TAWARIKH 2 5:2 - Alkitab Singog In Mongondow Masa In Tanaa

² Nopaḷut mako kon tua ki Datu Salomo nopotabá in bayongan itoi in suku bo inanakan nongkon bangusa in Israel noyosipun kon Yerusalem sin momamping kon Poti Dodandian i Tuhan nongkon Sion, kotá i Daud kon Baḷoi Tuhan.

TAWARIKH 2 5:2 Referans Kwoze

SAMUEL 2 6:12

Dinongogdon i Datu Daud kon ki Tuhan in nomarakatdon kon motoḷuadí i Obed-Edom takin bayongan in kapunyaannea popisí in Poti Dodandian tatua. Dá minayádon in sia kon baḷoi i Obed-Edom, nogamá kon Poti Dodandian tatua sin pampingon kon Yerusalem takin pia in gina.

TAWARIKH 2 1:4

Táe Poti Dodandian i Tuhan in kon Yerusalem kon bonu in ḷoḷaigan inta pinosindog i Datu Daud sin potagúan kon Poti tatua kon dodai in pinampingnea nongkon Kiryat-Yearim.)

MAZMUR 87:2

Nongkon bayongan in kotá kon Israel, Yerusalembí inta totok in kinotabi-Nea.

MAZMUR 2:6

Kai-Nia, “Kon Sion buḷud-Ku inta motusi aindon dinuí-Ku datu inta piniḻí-Ku.”

TAWARIKH 2 5:1

Naonda in ki Datu Salomo nopaḷut noposindog in Baḷoi Tuhan tatua, sinagúnea kon bonu in ontag mita in baḷoi tatua in bayongan saḷaka, buḷawan, bo pakakat mita ibanea inta ain pinosumba i Daud ki amánea kon i Tuhan.

TAWARIKH 1 28:1

Ki Datu Daud in nomarenta sinbá bayongan in itoi in Israel moyosipun kon Yerusalem. Dá bayongan tongguḷu in suku, pojabat mita inta nokadai kon pomarentaan, tongguḷu mita in inanakan, moḷoḷukad mita kon bayongan kapunyaan bo bobiagon i datu bo ki adínea mita ḷoḷaki – impoḷok mako in tosingogon intau mita moḷoben kon komaḻig, porwira mita bo intau moponting, komintan noyosipun kon Yerusalem.

TAWARIKH 1 26:26

Ki Selomit bo ki utatnea mita in inogoian in oaidan moḷukad kon bayongan inta inogoi inta pinosumba i Datu Daud, in tongguḷu mita in motoḷuadí, itoi mita in inanakan, bo porwira mita moḷantud.

TAWARIKH 1 24:31

Kon dodai in mosia mopobayá in oaidan monia, kon batúan in tongguḷu in motoḷuadí takin ki ai-ainea tobatú inta ḷoḷaki morabut kon undi ná inta inaidan in ginaḷum monia, inta imang mita buí i Harun. Porabutan kon undi tatua inindoian mako i Datu Daud takin i Zadok, i Ahimelek bo tongguḷu mita in motoḷuadí nongkon golongan in imang mita bo nongkon golongan in intau in Lewi.

TAWARIKH 1 24:6

Buí i Eleazar bo buí i Itamar in moyo-moyoḷuan in morabut kon undi bo tangoi mita monia in paison in momomais tobatú inta tangoinea in ki Semaya adí i Netaneel intau in Lewi. Bayongan intua inaidan kon tayowon in datu takin bayongan in pogawainea mita. Ki Imang Zadok, ki Ahimelek ki adí i Abyatar bo tongguḷu mita in motoḷuadí i imang bo tongguḷu mita in motoḷuadí i Lewi.

TAWARIKH 1 16:1

Poti Dodandian tatua inukat kon bonu in ḷoḷaigan inta ain sinadia i Daud kon potagúan kon poti tatua. Bo noposumba in mosia kon i Allah in kuruban payongon bo kuruban dodamean.

TAWARIKH 1 15:25

Dá minayádon in ki Datu Daud takin itoi mita in Israel bo porwira mita kon baḷoi Obed-Edom sin mogamá kon Poti Dodandian tatua takin pinoramean moḷoben.

TAWARIKH 1 15:12

Guman i Daud kon i monia, “Moiko in itoi in inanakan kon bonu in suku Lewi. Tuamai, musti in moiko bo intau mita in Lewi ibanea mopotusi in awak sinbá motaau momamping kon Poti Dodandian i Tuhan, Allah in Israel, kon tampat inta ain sinadiaku.

SAMUEL 2 5:7

Ki Daud in noguman kon intaunea, “Oyúon degá in kon naa in intau inta mobú kon intau in Yebus ná doman akuoi mobú kon i monia? Mobúdon totok degá in sia modapot in sia moibogdon totok moḻimod kon i monia? Aka natua, tuotdon mongin daḷan in tubig bo tubudon in intau mita inta nosedó bo nobilog inta kinobúmu tua.” (Tuamai intau nosingog, “Intau bilog bo intau nosedó diábí motaau in tumuot kon Baḷoi i Tuhan.”) Ki Daud nokoḷongasi nogagow kon poḷoḷukadan in Sion bo iḻitúannea. Sinangoiannea “Kotá i Daud.” Kotá tatua pinosindognea kon ḻibu in poḷoḷukadan tatua, pinangkoi nongkon dotá in pomukaan kon buḷud inta sinuod pinomonturungan kon butá.

PINOGIAPAN 10:36

Bo pomuḷoi in Poti Dodandian tatua modapot kon tampat pogogaian, ki Musa moguman, “Angoidon kon naa, o Tuhan, kon ribuan motoḷuadí in Israel.”

PINOGIAPAN 10:33

Naonda in bangusa Israel nonaḷámai kon Sinai, buḷud i Tuhan, mosia in minayá toḷu nosinggai in koonggotnea. Poti Dodandian i Tuhan umuran diaan pouna kon i monia sin motayak kon tampat pononḷoḷaigan kon i monia.

IMAMAT 9:5

Bayongan inta pinongoyow i Musa dinia monia kon tayowon in Ḷoḷaigan, bo bayongan umat noyosipun kon tua sin moibada kon i Tuhan.

TAWARIKH 1 15:1

Ki Daud noposindog in baḷoi mita kon inia kon Kotá i Daud, bo noposadia in tampat potagúan kon Poti Dodandian i Allah bo noposindog in ḷoḷaigan pogukatan kon Poti tatua.

TAWARIKH 1 15:3

Dá ki Daud in nogoiní kon bayongan in intau Israel namangoi kon Yerusalem sin momamping kon Poti Dodandian i Tuhan pobayá in tampat inta ain sinadianea.