TAWARIKH 2 18:13 - Alkitab Singog In Mongondow Masa In Tanaa

¹³ Táe ki Mikha in notubag, “Podoyon kon i Tuhan inta nobiag, akuoi in tongábí moguman kon onu inta pinoguman i Allah kon inakó!”

TAWARIKH 2 18:13 Referans Kwoze

PINOGIAPAN 22:35

Táe malaekat i Tuhan noguman, “Duduidon kon intau mita tatua. Táe singogonmu in tongábí onda inta pogumanku.” Dá ki Bileam nongingguputdon kon bobayáannea noyotakin in totabá mita i Balak tua.

PINOGIAPAN 24:13

umpakabí daiton i Tuangku ogoi kon inakó in bayongan in saḷaka bo buḷawan kon komaḻig i Tuangku, yo diábí motaau in akuoi ḻimimpat kon parenta i Tuhan bo mogaid podudui in ibogku tontaní. Akuoi in tongábí motaau moguman kon onu in pinoki guman i Tuhan kon inakó.”

TESALONIKA 1 2:4

Deemanbí natua! Kami in diábí mosingog sin moposanang kon gina in intau, táe moposanangbí in gina i Allah inta umuran noguji kon gina nami. Sin inanggap-Nea kon kami naa in motaaubí mopotaa-taau mako in Habar Mopia tatua.

GALATIA 1:10

Yo naonda degá in naa: Motayak degá in akuoi kon inta mokosanang kon gina in intau andeka inta mokosanang kon gina i Allah? Andeka ontongon monimu degá akuoi in mokopopia kon intau, sinbá kosanang in intau? Aka natua in oaidku, yo akuoi naa in deemanbí bobantung i Kristus.

KORINTUS 2 2:17

Sin kami in diábí ná intau ibanea inta tongá moibog motayak kon kauntungan nongkon habar i Allah tatua. Motuḻidbí totok in tujuan nami, sin ki Allahbí in nokiaid intua komintan kon i nami. Bo inontongbí i Allah tontaní kon kami in nopoyaput in habar tatua nogaidbí saḷaku mogogaid mita i Kristus.

KORINTUS 1 11:23

Sin onu inta ain sinundúku kon i monimu, yo nongkon i Tuhanbí intua komintan: kon doḷom tua, wakutu in ki Yesus, Tuhan naton motoyongdon posarakan, Sia in nogamá kon roti,

OUMAN IN RASUL MITA 20:27

Sin diábí kon dodai in onda in akuoi moḷagui mopohabar in bayongan tomayá i Allah kon i monimu komintan, sin tuabí in oaidanku.

YEHEZKIEL 2:7

Potaaubí in bayongan in koyow-Ku kon i monia, pinomayá moibog in mosia mokidongog andeka doí. Toropdon kon mosia tua in momomarontak mita.

YEREMIA 42:4

Akuoi in notubag, “Mopia aka natuabí. Tarimaanku onu in pinoigum tua. Mosambayang in akuoi kon i Tuhan Allah naton, bo onukabí in potubag-Nea, potaaukubí komintan; tobatúmai yo diábí bunionku kon inimu.”

YEREMIA 23:28

Nabi inta sinumogoindop mustibí moguman, ‘Naa in tongábí togoindop.’ Táe nabi inta nokouḻí kon koyow nongkon i-Nakó mustibí mopotaau in koyow tatua podudui in koyow inta mobanar tua. Gandum in diábí motaau potongkaion in wawa.

DATU MITA IMITÁNEA 22:14

Táe ki Mikha in notubag, “Pinodoyon kon i Tuhan inta nobiag, akuoi in tongábí mopotaau kon onu inta pinotaau i Tuhan kon inakó!”

PINOGIAPAN 23:26

Tubag i Bileam, “Ain bidon muna pinogumanku kon i Tuangku kon akuoi in tongábí mogaid kon bayongan inta pinarenta i Tuhan!”

PINOGIAPAN 23:12

Tubag i Bileam, “Akuoi in tongábí motaau moguman kon onu inta pinoki guman i Tuhan.”

TAWARIKH 2 18:12

Kon dodai intua totabá inta nonontomu kon i Mikha, noguman kon i Mikha, “Bayongan in nabi inta ibanea in nonoḻindap kon kountungan kon i datu. Igumon mako ki Amá in monoḻindap kon inta mopia ná mosia.”

TAWARIKH 2 18:14

Naonda in ki Mikha noiyaput kon tayowon i Datu Ahab, ki datu in noḻibó, “Motaau degá in akuoi bo ki Datu Yosapat in mayá monubu kon Ramot andeka diá?” “Tubudon!” tubag i Mikha. “Tantú mountungbí in ki Tuang datu. Ki Tuhan in mopountungbí kon i Tuang datu.”