TAWARIKH 2 20:12 - Alkitab Singog In Mongondow Masa In Tanaa

¹² Ikobí in ki Allah nami! Hukumdon in mosia, sin kami in diádon mokopongonu in monayow kon tontara inta mobayong tatua, inta monubu kon inami. Diábí kotaauan nami mongo onupa in pomiaan nami, tuamai in mamangoi in kami kon ini-Mu mokituḷung.”

TAWARIKH 2 20:12 Referans Kwoze

MAZMUR 25:15

Mataku in umuranbí moindoi kon i Tuhan, sin Sia in noposaḷamat kon inakó nongkon anib.

MAZMUR 141:8

Táe akuoi in umuranbí mongamang kon ini-Mu, o Tuhan Allahku, dikabí pomayá mako in akuoi matoi, sin akuoi in noniung kon ini-Mu.

ULANGAN 32:36

Ki Tuhan in moposaḷamat kon umat-Nea bo motabidon kon mogogundoi-Nea mita, aka ontongon-Nea in mosia diádon kodaya bo kinodaitandon in ropot.

MAZMUR 9:19

Diábí modapot in mononoi intau bogá in ḻiongon; diábí modapot in mononoi intau mororiga kobuḻian in kamang.

MAZMUR 43:1

Ogoidon kon inakó in inta moadil, o Allah, duḷuaidon in hakku nongkon bangusa inta moraat. Poḷuatdon kaasí in akuoi nongkon intau moraat bo motombuḻitok.

YUNUS 2:4

Akuoi in nosingog kon bonu in ginaku: Ki Tuhan in nopoguntundon kon inakó naa nongkon tayowon-Nea. Diádon in akuoi mokoontong bui kon baḷoi pogogutunan-Nea inta motusi.

SAMUEL 2 14:11

Guman in bobay tatua, “Poigumon mako ki Tuangku in mosambayang kon i Tuhan Allah i Tuangku, sinbá intau inta moibog motuḻí kon kinopatoian i adíku tatua in diá modapot in mogaid kon inta moraat moḷoben takin moḻimod kon i adíku inta dongkadon tobatú tatua.” Tubag i Daud, “Podoyon kon i Tuhan inta nobiag, ki adímu tatua in diábí onuon umpaka tongá topiḻikmai.”

SAMUEL 1 3:13

Aindon pinotaau-Ku kon inia kon motoḷuadínea in umuran hukumon-Ku popisí in ki adínea mita ain nokopoonagmai kon i-Nakó. Kinotaauanbí i Eli in dosa mita monia tua, táe diábí sinorúannea.

HAKIM MITA 11:27

Diábí, kami in diábí kotaḷá kon inimu. Ikobí nion in kotaḷá sin ain nonubu kon inami. Ki Tuhanbí in hakim singgai in naa inta monantú kon pelekara kon sigad in bangusa in Israel bo bangusa in Amon.”

WAHYU 19:11

Noiduduimai kon tua inontongku in soroga nobukat, bo inontongku oyúon in tobatú kabaḷo nobudó. Ki inta sinumakoi kon kabaḷo tatua, tangoinea ki Mosatia bo ki Mobanar. Sia in moadilbí in monantú kon hukuman bo kon parang.

MAZMUR 7:8

Sipundon in bangusa mita kon diug-Mumai, bo kawasaaidon in mosia nongkon tampat pomomarentaan-Mu kon soroga.

YOËL 3:12

Ki Tuhan in noguman bui, “Bangusa mita in mustibí mosadia bo mayá in Ḷopá in Pohakiman. Kon tua Akuoi ki Tuhan in monisig kon bangusa mita inta noyodiugmai in umat-Ku.

DATU MITA 2 6:15

Nopoikoḷomai kon singgai, doḷo-doḷom totok naonda in bobantung i Elisa nobangon bo iḻumuai, inontongnea in tontara in Siria nongopung kon kotá tatua notouḷut doman in kabaḷo bo kereta in parang monia. Dá, nobui minayá in sia kon i Elisa bo noguman, “Mobodito in kita, Tuang! Onu in aidan naton?”

YESAYA 42:4

Diá in gagawang andeka kobuḻian in kamang, modapot in inta moadil in posindogon kon dunia. Ḻipú mita inta moyayú mokotanob kon totundúnea.”

YESAYA 2:4

Sia in mohakimbí kon sigad in bangusa mita, bo momontow kon pelekara kon sigad in suku mita in bangusa. Pitow in tontaḷon pomiaan pajeko, bo ginubat aidan roratab. Bangusa mita in diábí mositubuan, diábí domandon mosadia moparang.

MAZMUR 7:6

yo pomayádon mako in akuoi inaḷowan bo dinomok in musung, poḷat iḻimod bo sinaḷáan mako natua kon butá.

SAMUEL 1 14:6

Dá nogumandon in ki Yonatan kon tayowmobiag tatua, “Igai mayá in kita kon poḷoḷukadan in intau in Pilistin inta kaper tatua. Dika-dika ki Tuhan moibogpabí motuḷung kon inaton. Sin ki Tuhan in motaaubí mobogoi in kauntungan pinomayá momaké in intau mobayong andeka intau moyakag.”

TAWARIKH 2 20:13

Kon dodai intua bayongan in ḷoḷaki in Yohuda takin buḷoi bo adí monia sinimindog kon Baḷoi Tuhan.

YESAYA 45:22

Ei, bayongan intau kon dunia, angoidon kon i-Nakó sinbá moiko in posaḷamaton, sin tongábí Akuoi in Allah, diábí in ibanea!

DATU MITA IMITÁNEA 1:20

Tuang datu Inta Momulia, bayongan rayat in Israel tanaa mako in dongkabí mogoḷat mako kon kotantúan in tosingogon i tuang datu mongo ki ine in momaḷui kon i tuang datu mobaḻí datu.

MAZMUR 94:2

Sindogdon, o Hakim in sinangkub in dunia, hukumdon in intau mododia podudui in aid monia.