TAWARIKH 2 34:3 - Alkitab Singog In Mongondow Masa In Tanaa

³ Naonda in waḷudon notaong in nobaḻí datu, kon umur inta totokpa in noguod, ki Yosia in nomangkoidon noibada kon i Allah inta sinumba i Datu Daud mogoguyangnea. Opat notaong noiduduimai nomangkoidon in sia norimumud kon tampat mita pososumbaan kon berhala, patong mita i dewi Asyera, bo berhala mita ibanea.

TAWARIKH 2 34:3 Referans Kwoze

TAWARIKH 2 33:22

Naonda bo ki amánea sia in binaradosa doman kon i Tuhan. Sia in nosumba kon berhala mita inta sinumba i amánea bo noposumba in kuruban kon berhala mita tatua.

TAWARIKH 2 15:2

dá minayá in sia nokipodungkuḷ kon i Datu Asa, bo noguman, “Uḻe Datu Asa, bo bayongan in intau inta nogutun kon Yohuda bo kon Benyamin! Indongogai! Ki Tuhan modagin kon i monimu aka moiko modagin kon i-Nia. Aka moiko mopoigum in topotundú i Tuhan, yo ogoian-Neabí doman. Táe aka moiko doí mopandungmai kon i-Nia, yo diábí doman in Sia mopandungmai kon i monimu.

AMSAL 8:17

Akuoi in motabi kon i monia inta moibog kon inakó; inta motayak kon inakó, in moyodungkuḷkubí.

TAWARIKH 2 33:17

Rayat in umuranpabí doman moposumba in kuruban kon tampat mita pososumbaan ibanea, táe pinosumbaan tatua in kon i Tuhanbí.

TIMOTIUS 2 3:15

Musti umuran toroponmu mako, kon nongkon mointokanpamai iko ain nonotaau kon Buk Motusi. Bo Buk Motusi tatua in nobogoi in pongortian kon inimu, sinbá mokouḻí kon kasaḷamatan inta pinodoyon kon pirisaya kon i Kristus Yesus.

MATIUS 6:33

Táe, tayakpa muna in ki Allah bo aidaidon onu inta kinoibog-Nea. Dá komintan tua in ogoi-Neabí doman kon inimu.

MOHOHUTUBA 12:1

Toropbí in ki Inta nomaḻí kon inimu kon tungkuḷ in iko nobagupa, kon dodai in diápa moiangoi in taong mita inta mopuḻing in roriga. Kon tungkuḷ intua iko in moguman, “Kobiaganku in diá mokosanang.”

MAZMUR 119:9

Intau moguodpa in mokoḷukadbí kon kobiagannea diá in bogit aka mobiag in sia podudui in parenta-Mu.

TAWARIKH 2 30:14

Mezbah mita kon Yerusalem inta pinaké sin moposumba in kuruban bo motubá kon dupa kon i dewa mita, komintandon ginamá bo iḷumbú kon bonu in Ḷopá in Kidron.

TAWARIKH 1 29:1

Bo ki Datu Daud in nogumandon kon bayongan in intau inta noyosipun kon tua, “Nongkon bayongan in adíku ḷoḷaki, ki Salomobí in piniḻí i Allah. Táe nobagupa totok in sia bo noyakagpa in pongalamannea bokaka oaidan tanaa in totokbí in moḷoben. Apa doman inta posindogon tatua in deemanbí komaḻig in intau, táe baḷoibí kon i Tuhan Allah.

TAWARIKH 1 28:9

Bo ki Daud in noguman kon i Salomo nanaa, “Adíku, igumonku sinbá ki Allah inta sinumba i amámu, in akuonmu nobaḻí ki Allahmu. Iko in mustibí mogundoi kon i-Nia takin ḻimbatúon in gina bo gina mobayag. Sin kinotaauan-Neabí in bayongan raian bo ibog naton. Aka iko motayak kon i-Nia, yo mouḻímubí in Sia, táe aka iko monaḷámai kon i-Nia, yo indoíon-Nea bidon in iko modapot in mononoi.

TAWARIKH 1 22:5

Bayongan intua inaidan i Daud sin sia in norai nanaa: “Musti in akuoi moposadia in bayongan onu inta pakéon pogaid kon Baḷoi Tuhan. Sin ki Salomo ki adíku ḷoḷaki in nobagupa bo diápa kopongalaman, bo Baḷoi Tuhan inta posindogonnea in mustibí mogaga totok bo ponango-nangoian kon sinangkub in dunia naa.” Dá kon dodai in ki Daud diápa minatoi, nobarongdon totok in sinadianea in pakakat mita pogaid kon baḷoi tatua.

DATU MITA 2 23:14

Tugu mita in dewa bo patong i dewi Asyera in inumpag, bo butá inta pinoposindogan in tugu mita bo patong mita tatua, binumbunan i Yosia in tuḷan mita in intau.

