TITUS 2:7 - Alkitab Singog In Mongondow Masa In Tanaa

⁷ Bo kon bayongan in yagi-yagi, oaidmu in musti mobaḻí dodayanan inta mopia kon i monia. Aka motundú in iko yo mustibí mokopojujur bo totu-totuu motundú.

TITUS 2:7 Referans Kwoze

PETRUS 1 5:3

Bo dikabí in moiko naonda bo pongawasa kon i monia inta pinoki ḷukad kon i monimu, táe moiko in mustibí mobaḻí contoh kon i monia.

TIMOTIUS 1 4:12

Mokopoingat sinbá diá in tobatúmai intau in mopandang enteng kon inimu popisí in iko noguodpa. Táe poramujidon sinbá iko in umuran mobaḻí contoh bo doduduianmai kon soaḷ inta mopia i intau mita inta mopirisaya, pinangkoi kon pososingog, oaid bo kon soaḷ kototabimu kon tumpaḷa intau bo kopopirisayamu kon i Kristus Yesus takin kobobiagmu inta motompia.

PILIPI 1:10

Sahingga in kotaauandon monimu in momiḻí kon onu inta totok in mopia, bo kobobiagmu in diádon singkuḻeon ande poponapudan in onuka kon singgai ki Kristus moiangoidon bui.

KORINTUS 2 4:2

Kami in doíbí tongá umuni-uni sin mokooyábí in natua. Bo kami in doíbí mogaid takin gina inta diá motuḻid bo poḷat doman mopotaḷá in singog i Allah. Kami in nogaid kon oaidan i Allah takinbí gina motuḻid ná inta kinoibog-Nea. Tuamai in harapon mako tua, kopiaan in monilai kon i nami.

KORINTUS 2 1:12

Noḷunganga totok in gina nami, sin noyakin bidon in kami kon kobobiag nami kon dunia naa – apapa doman hubungan nami bo i monimu – tantúbí nami sinompia takin gina motuḻid bo nobayag. Tua komintan in inaidan nami, deemanbí pinodoyon kon kapandoian raian in intau, táe pinodoyonbí kon ropot inta pinonotabi i Allah.

TESALONIKA 2 3:9

Deemanbí popisí in diá in hak nami mokituḷung kon i monimu, táe ibogon nami bá moiko in dumudui kon aid nami.

EPESUS 6:24

Igumon doman mako barakatan i Allah in moiko komintan inta motabi kon i Tuhan naton inta ki Yesus Kristus takin tabi inta diá moobo-obot. Horomat nami, Ki Paulus

KORINTUS 2 2:17

Sin kami in diábí ná intau ibanea inta tongá moibog motayak kon kauntungan nongkon habar i Allah tatua. Motuḻidbí totok in tujuan nami, sin ki Allahbí in nokiaid intua komintan kon i nami. Bo inontongbí i Allah tontaní kon kami in nopoyaput in habar tatua nogaidbí saḷaku mogogaid mita i Kristus.

KORINTUS 2 8:8

Naa in potaauku kon i monimu deemanbí saḷaku parenta. Táe moponorop kon nobayongdon totok intau moramuji motuḷung kon tumpaḷa intau, tuamai moibog doman in akuoi monotaau mongo nodapot domandon onda in tabi monimu kon tumpaḷa intau.

TIMOTIUS 1 5:10

bo kinotaauan doman in intau kon umuranbí in sia nogaid kon inta mopia, ná umpamanea, ain nonompia kon i adínea mita, motabi kon tumpaḷa intau, moibog mobogoi in kaanon kon intau mita mopirisaya. Moibog doman motuḷung kon intau mita inta nobiag nobogá, pokoknea mosia in totu-totuudon nogaid kon onu inta mopia.

TITUS 3:8

Totuubí in singog tanaa. Ibogonku in naa komintan potaaumu kon i monia, sinbá mosia inta ain nopirisaya kon i Allah totu-totuudon moramuji mogaid kon inta mopia, sin natuabí in mopia bo inta baraguna kon bayongan intau.