totuudon kotaauan monimu in ki Allah.

MAZMUR 86:15

Táe Iko, o Tuhan, ki Allah inta motabi bo mopia in gina, mosabar, nopuḻing in tabi bo mosatia.

GALATIA 2:16

Umpaka natua yo kinotaauanbí nami kon diábí in tobatúmai intau in posaḷamaton i Allah sin dinumudui kon hukum i Musa. Táe intau posaḷamatonbí sin pirisaya kon i Yesus Kristus. Tuamai kami tontaní in nopirisayadon kon i Yesus Kristus, sinbá kami in posaḷamaton doman, deemanbí posaḷamaton sin dinumudui kon onu inta kon hukum i Musa.

SURAT I PAULUS KON JAMAAT RUM 3:20

Sin diábí in tobatúmai in motaau mopopiaan i Allah sin popisí in mosia ain nogaid kon soaḷ mita inta kon bonu in hukum agama Yahudi. Táe hukum tatua in tongábí moponiata kon intau tua in binaradosabí komintan.

PETRUS 1 2:10

Koḻipod moiko in deemanbí umat i Allah, táe masai in naa moiko in nobaḻídon umat i Allah. Koḻipod moiko in diá kinotabi i Allah, táe masai naa moiko ain notarima kon totabi-Nea.

EPESUS 4:23

Toimbagudon in bayongan gina bo raianmu.

SURAT I PAULUS KON JAMAAT RUM 3:28

Sin nanaabí in simpod in singog: Intau in sinangoian noyopiadon bui i Allah, deemanbí popisí in nogaid kon onu inta pinais kon hukum in agama Yahudi, táe popisíbí in pirisayanea kon i Yesus Kristus.

SURAT I PAULUS KON JAMAAT RUM 9:11

Wakutu in adí doyowa tatua in diápa pinononggadí, sinantúdon muna i Allah ki ine in piḻíon-Nea kon singgai moiduduimai. Onu in piniḻí i Allah, deemanbí noidoyon kon onu inta komampuan aidan in intau, táe pinodoyonbí kon ibog i Allah tontaní. Sin kon wakutu in ki adí i Ribka doyowa tatua diápa motaau mogaid kon onu inta mopia ande inta moraat,

LUKAS 1:78

Ki Tuhan naton mopia in gina bo motabi doman totok. Sia in mamangoi sinbá mosaḷamat in kita. Sia naonda bo mata in singgai inta momuká doḷo-doḷom,

LUKAS 1:54

Sia in motuḷung kon Israel inta simpaḷ-Nea, podudui in dandi inta pinodandi-Nea kon i mogoguyang naton.

LUKAS 1:50

Sia umuran mobogoi in totabi-Nea kon bayongan intau inta moondok kon i-Nia.

MIKHA 7:18

Diábí in Allah ná Iko, o Tuhan, inta mongampung kon dosa in umat inta piniḻí-Mu inta ki agatneapa. Diábí modapot in mononoi tumorú in Iko; táe, mopiabí in gina-Mu in moponiata in tabi-Mu inta diá in obotnea tatua.

MAZMUR 143:2

Akuoi naa in mogogundoi-Mu, dikabí monisig kon inakó, sin diábí in intau in diá kotaḷá in kon tayowon-Mu.

MAZMUR 130:7

Pongamangdon kon i Tuhan, ei umat-Nea, sin Sia in umuranbí motabi, bo umuranbí nosadia moposaḷamat.

AYUB 25:4

Degá intau motusi kon mata i Allah? Degá nodarit kon tayowon-Nea?

TITUS 3:4

Táe ki Allah, Mopoposaḷamat naton ain nopoontong in tabi bo kopopia in gina-Nea kon i naton.

SURAT I PAULUS KON JAMAAT RUM 9:30

Dá, nanaa in kasimpulannea: Bangusa mita ibanea inta deeman Yahudi in diábí moramuji konbá motompia bui in hubungan monia takin i Allah. Táe popisí in mosia mopirisaya, dá sinompiadon bui i Allah in hubungan monia takin-Nea.

SURAT I PAULUS KON JAMAAT RUM 9:16

Dá tuamai kaputusan i Allah diábí noidoyon kon ibog in intau ande kon ḷopí in intau, táe pinodoyonbí kon onu inta kinosanangan in gina-Nea kon intau inta piniḻí-Nea tatua.

SURAT I PAULUS KON JAMAAT RUM 4:5

Táe oyúon in intau inta diábí tumogot kon usahanea tontaní; sia in moposarakanbí in kobiagan-Nea kon i Allah inta moposaḷamat kon intau mita baradosa. Dá pirisayaneabí tatua in nobaḻí dodoyonan pinotarimaan i Allah kon inia saḷaku intau inta mokosanang kon gina-Nea.

LUKAS 1:72

Sin mopoontong in totabi-Nea kon i mogoguyang naton podudui in dandi-Nea. Sin dandi-Nea tua in umuranbí kinotoropan-Nea.

YESAYA 57:12

Táe Akuoi in mopotaau kon inimu; kotoḷutuimu tatua in diábí totuu, bo bayongan in aidmu tatua in diábí in baragunanea kon inimu.

IBRANI 6:6

Táe nonoḻikudon bui, yo diá bidon bui in sia toimbaguon komintanpa sinbá mogogaidon in mogaid kon inta diá mopia, sin mosia tua in buibí mopopakú kon kayu pinoyotaḻempang kon i Adí i Allah sin kopontingan monia tontaní bo moningkuḻe kon i-Nia kon tayowon intau moantó.

MAZMUR 86:5

Iko in mopia, o Tuhan, bo moibog mongampung, intau inta mosambayang kon ini-Mu umuranbí kotabi-Mu takin tabi inta moiḻiu.

MAZMUR 62:12

Kotongonumaidon in dinongogku in ki Allah noguman kon kawasa in nongkon i-Niabí,

AYUB 15:14

Degá intau in totokbí in diá kotaḷá? Motaau degá in sia pobanaron kon tayowon i Allah?

AYUB 9:20

Akuoi in motoindudui bo diá nogaid kon dosa, táe bibigku naonda bo moguman kon inta noyoposi kon tua; pomuḷoi in singog inta momuká kon bibigku, naonda bo mopotaḷá kon inakó.

YEHEZKIEL 36:25

Mopaḷut mako kon tua moiko in pisikan-Ku in tubig inta mosilang, sinbá modaritdon nongkon bayongan in berhalamu bo nongkon bayongan yagi-yagi inta ain nokokotor kon i monimu.

MATIUS 3:11

Akuoi mopobaptis in tubig kon i monimu, saḷaku bukti kon moiko aindon mogogai in mogaid kon inta diá mopia, táe Sia inta mamangoi moiduduimai kon inakó naa, kawasa-Nea moiḻiu totok kon inakó, sedang tongá mobuka kon togot in sapatu-Nea yo diá patus in akuoi. Sia in mopobaptis kon i monimu in Roho i Allah bo tuḷu.

SURAT I PAULUS KON JAMAAT RUM 11:14

Haraponku mako akuoi in mokopomuká kon intoi kon intau mita tobangusaku, sin aka natua yo motaau posaḷamatonku in tongonumai intau nongkon i monia tua.

IBRANI 10:22

Tuamai, koḻigai dimiugdon in kita kon i Allah takin gina motuḻid bo totu-totuudon mopirisaya sin gina naton in dinaritandon nongkon raian mita inta mongoraat, bo awak naton in dinaritan domandon in tubig inta modarit totok.