DATU MITA 2 23:4

Nopaḷut mako kon tua ki datu in nomarenta kon i Imang Moḷoben ki Hilkia, imang mita mogogopod bo moḷoḷukad inta nopobayá in oaidan kon ngara in Baḷoi Tuhan, sinbá mopoḷuai nongkon baḷoi tatua in bayongan pakakat inta pinaké posumbaan kon i Baal Dewi Asyera, bo tundi mita. Bayongan in pakakat mita tatua sinubá i Datu Yosia kon ḷuai in kotá kon diug in Ḷopá in Kidron, bo ḷobudnea in dinia kon Betel.

DATU MITA 2 18:4

Irimumudneadon in tampat mita pososumbaan kon dewa, bo inumpagnea domandon in tugunea mita poḷat nomoguyaat kon patong i Dewi Asyera. Bo irimumudnea doman in uḷag bitú inta pinomia i Musa inta sinangoian Nehustan. Sin, noidapot in kon dodai intua intau in Israel tantúpa doman motubá kon dupa sin mohoromat kon uḷag bitú tatua.

DATU MITA IMITÁNEA 13:2

Podudui in parenta i Tuhan nomaḷúdon in nabi tatua kon mezbah tatua, “Ei mezbah, ei mezbah! Nanaabí in guman i Tuhan, ‘Adí tobatú inta tangoian ki Yosia in pononggadíbí nongkon motoḷuadí i Daud. Kon tudumu naa, ei mezbah, ḻimodonnea in imang mita inta mopobayá in oaidan monia kon tampat pososumbaan kon dewa, bo inta ain doman noposumba in kuruban kon tudumu. Bo kon tudumu doman nion in potubáannea kon tuḷan mita in intau.’ ”

IMAMAT 26:30

Rimumudon-Kudon in tampat mita pososumbaanmu kon tudu in buḷud mita, mogumpag kon mezbahmu mita tampat pototubáan kon dupa, bo mopogambat in mayat mita monimu kon tudu in toḻindua mita in Tuhanmu inta ain noumpag tatua. Takin yaat in gina

IḶUAIAN 34:13

Dá, dikadon mogaid kon natua, táe tokoumpagdon in mezbah mita monia, rimumudon in tugu mita karamat monia bo toko pupuḷdon in oigi mita i Asyera, berhala monia.

TAWARIKH 2 34:33

Berhala mita inta mokorongó inta kon tampat mita inta noituot kon butá in intau Israel, komintanbí irimumud i Datu Yosia. Bo pinakisanea in rayatnea moibada kon i Tuhan, Allah in mogoguyang monia. Dá kon bonu in ki Yosia nobiag, rayat in umuran mosatia kon i Tuhan.

MIKHA 1:5

Bayongan tua in mobaḻíbí popisí in intau in Israel binaradosa bo nomarontak kon i Allah. Ki ine in nokopopisí kon Israel binaradosa? Tuata in Samaria inta ki iná in kotánea tontaní! Ki ine in nokopopisí kon Yohuda nosumba kon berhala? Yerusalembí tontaní ah!

DATU MITA 2 10:27

Patong tatua in irimumud takin baḷoinea bo tampat tatua in binaḻídon poḷoḷumbúan kon tubig dapot in singgai naa.

DATU MITA 2 20:5

buipa bayá kon i Hizkia, datu in umat i Tuhan, bo potaau in koyow tanaa, “Akuoi, ki Tuhan, Allah inta sinumba i Daud mogoguyangmu, ain nokodongog kon sambayangmu bo nokoontongdon kon ḷuámu. Undaman-Kudon in iko; toumá in iko in mayádon kon Baḷoi-Ku.

TAWARIKH 2 14:6

dá notaaudon in sia noposindog poḷoḷukadan mita kon kotá mita in Yohuda. Tongonumai notaong diábí in parang sin ki Tuhan in nobogoi in kaadaan noonow kon inia.

TAWARIKH 2 33:15

Iḷumbúnea in patong mita in dewa in bangusa mita ibanea bo berhala mita inta ain inukatnea kon Baḷoi Tuhan. Kinokainea in mezbah mita in berhala inta kon buḷud kon Baḷoi Tuhan, bo kon tampat mita ibanea kon Yerusalem. Tua komintan in dinianea kon ḷuai in kotá bo iḷumbú.

MAZMUR 71:5

Sin Ikobí in pongamanganku, o Tuhan, Tuhan, akuoi in mopirisaya kon ini-Mu pinangkoi kon noguodpa in akuoi.

AMSAL 20:11

Nongkon oaid in adí yo kotaauan bidon mongo dodianea mopia bo motuḻid.