TITUS 2:5 - Alkitab Singog In Mongondow Masa In Tanaa

⁵ musti mobiag mobijaksana, motuḻid in raian bo mobaḻí buḷoi inta motaau moḷukad kon tonibuḷoi monia ( motaau monompia kon tombonu in baḷoinea). Mopia in gina bo motabi kon i buḷoinea. Aka natua in oaid monia, yo diábí in moningkuḻe kon Habar Mopia inta nongkon i Allah.

TITUS 2:5 Referans Kwoze

KOLOSE 3:18

Utat mita, buḷoi bobay! Horomatbí in ki buḷoimu, sin mustibí natua in aidanmu saḷaku intau in Keresten.

TIMOTIUS 1 5:10

bo kinotaauan doman in intau kon umuranbí in sia nogaid kon inta mopia, ná umpamanea, ain nonompia kon i adínea mita, motabi kon tumpaḷa intau, moibog mobogoi in kaanon kon intau mita mopirisaya. Moibog doman motuḷung kon intau mita inta nobiag nobogá, pokoknea mosia in totu-totuudon nogaid kon onu inta mopia.

KINOBAḺIAN 3:16

Bo ki Tuhan in noguman kon bobay tatua, “Dugangan-Ku in rorigamu kon tungkuḷ in iko sidia bo kon dodai in iko mononggadí. Táe umpaka natua, iko in umuranbí doman mosiug moyotakin i buḷoimu, bo iko in tantúbí kon bonu in kawasanea.”

EPESUS 5:33

Táe tontagá tanaa noyohubung doman i monimu: Tuamai kotabibí in ki buḷoimu naonda bo kototabimu kon awakmu tontaní, ná doman tua, buḷoi bobay in musti tantú moramuji mohoromat kon i buḷoinea.

OUMAN IN RASUL MITA 9:36

Kon ḻipú tatua oyúon doman in bobay, tangoinea in ki Tabita. Sia in tobatú intau inta mopirisaya kon i Yesus. (Aka kon Yunani, ki Dorkas in tangoinea.) Sia in umuran mogaid kon inta mopia bo umuran moibog motuḷung kon intau mita inta nobiag nobogá.

TIMOTIUS 1 6:1

Intau mita in Keresten inta nobaḻídon ata in mustibí tantú mohoromat kon i tuangnea, sinbá tangoi i Allah bo inta sinundú i Allah kon i naton in diá singkuḻeon intau.

KORINTUS 1 14:34

aka kon poyoyodungkuḷan natua, bobay in diábí motaau in mosingog. Mosia in musti kibio-biómai. Mosia in diábí motaau mobaḻí itoi; ná inta kon bonu in hukum i Musa.

KORINTUS 1 11:3

Tongá ibogonku in bá kotaauan doman monimu in atorang mita kon bonu in jamaat. Tongguḷu i Kristus in ki Allah. Tongguḷu in ḷoḷaki in ki Kristus. Yo tongguḷu in bobay tuata in ḷoḷaki.

SURAT I PAULUS KON JAMAAT RUM 2:24

Kon bonu in Buk Motusi pinais nanaa: “Popisí moiko intau mita in Yahudi, dá tangoi i Allah iromu-romúmaidon kon sigad in intau ibanea.”

OUMAN IN RASUL MITA 9:39

Ki Petrus in baḷú nonoinut bo minayá noyotakin monia. Naonda in noiyaputmai kon tua, dinia monia in sia noponik kon gopot inta pinogukatan kon mayat i Dorkas. Bayongan in intau inta dongkadon boba-bobay komintan namangoi sinimindog kon diug i Petrus poḷat nongombaḷ bo mopoontong doman in ḷambung inta inaidan mita i Dorkas wakutu in nobiagpa.

MAZMUR 74:10

Modapot in toonu, o Allah, musung in morebeg kon ini-Mu? Modapot degá in mononoi mosia in moningkuḻe kon tangoi-Mu?

SAMUEL 2 12:14

Tongá popisí in ki Tuang ain nopoompámai kon i Tuhan pinongin oaid tatua, dá ki adí ḷoḷaki i Tuang inta bagupa pinononggadí tatua in matoibí.”

KINOBAḺIAN 18:9

Onda intua mosia in noḻibó, “Kon onda in ki Sara, ki buḷoimu?” “Tua in sia, kon bonu in ḷoḷaigan,” tubag i Abraham.

SURAT I PAULUS KON JAMAAT RUM 14:16

Manangka intua donaaidon pomayámu mako in onu inta mopia kon inimu in anggapon intau ibanea diá mopia.

TITUS 2:4

sinbá motaaudon mosia modidik kon bobay mita inta bagu pinobuḷoi bá motabi kon i buḷoi bo kon i adí monia,