TAWARIKH 2 30:6 - Alkitab Singog In Mongondow Masa In Tanaa

⁶ Pinodudui kon parenta i datu bo pogawainea mita pinotabádon in totabá mita minayá kon sinangkub in Yohuda bo Israel sin modia kon surat mita tatua inta nanaa in bonunea, “Rayat in Israel! Moiko nion in noiḷuatdon nongkon kawasa intau in Asyur. Tanaa in angoidon bui in moiko bo pogundoi kon i Tuhan, Allah inta sinumba i Abraham, i Ishak, bo i Yakub, sinbá Sia in buidon motuḷung kon i monimu.

TAWARIKH 2 30:6 Referans Kwoze

YEREMIA 51:31

Totabá mita in noḷagui moyo-moyodudui sin mopotaau kon i datu in Babel kon kotánea in sinubudon nongkon bayongan in tampat.

YEREMIA 4:1

Ki Tuhan in noguman, “Umat in Israel, aka moiko moibog mobui mangoi, yo pobuidon mangoi kon i-Nakó. Ḷumbúdon muna in berhala mita inta kinorongó-Ku tua, bo pokotoinduduidon kon i-Nakó.

ESTER 8:14

Dá nobuatdon in totabá mita tatua sinumakoi kon kabaḷo mita i datu. Kon Susan ibukotá in negara, binaca doman in parenta tatua.

DATU MITA 2 15:29

Kon tungkuḷ in pinomarentaan i Pekah, ki Tiglat-Pileser Datu in Asyur nogagow kon kotá in Iyon, Abel-Bet-Maakha, Yanoah, Kedes, Hazor, butá in Gilead, Galilea bo Naptali. Intau mita inta nogutun kon tua in dinianea doman nobaḻí intau mita inta dinakop bo dinia kon Asyur.

DATU MITA 2 15:19

Naonda in ki Pul datu in Asyur nonubu kon Israel, ki Menahem nobogoi kon inia in 34.000 nokilo in saḷaka sinbá sia in motuḷung moginrigon kon kawasa i Menahem kon Israel.

AYUB 9:25

Singgaiku mita moitaḻib moḻikat totok, bo moḷagui takin diá in sanang.

TAWARIKH 2 28:20

Ki datu in Asyur tatua in namangoi deemanbí motuḷung kon i Ahas, táe mopororigabí kon inia.

TAWARIKH 1 5:26

Tuamai in pinopogonúdon i Allah kon i Pul datu in Asyur, dá minayádon in sia nonubu kon butá tatua. Ki Pul in tangoi-tangoion doman ki Tiglat-Pileser. Bo suku Ruben, Gad bo suku Manasye inta kon dotá in pomukaan kon Yordan in dinianea nobaḻí intau mita inta sinokodakop kon parang bo iḷumbú kon Halah, Habor, Hara bo kon tampat tobatú inta kon diug in Ongkag in Gozan. Kon tua in pinogutunan monia bo notantú nodapot in singgai naa.

YAKOBUS 4:8

Diugaidon in ki Allah, bo ki Allah in dimiugdon kon i monimu. Daritaidon in ḻimamu, moiko inta binaradosa! Bo insilangaidon in ginamu, moiko inta nonanga in gina!

HOSEA 14:1

Samaria in mustibí hukumon popisí in nomarontak nonayow kon i-Nakó. Rayatnea in matoi kon poparangan; adí mita mointok monia in ḻintogon, bo bobay mita sidia in botakon in siannea.”

YEHEZKIEL 33:11

Potaaudon kon i monia, kon podoyon kon i-Nakó, ki Allah inta nobiag, ki Tuhan Inta Totok in moḷantud, diábí mopia in gina-Ku, aka intau moraat matoi; ibogon-Ku in sia in monaḷámai kon dosanea mita sinbá sia in umuran mobiag. Ei bangusa in Israel, pogogaidon in mogaid kon inta moraat! Nongonu sin moibogbí in moiko matoi?

OMBAḶ 5:21

Oo Tuhan, diádon in kami mobui mangoi kon ini-Mu; kami in mobuibí mangoi kon ini-Mu! Popobuidon in kaadaan nami ná dungkuḷmai.

YESAYA 6:13

Modapot in aka kon sigad in intau mopuḷú oyúonpa in tobatú inta nogutun kon butá tatua, sia in yopúonbí doman. Táe naonda bo pangkoi in nunuk aka pupuḷon yo oyúonpa in tuodnea, natua doman oyúonpa in ki agat in bangusa tatua inta nobaḻí pomangkoian in umat inta motusi.”

YESAYA 1:9

Aka ki Tuhan Inta Totok in mokawasa diá noposaḷamat kon tongonumai in intau kon i naton, yo kita in noyopú bidon komintan, naonda bo Sodom bo Gomora.

YEREMIA 29:1

Akuoi in nomais kon surat kon imang mita, nabi mita bo itoi mita in bangusa inta nobiagpa, bo kon bayongan intau ibanea inta ain inakut i Nebukadnezar nongkon Yerusalem pinobayá in Babel.

DATU MITA IMITÁNEA 18:36

Naonda in orasdon moposumba in kuruban ḷoḷabungnea, ki Nabi Elia in dinimiug kon mezbah tatua bo nosambayang, “Oo Tuhan, Allah inta sinumba i Abraham, i Ishak bo i Yakub, poniatadon in tanaa mako kon Ikobí in Allah kon Israel, bo akuoi naa in mogogundoi-Mu. Poniatadon doman kon bayongan inta pinomiaku naa in parenta-Mubí.

TAWARIKH 1 29:18

Oo Tuhan Allah, inta sinumba i Abraham, i Ishak bo i Yakub, mogoguyang nami, igumon mako ḷukadan-Mu mako sinbá umat-Mu tantú motabi kon ini-Mu ná tanaa mako bo tuḷungaidon sinbá mosia in umuran mosatia kon ini-Mu.

YEREMIA 3:14

Ki Tuhan in noguman, “Ei umat inta diá mosatia, pobuidon mangoi kon i-Nakó! Moiko in Akuoi in kitogi. Akuoi in mogamábí kon inimu, tumongo batu in kon batúan in kotá, tododoyowa in kon batúan in inanakan, bo modia kon i monimu mobui kon Buḷud in Sion.

OMBAḶ 3:40

Biódon mako kita in monaridi kon kobobiag naton, bo mobui kon i Tuhan Allah kon soroga. Igai bukatan naton in gina bo mosambayang,

HOSEA 6:1

Intau mita in Israel in noguman, “Igai mobuidon in kita kon i Tuhan. Siabí inta nopororiga kon i naton, táe Siabí doman inta monompia. Sia in nonongkekeb, táe Siabí doman in mobakut kon kekeb mita naton.

ZAKHARIA 1:3

Táe tanaa Akuoi in moguman kon inimu: Pobuidon mangoi kon i-Nakó, dá Akuoi in mobui domandon kon inimu.

ZAKHARIA 1:4

Dikadon ná mogoguyangmu. Dungkuḷmai nabi mita nopotaau in koyow-Ku kon i monia sinbá mosia in dikadon bui mogaid kon inta moraat bo dosa. Táe diá in mosia nopandungmai bo doí tumoindudui kon i-Nakó.