TESALONIKA 1 2:2 - Alkitab Singog In Mongondow Masa In Tanaa

² Bo kinotaauan bidon monimu kon wakutu in kami diápa namangoi kon i monimu kon Tesalonika, kami in muna bidon pinogutú bo siningkuḻe kon kotá in Pilipi. Táe umpaka nobayong in intau moḷawang kon i nami, táe umuranbí inogoian i Allah naton in kabaranian in kami mopotaau kon i monimu in Habar Mopia inta nongkon i Allah.

TESALONIKA 1 2:2 Referans Kwoze

OUMAN IN RASUL MITA 4:13

Intau mita kon tua inta nosidang kon i Petrus bo kon i Yohanes noherang totok in nokoontong kon kobobarani nayadua, bokaka kinotaauanbí monia kon taya dua tua in intaubí inta diá nosikoḷa. Bain tua bo kinotoropan monia kon taya dua tua in dumoduduibí i Yesus.

TIMOTIUS 2 1:12

Tuamai akuoi in nokorasa kon bayongan roriga tatua, táe akuoi in umuranbí moyakin sin kinotaauankubí totok ki ine in pinirisayaku tua. Moyakinbí in akuoi kon onu inta ain inogoi-Nea pinoki aid kon inakó tantúbí koḷukadan-Nea modapot in Singgai Pangabisan.

OUMAN IN RASUL MITA 16:37

Táe ki Paulus in noguman kon intau inta pinotabá monia tatua, “Kami naa intaubí doman in Rum. Diápa kinotaauan monimu in kami mongo noitaḷá andeka diá, táe kami in sinambokdon muna monimu kon tayowon intau moantó bo pinobonu kon ponjara. Bo tanaa mosia in mopotabádon kon inami mayá takin umuni-uni? Doíbí in kami natua! Potabádon mangoi kon naa in pomarenta mita tatua bo momuḻi kon i nami.”

TESALONIKA 1 1:5

Sin kami in nopoyaput in Habar Mopia kon i monimu deemanbí pinodoyon kon pandoi nami, táe pinodoyonbí kon kawasa in Roho i Allah inta umuran kotaki-takin nami. Bo totokbí iyakin nami kon totuubí in Habar Mopia tatua. Kinotaauan bidon monimu in kobobiag nami wakutu in kotaki-takinpa monimu. Kami in umuran noramuji in nogaid sin kopontingan monimu.

KOLOSE 2:1

Ibogonku in bá kotaauan doman monimu in rorigaku wakutu in noramuji nogaid sin kopontingan monimu bo kopontingan monia inta kon Laodikia bo kon i monia komintan inta diápa nonotaau kon inakó.

OUMAN IN RASUL MITA 17:17

Tuamai wakutu in kon baḷoi pososambayangan, sia in umuran mososiritaanmai takin in bayongan intau Yahudi bo intau mita ibanea kon tua inta ain nopirisaya kon i Allah. Ná doman tua, pomuḷoi in singgai aka moyodungkuḷ in intau mita kon pasar mita, yo sia in umuran doman mososiritaanmai monia.

OUMAN IN RASUL MITA 14:3

Manangka intua ki Paulus bo ki Barnabas in nogutun noḻin onggot kon tua. Bo umuranbí nobarani in mosia in nongonguman kon soaḷ ki Tuhan. Dá pinoniatadon i Tuhan kon habar inta pinotaau monia soaḷ totabi-Nea tatua in totuubí; mosia in inogoian-Neadon in kawasa mogaid kon soaḷ mita inta mokoherang bo inta diá komampuan in intau aidan.

OUMAN IN RASUL MITA 5:41

Rasul mita tatua in nobuidon nongkon sidang agama tatua takin pia in gina, sin kinotaauan bidon monia kon natuabí in mobaḻí dumodudui i Yesus. Patusbí in mosia motarima kon singkuḻe lantaran ki Yesus.

OUMAN IN RASUL MITA 4:31

Bo naonda in mosia nosambayang, tampat pinoyosipunan monia tatua in nodandú bo mosia komintan in kinawasa in Roho i Allah, dá mosia in diádon inangoian ondok in nopotaau in Pirman i Allah.

OUMAN IN RASUL MITA 4:20

Sin diábí motaau in kami in mogogai mopotaau kon onu inta ain inontong bo dinongog nami tontaní.”

YUDAS 1:3

Utat mita inta kinotabiku! Totuu kon oyúonbí in makusudku in nomais kon surat tanaa kon i monimu, tuata in soaḷ kasaḷamatan inta ain tumpaḷa kinorasaan naton. Kon soaḷ tanaa totokdon kon ginaku in momais kon surat kon i monimu bo mononggina sinbá moiko in umuran mokoporoton in kumadai kon onu inta ain pinirisaya monimu inta ain pinoyaput kon intau mita inta ain inoiní i Allah.

OUMAN IN RASUL MITA 19:8

Toḷu nobuḷan in ki Paulus umuran nobarani in nongonguman kon bonu in baḷoi pososambayangan bo mosisoaḷan takin bayongan in intau kon tua sin mopoyakin kon i monia in soaḷ ná onda in ki Allah momarenta saḷaku Datu.

OUMAN IN RASUL MITA 16:12

Nongkon tua kami minayá in Pilipi, tobatú kotá kon distrik inta dungkuḷ kon Makedonia. Pilipi naa in jajahan pomarenta in Rum. Kon tua kami in nogutun tongonumai nosinggai.

OUMAN IN RASUL MITA 14:5

Bo intau mita in Yahudi takin itoi mita monia noyotakin in intau mita deeman Yahudi in noyopakat moposikisa bo mogandur in batu kon rasul mita tatua

OUMAN IN RASUL MITA 16:19

Naonda in bobay mita inta pinobantungan in bobay mononoḻindap tatua nokotaaudon kon diádon in kasampatan monia mokouḻí kon doit mobayong, dá dinomok monia in ki Paulus bo ki Silas bo dinia monia pinobayá in pasar pinotayow kon mongongawasa kon tua.

OUMAN IN RASUL MITA 17:1

Ki Paulus bo ki Silas nopobayá in Tesalonika nogingguput kon bobayáan monia. Mosia in nongin Ampipolis bo Apolonia. Kon tua oyúon in baḷoi pososambayangan intau Yahudi.

SURAT I PAULUS KON JAMAAT RUM 1:1

Utatku mita kon Rum inta kinotabi i Allah bo inta ain piniḻí-Nea sin baḻíondon umat-Nea. Akuoi in piniḻídon i Allah bo ain binaḻí-Nea intau inta mopotaau in Habar Mopia nongkon i-Nia.

KORINTUS 2 3:12

Lantaran natua in harapan nami, dá mobarani in kami mosingog kon natua.